1. สีหาสนทายกตฺเถรอปทานํ
[1]
‘‘นิพฺพุเต โลกนาถมฺหิ, สิทฺธตฺเถ ทฺวิปทุตฺตเม [ทิปทุตฺตเม (สี. สฺยา.)];
วิตฺถาริเก ปาวจเน, พาหุชญฺญมฺหิ สาสเนฯ
[2]
‘‘ปสนฺนจิตฺโต สุมโน, สีหาสนมกาสหํ;
สีหาสนํ กริตฺวาน, ปาทปีฐมกาสหํฯ
[3]
‘‘สีหาสเน จ วสฺสนฺเต, ฆรํ ตตฺถ อกาสหํ;
เตน จิตฺตปฺปสาเทน, ตุสิตํ อุปปชฺชหํฯ
[4]
‘‘อายาเมน จตุพฺพีส, โยชนํ อาสิ [โยชนาสิํสุ (สฺยา. ก.)] ตาวเท;
วิมานํ สุกตํ มยฺหํ, วิตฺถาเรน จตุทฺทสฯ
[5]
‘‘สตํ [สตฺต (สฺยา.)] กญฺญาสหสฺสานิ, ปริวาเรนฺติ มํ สทา;
โสณฺณมยญฺจ ปลฺลงฺกํ, พฺยมฺเห อาสิ สุนิมฺมิตํฯ
[6]
‘‘หตฺถิยานํ อสฺสยานํ, ทิพฺพยานํ อุปฏฺฐิตํ;
ปาสาทา สิวิกา เจว, นิพฺพตฺตนฺติ ยทิจฺฉกํฯ
[7]
‘‘มณิมยา จ ปลฺลงฺกา, อญฺเญ สารมยา พหู;
นิพฺพตฺตนฺติ มมํ สพฺเพ, สีหาสนสฺสิทํ ผลํฯ
[8]
‘‘โสณฺณมยา รูปิมยา, ผลิกาเวฬุริยามยา;
ปาทุกา อภิรูหามิ, ปาทปีฐสฺสิทํ ผลํฯ
[9]
‘‘จตุนฺนวุติโต [จตุนวุเต อิโต (สี. สฺยา.)] กปฺเป, ยํ กมฺมมกริํ ตทา;
ทุคฺคติํ นาภิชานามิ, ปุญฺญกมฺมสฺสิทํ ผลํฯ
[10]
‘‘เตสตฺตติมฺหิโต กปฺเป, อินฺทนามา ตโย ชนา;
ทฺเวสตฺตติมฺหิโต กปฺเป, ตโย สุมนนามกาฯ
[11]
‘‘สมสตฺตติโต กปฺเป, ตโย วรุณนามกา;
สตฺตรตนสมฺปนฺนา, จตุทีปมฺหิ อิสฺสราฯ
[12]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา สีหาสนทายโก เถโร อิมา คาถาโย อภาสิตฺถาติฯ
สีหาสนทายกตฺเถรสฺสาปทานํ ปฐมํฯ
2. เอกตฺถมฺภิกตฺเถรอปทานํ
[13]
‘‘สิทฺธตฺถสฺส ภควโต, มหาปูคคโณ อหุ;
สรณํ คตา จ เต พุทฺธํ, สทฺทหนฺติ ตถาคตํฯ
[14]
‘‘สพฺเพ สงฺคมฺม มนฺเตตฺวา, มาฬํ กุพฺพนฺติ สตฺถุโน;
เอกตฺถมฺภํ อลภนฺตา, วิจินนฺติ พฺรหาวเนฯ
[15]
‘‘เตหํ อรญฺเญ ทิสฺวาน, อุปคมฺม คณํ ตทา;
อญฺชลิํ ปคฺคเหตฺวาน, ปริปุจฺฉิํ คณํ อหํฯ
[16]
‘‘เต เม ปุฏฺฐา วิยากํสุ, สีลวนฺโต อุปาสกา;
มาฬํ มยํ กตฺตุกามา, เอกตฺถมฺโภ น ลพฺภติฯ
[17]
‘‘เอกตฺถมฺภํ มมํ เทถ, อหํ ทสฺสามิ สตฺถุโน;
อาหริสฺสามหํ ถมฺภํ, อปฺโปสฺสุกฺกา ภวนฺตุ เต [ภวนฺตุ โว (สี.), ภวาถ โว (?)]ฯ
[18]
‘‘เต เม ถมฺภํ ปเวจฺฉิํสุ, ปสนฺนา ตุฏฺฐมานสา;
ตโต ปฏินิวตฺติตฺวา, อคมํสุ สกํ ฆรํฯ
[19]
‘‘อจิรํ คเต ปูคคเณ, ถมฺภํ อหาสหํ ตทา;
หฏฺโฐ หฏฺเฐน จิตฺเตน, ปฐมํ อุสฺสเปสหํฯ
[20]
‘‘เตน จิตฺตปฺปสาเทน, วิมานํ อุปปชฺชหํ;
อุพฺพิทฺธํ ภวนํ มยฺหํ, สตฺตภูมํ [สตภูมํ (สี. ก.)] สมุคฺคตํฯ
[21]
‘‘วชฺชมานาสุ เภรีสุ, ปริจาเรมหํ สทา;
ปญฺจปญฺญาสกปฺปมฺหิ, ราชา อาสิํ ยโสธโรฯ
[22]