10. อชิตตฺเถรอปทานํ
[484]
‘‘ปทุมุตฺตโร นาม ชิโน, สพฺพธมฺมาน ปารคู;
อชฺโฌคาเหตฺวา หิมวนฺตํ, นิสีทิ โลกนายโกฯ
[485]
‘‘นาหํ อทฺทกฺขิํ [ปสฺสามิ (?)] สมฺพุทฺธํ, นปิ สทฺทํ สุโณมหํ;
มม ภกฺขํ คเวสนฺโต, อาหิณฺฑามิ วเน อหํ [ตทา (สี.)]ฯ
[486]
‘‘ตตฺถทฺทสฺสาสิํ สมฺพุทฺธํ, ทฺวตฺติํสวรลกฺขณํ;
ทิสฺวาน วิตฺติมาปชฺชิํ [จิตฺตมาปชฺชิ (สี.), จิตฺตมาปชฺชิํ (สฺยา.)], สตฺโต โก นามยํ ภเวฯ
[487]
‘‘ลกฺขณานิ วิโลเกตฺวา, มม วิชฺชํ อนุสฺสริํ;
สุตญฺหิ เมตํ วุฑฺฒานํ, ปณฺฑิตานํ สุภาสิตํฯ
[488]
‘‘เตสํ ยถา ตํ วจนํ, อยํ พุทฺโธ ภวิสฺสติ;
ยํนูนาหํ สกฺกเรยฺยํ, คติํ เม โสธยิสฺสติฯ
[489]
‘‘ขิปฺปํ อสฺสมมาคนฺตฺวา, มธุเตลํ คหิํ อหํ;
โกลมฺพกํ คเหตฺวาน, อุปคจฺฉิํ วินายกํ [นราสภํ (สี.)]ฯ
[490]
‘‘ติทณฺฑเก คเหตฺวาน, อพฺโภกาเส ฐเปสหํ;
ปทีปํ ปชฺชลิตฺวาน, อฏฺฐกฺขตฺตุํ อวนฺทหํฯ
[491]
‘‘สตฺตรตฺตินฺทิวํ พุทฺโธ, นิสีทิ ปุริสุตฺตโม;
ตโต รตฺยา วิวสาเน, วุฏฺฐาสิ โลกนายโกฯ
[492]
‘‘ปสนฺนจิตฺโต สุมโน, สพฺพรตฺตินฺทิวํ อหํ;
ทีปํ พุทฺธสฺส ปาทาสิํ, ปสนฺโน เสหิ ปาณิภิฯ
[493]
‘‘สพฺเพ วนา คนฺธมยา, ปพฺพเต คนฺธมาทเน;
พุทฺธสฺส อานุภาเวน, อาคจฺฉุํ พุทฺธสนฺติกํ [อุปคจฺฉุํ ตทา ชินํ (สี.)]ฯ
[494]
‘‘เย เกจิ ปุปฺผคนฺธาเส, ปุปฺผิตา ธรณีรุหา;
พุทฺธสฺส อานุภาเวน, สพฺเพ สนฺนิปตุํ ตทาฯ
[495]
‘‘ยาวตา หิมวนฺตมฺหิ, นาคา จ ครุฬา อุโภ;
ธมฺมญฺจ โสตุกามา เต, อาคจฺฉุํ พุทฺธสนฺติกํฯ
[496]
‘‘เทวโล นาม สมโณ, พุทฺธสฺส อคฺคสาวโก;
วสีสตสหสฺเสหิ, พุทฺธสนฺติกุปาคมิฯ
[497]
‘‘ปทุมุตฺตโร โลกวิทู, อาหุตีนํ ปฏิคฺคโห;
ภิกฺขุสงฺเฆ นิสีทิตฺวา, อิมา คาถา อภาสถฯ
[498]
‘‘‘โย เม ทีปํ ปทีเปสิ, ปสนฺโน เสหิ ปาณิภิ;
ตมหํ กิตฺตยิสฺสามิ, สุณาถ มม ภาสโตฯ
[499]
‘‘‘สฏฺฐิ กปฺปสหสฺสานิ, เทวโลเก รมิสฺสติ;
สหสฺสกฺขตฺตุํ ราชา จ, จกฺกวตฺตี ภวิสฺสติฯ
โสฬสมํ ภาณวารํฯ
[500]
‘‘‘ฉตฺติสกฺขตฺตุํ เทวินฺโท, เทวรชฺชํ กริสฺสติ;
ปถวิยํ สตฺตสตํ, วิปุลํ รชฺชํ กริสฺสติฯ
[501]
‘‘‘ปเทสรชฺชํ วิปุลํ, คณนาโต อสงฺขิยํ;
อิมินา ทีปทาเนน, ทิพฺพจกฺขุ ภวิสฺสติฯ
[502]
‘‘‘สมนฺตโต อฏฺฐโกสํ [อฑฺฒโกสํ (สี. สฺยา.)], ปสฺสิสฺสติ อยํ สทา;
เทวโลกา จวนฺตสฺส, นิพฺพตฺตนฺตสฺส ชนฺตุโนฯ
[503]
‘‘‘ทิวา วา ยทิ วา รตฺติํ, ปทีปํ ธารยิสฺสติ;
ชายมานสฺส สตฺตสฺส, ปุญฺญกมฺมสมงฺคิโนฯ
[504]
‘‘‘ยาวตา นครํ อาสิ, ตาวตา โชตยิสฺสติ;
อุปปชฺชติ ยํ โยนิํ, เทวตฺตํ อถ มานุสํฯ
[505]
‘‘‘อสฺเสว ทีปทานสฺส, [อฏฺฐทีปผเลน หิ; อุปฏฺฐิสฺสนฺติมํ ชนฺตุํ (สฺยา.), อฏฺฐ ทีปา ผเลน หิ; น ชหิสฺสนฺติ’มํ ชนฺตุํ (?)] อฏฺฐทีปผเลน หิ;
น ชยิสฺสนฺติมํ ชนฺตู [อฏฺฐทีปผเลน หิ; อุปฏฺฐิสฺสนฺติมํ ชนฺตุํ (สฺยา.), อฏฺฐ ทีปา ผเลน หิ; น ชหิสฺสนฺติ’มํ ชนฺตุํ (?)], ทีปทานสฺสิทํ ผลํฯ
[506]
‘‘‘กปฺปสตสหสฺสมฺหิ , โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[507]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, นิพฺพายิสฺสตินาสโวฯ
[508]
‘‘‘โตสยิตฺวาน สมฺพุทฺธํ, โคตมํ สกฺยปุงฺควํ;
อชิโต นาม นาเมน, เหสฺสติ สตฺถุ สาวโก’ฯ
[509]
‘‘สฏฺฐิ กปฺปสหสฺสานิ, เทวโลเก รมิํ อหํ;
ตตฺราปิ เม ทีปสตํ, โชตเต นิจฺจกาลิกํ [สพฺพกาลิกํ (สี.)]ฯ
[510]
‘‘เทวโลเก มนุสฺเส วา, นิทฺธาวนฺติ ปภา มม;
พุทฺธเสฏฺฐํ สริตฺวาน, ภิยฺโย หาสํ ชเนสหํฯ
[511]
‘‘ตุสิตาหํ จวิตฺวาน, โอกฺกมิํ มาตุกุจฺฉิยํ;
ชายมานสฺส สนฺตสฺส, อาโลโก วิปุโล อหุฯ
[512]
‘‘อคารา อภินิกฺขมฺม, ปพฺพชิํ อนคาริยํ;
พาวริํ อุปสงฺกมฺม, สิสฺสตฺตํ อชฺฌุปาคมิํฯ
[513]
‘‘หิมวนฺเต วสนฺโตหํ, อสฺโสสิํ โลกนายกํ;
อุตฺตมตฺถํ คเวสนฺโต, อุปคจฺฉิํ วินายกํฯ
[514]
‘‘ทนฺโต พุทฺโธ ทเมตาวี, โอฆติณฺโณ นิรูปธิ;
นิพฺพานํ กถยี พุทฺโธ, สพฺพทุกฺขปฺปโมจนํฯ
[515]
‘‘ตํ เม อาคมนํ สิทฺธํ, โตสิโตหํ มหามุนิํ;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[516]
‘‘สตสหสฺสิโต กปฺเป, ยํ ทีปมททิํ ตทา;
ทุคฺคติํ นาภิชานามิ, ทีปทานสฺสิทํ ผลํฯ
[517]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[518]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[519]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อชิโต เถโร อิมา คาถาโย อภาสิตฺถาติฯ
อชิตตฺเถรสฺสาปทานํ ทสมํฯ
ปิลินฺทวจฺฉวคฺโค จตฺตาลีสโมฯ
ตสฺสุทฺทานํ –
ปิลินฺทวจฺโฉ เสโล จ, สพฺพกิตฺตี มธุํทโท;
กูฏาคารี พากุโล จ, คิริ สฬลสวฺหโยฯ
สพฺพโท อชิโต เจว, คาถาโย คณิตา อิห;
สตานิ ปญฺจ คาถานํ, วีสติ จ ตทุตฺตรีติฯ
อถ วคฺคุทฺทานํ –
ปทุมารกฺขโท เจว, อุมา คนฺโธทเกน จ;
เอกปทฺม สทฺทสญฺญี, มนฺทารํ โพธิวนฺทโกฯ
อวฏญฺจ ปิลินฺทิ [เอวเมว ทิสฺสติ] จ, คาถาโย คณิตา อิห;
จตุสตฺตติ คาถาโย, เอกาทส สตานิ จฯ
ปทุมวคฺคทสกํฯ
จตุตฺถสตกํ สมตฺตํฯ
41. เมตฺเตยฺยวคฺโค