‘‘ติํสกปฺปสหสฺสมฺหิ , อทฺทสํ โลกนายกํ;
เอตฺถนฺตรมุปาทาย, คเวสิํ อมตํ ปทํฯ
[25]
‘‘ลาภา มยฺหํ สุลทฺธํ เม, ยมหญฺญาสิ สาสนํ;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[26]
‘‘นโม เต ปุริสาชญฺญ, นโม เต ปุริสุตฺตม;
ตว ญาณํ ปกิตฺเตตฺวา, ปตฺโตมฺหิ อจลํ ปทํฯ
[27]
‘‘ยํ ยํ โยนุปปชฺชามิ, เทวตฺตํ อถ มานุสํ;
สพฺพตฺถ สุขิโต โหมิ, ผลํ เม ญาณกิตฺตเนฯ
[28]
‘‘อิทํ ปจฺฉิมกํ มยฺหํ, จริโม วตฺตเต ภโว;
นาโคว พนฺธนํ เฉตฺวา, วิหรามิ อนาสโวฯ
[29]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[30]
‘‘สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[31]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ภทฺทาลิตฺเถโร อิมา คาถาโย อภาสิตฺถาติฯ
ภทฺทาลิตฺเถรสฺสาปทานํ ปฐมํฯ
2. เอกฉตฺติยตฺเถรอปทานํ
[32]
‘‘จนฺทภาคานทีตีเร, อสฺสโม สุกโต มม;
สุสุทฺธปุลินากิณฺโณ, ปนฺนสาลา สุมาปิตาฯ
[33]
‘‘อุตฺตานกูลา นทิกา, สุปติตฺถา มโนรมา;
มจฺฉกจฺฉปสมฺปนฺนา [… สญฺฉนฺนา (ก.)], สุสุมารนิเสวิตาฯ
[34]
‘‘อจฺฉา ทีปี จ มยูรา, กรวีกา จ สาฬิกา;
กูชนฺติ สพฺพทา เอเต, โสภยนฺตา มมสฺสมํฯ
[35]
‘‘โกกิลา มญฺชุภาณี จ, หํสา จ มธุรสฺสรา;
อภิกูชนฺติ เต ตตฺถ, โสภยนฺตา มมสฺสมํฯ
[36]
‘‘สีหา พฺยคฺฆา วราหา จ, อจฺฉ [วก (สี. ปี.), พกา (สฺยา.), วกา (ก.)] โกกตรจฺฉกา;
คิริทุคฺคมฺหิ นาเทนฺติ, โสภยนฺตา มมสฺสมํฯ
[37]
‘‘เอณีมิคา จ สรภา, เภรณฺฑา สูกรา พหู;
คิริทุคฺคมฺหิ นาเทนฺติ, โสภยนฺตา มมสฺสมํฯ
[38]
‘‘อุทฺทาลกา จมฺปกา จ, ปาฏลี สินฺทุวารกา;
อติมุตฺตา อโสกา จ, โสภยนฺติ มมสฺสมํ [ปุปฺผนฺติ มม อสฺสเม (สี. ปี.)]ฯ
[39]
‘‘องฺโกลา ยูถิกา เจว, สตฺตลี พิมฺพิชาลิกา;
กณิการา จ ปุปฺผนฺติ, โสภยนฺตา มมสฺสมํ [กณิกากณิการา จ, ปุปฺผนฺติ มม อสฺสเม (สี. สฺยา. ปี.)]ฯ
[40]
‘‘นาคา สาลา จ สฬลา, ปุณฺฑรีเกตฺถ ปุปฺผิตา;
ทิพฺพคนฺธํ สมฺปวนฺตา, โสภยนฺติ มมสฺสมํฯ
[41]
‘‘อชฺชุนา อสนา เจตฺถ, มหานามา จ ปุปฺผิตา;
สาลา จ กงฺคุปุปฺผา จ, โสภยนฺติ มมสฺสมํฯ
[42]
‘‘อมฺพา ชมฺพู จ ติลกา, นิมฺพา จ สาลกลฺยาณี;
ทิพฺพคนฺธํ สมฺปวนฺตา, โสภยนฺติ มมสฺสมํฯ
[43]
‘‘อโสกา จ กปิฏฺฐา จ, คิริมาเลตฺถ [ภคินิมาเลตฺถ (สี. ปี.), ภคินิมาลา จ (สฺยา.)] ปุปฺผิตา;
ทิพฺพคนฺธํ สมฺปวนฺตา, โสภยนฺติ มมสฺสมํฯ
[44]
‘‘กทมฺพา กทลี เจว, อิสิมุคฺคา จ โรปิตา;
ธุวํ ผลานิ ธาเรนฺติ, โสภยนฺตา มมสฺสมํฯ
[45]
‘‘หรีตกา อามลกา, อมฺพชมฺพุวิภีตกา;
โกลา ภลฺลาตกา พิลฺลา, ผลิโน มม อสฺสเมฯ
[46]
‘‘อวิทูเร โปกฺขรณี, สุปติตฺถา มโนรมา;
มนฺทาลเกหิ สญฺฉนฺนา, ปทุมุปฺปลเกหิ จฯ
[47]
‘‘คพฺภํ คณฺหนฺติ ปทุมา, อญฺเญ ปุปฺผนฺติ เกสรี;
โอปตฺตกณฺณิกา เจว, ปุปฺผนฺติ มม อสฺสเมฯ
[48]
‘‘ปาฐีนา ปาวุสา มจฺฉา, พลชา มุญฺชโรหิตา;
อจฺโฉทกมฺหิ วิจรํ, โสภยนฺติ มมสฺสมํฯ
[49]
‘‘นยิตา อมฺพคนฺธี จ, อนุกูเล จ เกตกา;
ทิพฺพคนฺธํ สมฺปวนฺตา, โสภยนฺติ มมสฺสมํฯ
[50]
‘‘มธุ ภิสมฺหา สวติ, ขีรสปฺปิ มุฬาลิภิ;
ทิพฺพคนฺธํ สมฺปวนฺตา, โสภยนฺติ มมสฺสมํฯ
[51]
‘‘ปุลินา โสภนา ตตฺถ, อากิณฺณา ชลเสวิตา;
โอปุปฺผา ปุปฺผิตา เสนฺติ, โสภยนฺตา มมสฺสมํฯ
[52]
‘‘ชฏาภาเรน ภริตา, อชินุตฺตรวาสนา;
วากจีรธรา สพฺเพ, โสภยนฺติ มมสฺสมํฯ
[53]
‘‘ยุคมตฺตมเปกฺขนฺตา, นิปกา สนฺตวุตฺติโน;
กามโภเค อนเปกฺขา, วสนฺติ มม อสฺสเมฯ
[54]
‘‘ปรูฬฺหกจฺฉนขโลมา , ปงฺกทนฺตา รชสฺสิรา;
รโชชลฺลธรา สพฺเพ, วสนฺติ มม อสฺสเมฯ
[55]
‘‘อภิญฺญาปารมิปฺปตฺตา, อนฺตลิกฺขจรา จ เต;
อุคฺคจฺฉนฺตา นภํ เอเต, โสภยนฺติ มมสฺสมํฯ
[56]
‘‘เตหิ สิสฺเสหิ ปริวุโต, วสามิ วิปิเน ตทา;
รตฺตินฺทิวํ น ชานามิ, สทา ฌานสมปฺปิโตฯ
[57]
‘‘ภควา ตมฺหิ สมเย, อตฺถทสฺสี มหามุนิ;
ตมนฺธการํ นาเสนฺโต, อุปฺปชฺชิ โลกนายโกฯ
[58]
‘‘อถ อญฺญตโร สิสฺโส, อาคจฺฉิ มม สนฺติกํ;
มนฺเต อชฺเฌตุกาโม โส, ฉฬงฺคํ นาม ลกฺขณํฯ
[59]
‘‘พุทฺโธ โลเก สมุปฺปนฺโน, อตฺถทสฺสี มหามุนิ;
จตุสจฺจํ ปกาเสนฺโต, เทเสติ อมตํ ปทํฯ
[60]
‘‘ตุฏฺฐหฏฺโฐ ปมุทิโต, ธมฺมนฺตรคตาสโย;
อสฺสมา อภินิกฺขมฺม, อิทํ วจนมพฺรวิํฯ
[61]
‘‘‘พุทฺโธ โลเก สมุปฺปนฺโน, ทฺวตฺติํสวรลกฺขโณ;
เอถ สพฺเพ คมิสฺสาม, สมฺมาสมฺพุทฺธสนฺติกํ’ฯ
[62]
‘‘โอวาทปฏิกรา เต, สธมฺเม ปารมิํ คตา;
สาธูติ สมฺปฏิจฺฉิํสุ, อุตฺตมตฺถคเวสกาฯ
[63]
‘‘ชฏาภารภริตา เต [ชฏาภาเรน ภริตา (ก.)], อชินุตฺตรวาสนา;
อุตฺตมตฺถํ คเวสนฺตา, นิกฺขมิํสุ วนา ตทาฯ
[64]
‘‘ภควา ตมฺหิ สมเย, อตฺถทสฺสี มหายโส;
จตุสจฺจํ ปกาเสนฺโต, เทเสติ อมตํ ปทํฯ
[65]
‘‘เสตจฺฉตฺตํ คเหตฺวาน, พุทฺธเสฏฺฐสฺส ธารยิํ;
เอกาหํ ธารยิตฺวาน, พุทฺธเสฏฺฐํ อวนฺทหํฯ
[66]
‘‘อตฺถทสฺสี ตุ ภควา, โลกเชฏฺโฐ นราสโภ;
ภิกฺขุสงฺเฆ นิสีทิตฺวา, อิมา คาถา อภาสถฯ
[67]
‘‘‘โย เม ฉตฺตํ อธาเรสิ, ปสนฺโน เสหิ ปาณิภิ;
ตมหํ กิตฺตยิสฺสามิ, สุณาถ มม ภาสโตฯ
[68]
‘‘‘อิมสฺส ชายมานสฺส, เทวตฺเต อถ มานุเส;
ธาเรสฺสติ สทา ฉตฺตํ, ฉตฺตทานสฺสิทํ ผลํฯ
[69]
‘‘‘สตฺตสตฺตติกปฺปานิ , เทวโลเก รมิสฺสติ;
สหสฺสกฺขตฺตุํ ราชา จ, จกฺกวตฺตี ภวิสฺสติฯ
[70]
‘‘‘สตฺตสตฺตติกฺขตฺตุญฺจ, เทวรชฺชํ กริสฺสติ;
ปเทสรชฺชํ วิปุลํ, คณนาโต อสงฺขิยํฯ
[71]
‘‘‘อฏฺฐารเส กปฺปสเต, โคตโม สกฺยปุงฺคโว;
ตมนฺธการํ นาเสนฺโต, อุปฺปชฺชิสฺสติ จกฺขุมาฯ
[72]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, วิหริสฺสตินาสโว’ฯ
[73]
‘‘ยโต อหํ กมฺมมกํ, ฉตฺตํ พุทฺธสฺส ธารยํ;
เอตฺถนฺตเร น ชานามิ, เสตจฺฉตฺตํ อธาริตํฯ
[74]
‘‘อิทํ ปจฺฉิมกํ มยฺหํ, จริโม วตฺตเต ภโว;
ฉตฺตธารณมชฺชาปิ, วตฺตเต นิจฺจกาลิกํฯ
[75]
‘‘อโห เม สุกตํ กมฺมํ, อตฺถทสฺสิสฺส ตาทิโน;
สพฺพาสวา ปริกฺขีณา, นตฺถิ ทานิ ปุนพฺภโวฯ
[76]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[77]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[78]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกฉตฺติโย เถโร อิมา คาถาโย อภาสิตฺถาติ;
เอกฉตฺติยตฺเถรสฺสาปทานํ ทุติยํฯ
3. ติณสูลกฉาทนิยตฺเถรอปทานํ
[79]
‘‘ชาติํ ชรญฺจ มรณํ, ปจฺจเวกฺขิํ อหํ ตทา;
เอกโก อภินิกฺขมฺม, ปพฺพชิํ อนคาริยํฯ
[80]
‘‘จรมาโนนุปุพฺเพน, คงฺคาตีรํ อุปาคมิํ;
ตตฺถทฺทสาสิํ ปถวิํ, คงฺคาตีเร สมุนฺนตํฯ
[81]
‘‘อสฺสมํ ตตฺถ มาเปตฺวา, วสามิ อสฺสเม อหํ;
สุกโต จงฺกโม มยฺหํ, นานาทิชคณายุโตฯ
[82]
‘‘มมุเปนฺติ จ วิสฺสตฺถา, กูชนฺติ จ มโนหรํ;
รมมาโน สห เตหิ, วสามิ อสฺสเม อหํฯ
[83]
‘‘มม อสฺสมสามนฺตา, มิคราชา จตุกฺกโม;
อาสยา อภินิกฺขมฺม, คชฺชิ โส อสนี วิยฯ
[84]