‘‘สนฺนิปาตํ อหํ คนฺตฺวา, เอกํ ปตฺตํ คเหสหํ;
ปูรยิตฺวาน ตํ ปตฺตํ, ภิกฺขุสงฺฆสฺสทาสหํฯ
[108]
‘‘โยตฺถ เถรตโร ภิกฺขุ, นิยฺยาเทสิ มมํ ตทา;
อิมินา ปตฺตปูเรน, ลภสฺสุ วิปุลํ สุขํฯ
[109]
‘‘ทุเว สมฺปตฺติโย ภุตฺวา, สุกฺกมูเลน โจทิโต;
ปจฺฉิเม วตฺตมานมฺหิ, กิเลเส ฌาปยิสฺสติฯ
[110]
‘‘ตตฺถ จิตฺตํ ปสาเทตฺวา, ตาวติํสมคจฺฉหํ;
ตตฺถ ภุตฺวา ปิวิตฺวา จ, ลภามิ วิปุลํ สุขํฯ
[111]
‘‘มณฺฑเป รุกฺขมูเล วา, ปุพฺพกมฺมํ อนุสฺสริํ;
อนฺนปานาภิวสฺโส เม, อภิวสฺสติ ตาวเทฯ
[112]
‘‘อิทํ ปจฺฉิมกํ มยฺหํ, จริโม วตฺตเต ภโว;
อิธาปิ อนฺนปานํ เม, วสฺสเต สพฺพกาลิกํฯ
[113]
‘‘เตเนว มธุทาเนน [มํสทาเนน (สี. ปี.)], สนฺธาวิตฺวา ภเว อหํ;
สพฺพาสเว ปริญฺญาย, วิหรามิ อนาสโวฯ
[114]
‘‘เอกนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, มธุทานสฺสิทํ ผลํฯ
[115]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[116]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[117]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มธุมํสทายโก เถโร อิมา คาถาโย อภาสิตฺถาติฯ
มธุมํสทายกตฺเถรสฺสาปทานํ จตุตฺถํฯ
5. นาคปลฺลวตฺเถรอปทานํ
[118]
‘‘นคเร พนฺธุมติยา, ราชุยฺยาเน วสามหํ;
มม อสฺสมสามนฺตา, นิสีทิ โลกนายโกฯ
[119]
‘‘นาคปลฺลวมาทาย , พุทฺธสฺส อภิโรปยิํ;
ปสนฺนจิตฺโต สุมโน, สุคตํ อภิวาทยิํฯ
[120]
‘‘เอกนวุติโต กปฺเป, ยํ ปลฺลวมปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[121]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[122]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[123]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นาคปลฺลโว เถโร อิมา คาถาโย อภาสิตฺถาติฯ
นาคปลฺลวตฺเถรสฺสาปทานํ ปญฺจมํฯ
6. เอกทีปิยตฺเถรอปทานํ
[124]
‘‘ปรินิพฺพุเต สุคเต, สิทฺธตฺเถ โลกนายเก;
สเทวมานุสา สพฺเพ, ปูเชนฺติ ทฺวิปทุตฺตมํฯ
[125]
‘‘อาโรปิเต จ จิตเก, สิทฺธตฺเถ โลกนายเก;
ยถาสเกน ถาเมน, จิตํ ปูเชนฺติ สตฺถุโนฯ
[126]
‘‘อวิทูเร จิตกสฺส, ทีปํ อุชฺชาลยิํ อหํ;
ยาว อุเทติ สูริโย, ทีปํ เม ตาว อุชฺชลิฯ
[127]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[128]
‘‘ตตฺถ เม สุกตํ พฺยมฺหํ, เอกทีปีติ ญายติ;
ทีปสตสหสฺสานิ, พฺยมฺเห ปชฺชลเร มมฯ
[129]
‘‘อุทยนฺโตว สูริโย, เทโห เม โชตเต สทา;
สปฺปภาหิ สรีรสฺส, อาโลโก โหติ เม สทาฯ
[130]
‘‘ติโรกุฏฺฏํ [ติโรกุฑฺฑํ (สี. สฺยา. ก.)] ติโรเสลํ, สมติคฺคยฺห [สพฺพตฺถปิ เอวเมว ทิสฺสติ] ปพฺพตํ;
สมนฺตา โยชนสตํ, ปสฺสามิ จกฺขุนา อหํฯ
[131]