‘‘‘เตตฺติํสกฺขตฺตุํ เทวินฺโท, เทวรชฺชํ กริสฺสติ;
ปเทสรชฺชํ วิปุลํ, คณนาโต อสงฺขิยํฯ
[268]
‘‘‘ตโต จุโตยํ มนุโช, มนุสฺสตฺตํ คมิสฺสติ;
ปุญฺญกมฺเมน สํยุตฺโต, พฺรหฺมพนฺธุ ภวิสฺสติฯ
[269]
‘‘‘อชฺฌายโก มนฺตธโร, ติณฺณํ เวทาน ปารคู;
ติลกฺขเณน สมฺปนฺโน, พาวรี นาม พฺราหฺมโณฯ
[270]
‘‘‘ตสฺส สิสฺโส ภวิตฺวาน, เหสฺสติ มนฺตปารคู;
อุปคนฺตฺวาน สมฺพุทฺธํ, โคตมํ สกฺยปุงฺควํฯ
[271]
‘‘‘ปุจฺฉิตฺวา นิปุเณ ปญฺเห, ภาวยิตฺวาน อญฺชสํ [หาสยิตฺวาน มานสํ (สฺยา.), ภาวยิตฺวาน สญฺจยํ (ก.)];
สพฺพาสเว ปริญฺญาย, วิหริสฺสตินาสโว’ฯ
[272]
‘‘ติวิธคฺคิ นิพฺพุตา มยฺหํ, ภวา สพฺเพ สมูหตา;
สพฺพาสเว ปริญฺญาย, วิหรามิ อนาสโวฯ
[273]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[274]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[275]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โตเทยฺโย เถโร อิมา คาถาโย อภาสิตฺถาติฯ
โตเทยฺยตฺเถรสฺสาปทานํ อฏฺฐมํฯ
9. ชตุกณฺณิตฺเถรอปทานํ
[276]
‘‘นคเร หํสวติยา, เสฏฺฐิปุตฺโต อโหสหํ;
สมปฺปิโต กามคุเณ, ปริจาเรมหํ ตทาฯ
[277]
‘‘ตโต [ตโย (สี.)] ปาสาทมารุยฺห, มหาโภเค วลญฺชโก [อุพฺพิทฺธา เคหลุญฺชกา (ก.), อุพฺพิทฺธาเคหลญฺฉกา (สี.)];
ตตฺถ นจฺเจหิ คีเตหิ, ปริจาเรมหํ ตทาฯ
[278]
‘‘ตูริยา อาหตา มยฺหํ, สมฺมตาฬสมาหิตา;
นจฺจนฺตา [รญฺชนฺตี (สฺยา.), รชฺชนฺตา (ก.)] อิตฺถิโย สพฺพา, หรนฺติเยว เม มโนฯ
[279]
‘‘เจลาปิกา [เจลาวกา (สฺยา.), เวลามิกา (ปี.)] ลามณิกา [วามนิกา (สฺยา. ปี.)], กุญฺชวาสี ติมชฺฌิกา [กุญฺชวา สีหิมชฺฌิตา (สฺยา.), กุชฺชา วา สีหิมชฺฌิกา (ปี.)];
ลงฺฆิกา โสกชฺฌายี จ, ปริวาเรนฺติ มํ สทาฯ
[280]
‘‘เวตาฬิโน กุมฺภถูนี, นฏา จ นจฺจกา พหู;
นฏกา นาฏกา เจว, ปริวาเรนฺติ มํ สทาฯ
[281]
‘‘กปฺปกา นฺหาปกา สูทา, มาลาการา สุปาสกา [สุมาปกา (สี. สฺยา.)];
ชลฺลา มลฺลา จ เต สพฺเพ, ปริวาเรนฺติ มํ สทาฯ
[282]
‘‘เอเตสุ กีฬมาเนสุ, สิกฺขิเต กตุปาสเน;
รตฺตินฺทิวํ น ชานามิ, อินฺโทว ติทสงฺคเณฯ
[283]
‘‘อทฺธิกา ปถิกา สพฺเพ, ยาจกา วรกา พหู;
อุปคจฺฉนฺติ เต นิจฺจํ, ภิกฺขยนฺตา มมํ ฆรํฯ
[284]
‘‘สมณา พฺราหฺมณา เจว, ปุญฺญกฺเขตฺตา อนุตฺตรา;
วฑฺฒยนฺตา มมํ ปุญฺญํ, อาคจฺฉนฺติ มมํ ฆรํฯ
[285]
‘‘ปฏคา [ปฏกา (สี. สฺยา.), ปทกา (ปี.)] ลฏุกา [ลฏกา (สี.)] สพฺเพ, นิคณฺฐา ปุปฺผสาฏกา;
เตทณฺฑิกา เอกสิขา, อาคจฺฉนฺติ มมํ ฆรํฯ
[286]
‘‘อาชีวกา วิลุตฺตาวี, โคธมฺมา เทวธมฺมิกา;
รโชชลฺลธรา เอเต, อาคจฺฉนฺติ มมํ ฆรํฯ
[287]
‘‘ปริตฺตกา สนฺติปตฺตา [ปริวตฺตกา สิทฺธิปตฺตา (สี. สฺยา. ปี.)], โกธปุคฺคนิกา [โกณฺฑปุคฺคณิกา (สี.), โกณฺฑปุคฺคลิกา (ปี.)] พหู;
ตปสฺสี วนจารี จ, อาคจฺฉนฺติ มมํ ฆรํฯ
[288]
‘‘โอฑฺฑกา ทมิฬา เจว, สากุฬา มลวาฬกา [มลยาลกา (สี. สฺยา. ปี.)];
สวรา โยนกา เจว, อาคจฺฉนฺติ มมํ ฆรํฯ
[289]
‘‘อนฺธกา มุณฺฑกา สพฺเพ, โกฏลา หนุวินฺทกา [โกลกา สานุวินฺทกา (สี. ปี.)];
อาราวจีนรฏฺฐา จ, อาคจฺฉนฺติ มมํ ฆรํฯ
[290]
‘‘อลสนฺทกา [อลสนฺตา (ก.)] ปลฺลวกา, ธมฺมรา นิคฺคมานุสา [พพฺพรา ภคฺคการุสา (สี.)];
เคหิกา [โรหิตา (สี.), พาหิกา (ปี.)] เจตปุตฺตา จ, อาคจฺฉนฺติ มมํ ฆรํฯ
[291]
‘‘มาธุรกา โกสลกา, กลิงฺคา [กาสิกา (สี.)] หตฺถิโปริกา;
อิสิณฺฑา มกฺกลา เจว, อาคจฺฉนฺติ มมํ ฆรํฯ
[292]
‘‘เจลาวกา อารพฺภา [อรมฺมา (สี. ปี.)] จ, โอฆุฬฺหา [โอกฺกลา (สี.)] เมฆลา พหู;
ขุทฺทกา สุทฺทกา เจว, อาคจฺฉนฺติ มมํ ฆรํฯ
[293]
‘‘โรหณา สินฺธวา เจว, จิตกา เอกกณฺณิกา;
สุรฏฺฐา อปรนฺตา จ, อาคจฺฉนฺติ มมํ ฆรํฯ
[294]
‘‘สุปฺปารกา กุมารา [กิกุมารา (สี. ปี.)] จ, มลฺลโสวณฺณภูมิกา [มลยา โสณฺณภูมิกา (สี. สฺยา. ปี.)];
วชฺชีตงฺคา [วชฺชี ตารา (สี.), วชฺชีหารา (สฺยา. ปี.)] จ เต สพฺเพ, อาคจฺฉนฺติ มมํ ฆรํฯ
[295]
‘‘นฬการา เปสการา, จมฺมการา จ ตจฺฉกา;
กมฺมารา กุมฺภการา จ, อาคจฺฉนฺติ มมํ ฆรํฯ
[296]
‘‘มณิการา โลหการา, โสณฺณการา จ ทุสฺสิกา;
ติปุการา จ เต สพฺเพ, อาคจฺฉนฺติ มมํ ฆรํฯ
[297]
‘‘อุสุการา ภมการา, เปสการา จ คนฺธิกา;
รชกา ตุนฺนวายา จ, อาคจฺฉนฺติ มมํ ฆรํฯ
[298]
‘‘เตลิกา กฏฺฐหารา จ, อุทหารา จ เปสฺสิกา;
สูปิกา สูปรกฺขา จ, อาคจฺฉนฺติ มมํ ฆรํฯ
[299]
‘‘โทวาริกา อนีกฏฺฐา, พนฺธิกา [วนฺทิกา (สี.), คนฺถิกา (สฺยา.), สนฺทิกา (ปี.)] ปุปฺผฉฑฺฑกา;
หตฺถารุหา หตฺถิปาลา, อาคจฺฉนฺติ มมํ ฆรํฯ
[300]
‘‘อานนฺทสฺส มหารญฺโญ [อานนฺทสฺส นาม รญฺโญ (สฺยา.), อรินฺทมนาม รญฺโญ (ปี.)], มมตฺถสฺส [ปมตฺตสฺส (สี. ปี.), สมคฺคสฺส (สฺยา.)] อทาสหํ;
สตฺตวณฺเณน รตเนน, อูนตฺถํ [อูนตฺตํ (สี. สฺยา. ปี.)] ปูรยามหํฯ
[301]
‘‘เย มยา กิตฺติตา สพฺเพ, นานาวณฺณา พหู ชนา;
เตสาหํ จิตฺตมญฺญาย, ตปฺปยิํ รตเนนหํฯ
[302]
‘‘วคฺคูสุ ภาสมานาสุ, วชฺชมานาสุ เภริสุ;
สงฺเขสุ ธมยนฺเตสุ, สกเคเห รมามหํฯ
[303]
‘‘ภควา ตมฺหิ สมเย, ปทุมุตฺตรนายโก;
วสีสตสหสฺเสหิ, ปริกฺขีณาสเวหิ โสฯ
[304]
‘‘ภิกฺขูหิ สหิโต วีถิํ, ปฏิปชฺชิตฺถ จกฺขุมา;
โอภาเสนฺโต ทิสา สพฺพา, ทีปรุกฺโขว โชตติฯ
[305]
‘‘วชฺชนฺติ เภริโย สพฺพา, คจฺฉนฺเต โลกนายเก;
ปภา นิทฺธาวเต ตสฺส, สตรํสีว อุคฺคโตฯ
[306]
‘‘กวาฏนฺตริกายาปิ, ปวิฏฺเฐน จ รสฺมินา;
อนฺโตฆเรสุ วิปุโล, อาโลโก อาสิ ตาวเทฯ
[307]
‘‘ปภํ ทิสฺวาน พุทฺธสฺส, ปาริสชฺเช อโวจหํ;
นิสฺสํสยํ พุทฺธเสฏฺโฐ, อิมํ วีถิมุปาคโตฯ
[308]
‘‘ขิปฺปํ โอรุยฺห ปาสาทา, อคมิํ อนฺตราปณํ;
สมฺพุทฺธํ อภิวาเทตฺวา, อิทํ วจนมพฺรวิํฯ
[309]
‘‘‘อนุกมฺปตุ เม พุทฺโธ, ชลชุตฺตมนายโก;
วสีสตสหสฺเสหิ, อธิวาเสสิ โส มุนิ’ฯ
[310]
‘‘นิมนฺเตตฺวาน สมฺพุทฺธํ, อภิเนสิํ สกํ ฆรํ;
ตตฺถ อนฺเนน ปาเนน, สนฺตปฺเปสิํ มหามุนิํฯ
[311]
‘‘ภุตฺตาวิํ กาลมญฺญาย, พุทฺธเสฏฺฐสฺส ตาทิโน;
สตงฺคิเกน ตูริเยน, พุทฺธเสฏฺฐํ อุปฏฺฐหิํฯ
[312]
‘‘ปทุมุตฺตโร โลกวิทู, อาหุตีนํ ปฏิคฺคโห;
อนฺโตฆเร นิสีทิตฺวา, อิมา คาถา อภาสถฯ
[313]
‘‘‘โย มํ ตูริเยหุปฏฺฐาสิ, อนฺนปานญฺจทาสิ เม;
ตมหํ กิตฺตยิสฺสามิ, สุณาถ มม ภาสโตฯ
[314]
‘‘‘ปหูตภกฺโข หุตฺวาน, สหิรญฺโญ สโภชโน;
จตุทีเป เอกรชฺชํ, การยิสฺสติยํ นโรฯ
[315]
‘‘‘ปญฺจสีเล สมาทาย, ทสกมฺมปเถ ตโต;
สมาทาย ปวตฺเตนฺโต, ปริสํ สิกฺขาปยิสฺสติฯ
[316]
‘‘‘ตูริยสตสหสฺสานิ, เภริโย สมลงฺกตา;
วชฺชยิสฺสนฺติมํ นิจฺจํ, อุปฏฺฐานสฺสิทํ ผลํฯ
[317]
‘‘‘ติํสกปฺปสหสฺสานิ, เทวโลเก รมิสฺสติ;
จตุสฏฺฐิกฺขตฺตุํ เทวินฺโท, เทวรชฺชํ กริสฺสติฯ
[318]
‘‘‘จตุสฏฺฐิกฺขตฺตุํ ราชา, จกฺกวตฺตี ภวิสฺสติ;
ปเทสรชฺชํ วิปุลํ, คณนาโต อสงฺขิยํฯ
[319]
‘‘‘กปฺปสตสหสฺสมฺหิ, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[320]
‘‘‘อุปปชฺชติ ยํ โยนิํ, เทวตฺตํ อถ มานุสํ;
อนูนโภโค หุตฺวาน, มนุสฺสตฺตํ คมิสฺสติฯ
[321]
‘‘‘อชฺฌายโก ภวิตฺวาน, ติณฺณํ เวทาน ปารคู;
อุตฺตมตฺถํ คเวสนฺโต, จริสฺสติ มหิํ อิมํฯ
[322]
‘‘‘โส ปจฺฉา ปพฺพชิตฺวาน, สุกฺกมูเลน โจทิโต;
โคตมสฺส ภควโต, สาสเนภิรมิสฺสติฯ
[323]
‘‘‘อาราธยิตฺวาน สมฺพุทฺธํ, โคตมํ สกฺยปุงฺควํ;
กิเลเส ฌาปยิตฺวาน, อรหายํ ภวิสฺสติ’ฯ
[324]
‘‘วิปิเน พฺยคฺฆราชาว, มิคราชาว เกสรี;
อภีโต วิหรามชฺช, สกฺยปุตฺตสฺส สาสเนฯ
[325]
‘‘เทวโลเก มนุสฺเส วา, ทลิทฺเท ทุคฺคติมฺหิ วา;
นิพฺพตฺติํ เม น ปสฺสามิ, อุปฏฺฐานสฺสิทํ ผลํฯ
[326]
‘‘วิเวกมนุยุตฺโตมฺหิ , อุปสนฺโต นิรูปธิ;
นาโคว พนฺธนํ เฉตฺวา, วิหรามิ อนาสโวฯ
[327]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[328]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[329]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ชตุกณฺณิตฺเถโร อิมา คาถาโย อภาสิตฺถาติฯ
ชตุกณฺณิตฺเถรสฺสาปทานํ นวมํฯ
10. อุเทนตฺเถรอปทานํ
[330]
‘‘หิมวนฺตสฺสาวิทูเร , ปทุโม นาม ปพฺพโต;
อสฺสโม สุกโต มยฺหํ, ปณฺณสาลา สุมาปิตาฯ
[331]
‘‘นทิโย สนฺทเร ตตฺถ, สุปติตฺถา มโนรมา;
อจฺโฉทกา สีตชลา, สนฺทเร นทิโย สทาฯ
[332]
‘‘ปาฐีนา ปาวุสา มจฺฉา, พลชา มุญฺชโรหิตา;
โสเภนฺตา นทิโย เอเต, วสนฺติ นทิยา สทาฯ
[333]
‘‘อมฺพชมฺพูหิ สญฺฉนฺนา, กเรริติลกา ตถา;
อุทฺทาลกา ปาฏลิโย, โสเภนฺติ มม อสฺสมํฯ
[334]
‘‘องฺโกลกา พิมฺพิชาลา, มายาการี จ ปุปฺผิตา;
คนฺเธน อุปวายนฺตา, โสเภนฺติ มม อสฺสมํฯ
[335]
‘‘อติมุตฺตา สตฺตลิกา, นาคา สาลา จ ปุปฺผิตา;
ทิพฺพคนฺธํ สมฺปวนฺตา, โสเภนฺติ มม อสฺสมํฯ
[336]
‘‘โกสมฺพา สฬลา นีปา, อฏฺฐงฺคาปิ จ ปุปฺผิตา [อฏฺฐงฺคา จ สุปุปฺผิตา (สี.), กฏฺฐงฺคา จ สุปุปฺผิตา (ปี.)];
ทิพฺพคนฺธํ สมฺปวนฺตา, โสเภนฺติ มม อสฺสมํฯ
[337]
‘‘หรีตกา อามลกา, อมฺพชมฺพุวิภีตกา;
โกลา ภลฺลาตกา พิลฺลา, ผลานิ พหุ อสฺสเมฯ
[338]