‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา คิริมานนฺโท เถโร อิมา คาถาโย อภาสิตฺถาติฯ
คิริมานนฺทตฺเถรสฺสาปทานํ สตฺตมํฯ
8. สฬลมณฺฑปิยตฺเถรอปทานํ
[449]
‘‘นิพฺพุเต กกุสนฺธมฺหิ, พฺราหฺมณมฺหิ วุสีมติ;
คเหตฺวา สฬลํ มาลํ, มณฺฑปํ การยิํ อหํฯ
[450]
‘‘ตาวติํสคโต สนฺโต, ลภามิ พฺยมฺหมุตฺตมํ;
อญฺเญ เทเวติโรจามิ, ปุญฺญกมฺมสฺสิทํ ผลํฯ
[451]
‘‘ทิวา วา ยทิ วา รตฺติํ, จงฺกมนฺโต ฐิโต จหํ;
ฉนฺโน สฬลปุปฺเผหิ, ปุญฺญกมฺมสฺสิทํ ผลํฯ
[452]
‘‘อิมสฺมิํเยว กปฺปมฺหิ, ยํ พุทฺธมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[453]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[454]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[455]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สฬลมณฺฑปิโย เถโร อิมา คาถาโย อภาสิตฺถาติฯ
สฬลมณฺฑปิยตฺเถรสฺสาปทานํ อฏฺฐมํฯ
9. สพฺพทายกตฺเถรอปทานํ
[456]
‘‘มหาสมุทฺทํ โอคยฺห, ภวนํ เม สุนิมฺมิตํ;
สุนิมฺมิตา โปกฺขรณี, จกฺกวากปกูชิตาฯ
[457]
‘‘มนฺทาลเกหิ สญฺฉนฺนา, ปทุมุปฺปลเกหิ จ;
นที จ สนฺทเต ตตฺถ, สุปติตฺถา มโนรมาฯ
[458]
‘‘มจฺฉกจฺฉปสญฺฉนฺนา , นานาทิชสโมตฺถตา;
มยูรโกญฺจาภิรุทา, โกกิลาทีหิ วคฺคุหิฯ
[459]
‘‘ปาเรวตา รวิหํสา จ, จกฺกวากา นทีจรา;
ทินฺทิภา สาฬิกา เจตฺถ, ปมฺมกา [ปมฺปกา (สี.), จปฺปกา (สฺยา.)] ชีวชีวกาฯ
[460]
‘‘หํสา โกญฺจาปิ นทิตา [โกญฺจาภินทิตา (สี. สฺยา.)], โกสิยา ปิงฺคลา พหู;
สตฺตรตนสมฺปนฺนา, มณิมุตฺติกวาลุกาฯ
[461]
‘‘สพฺพโสณฺณมยา รุกฺขา, นานาคนฺธสเมริตา;
อุชฺโชเตนฺติ ทิวารตฺติํ, ภวนํ สพฺพกาลิกํฯ
[462]
‘‘สฏฺฐิ ตูริยสหสฺสานิ, สายํ ปาโต ปวชฺชเร;
โสฬสิตฺถิสหสฺสานิ, ปริวาเรฏฺติ มํ สทาฯ
[463]
‘‘อภินิกฺขมฺม ภวนา, สุเมธํ โลกนายกํ;
ปสนฺนจิตฺโต สุมโน, วนฺทยิํ ตํ มหายสํฯ
[464]
‘‘สมฺพุทฺธํ อภิวาเทตฺวา, สสงฺฆํ ตํ นิมนฺตยิํ;
อธิวาเสสิ โส ธีโร, สุเมโธ โลกนายโกฯ
[465]
‘‘มม ธมฺมกถํ กตฺวา, อุยฺโยเชสิ มหามุนิ;
สมฺพุทฺธํ อภิวาเทตฺวา, ภวนํ เม อุปาคมิํฯ
[466]
‘‘อามนฺตยิํ ปริชนํ, สพฺเพ สนฺนิปตาถ [สนฺนิปตตฺถ (ก.)] โว;
ปุพฺพณฺหสมยํ พุทฺโธ, ภวนํ อาคมิสฺสติฯ
[467]
‘‘ลาภา อมฺหํ สุลทฺธํ โน, เย วสาม ตวนฺติเก;
มยมฺปิ พุทฺธเสฏฺฐสฺส, ปูชํ กสฺสาม สตฺถุโนฯ
[468]
‘‘อนฺนปนํ ปฏฺฐเปตฺวา, กาลํ อาโรจยิํ อหํ;
วสีสตสหสฺเสหิ, อุเปสิ โลกนายโกฯ
[469]
‘‘ปญฺจงฺคิเกหิ ตูริเยหิ, ปจฺจุคฺคมนมกาสหํ;
สพฺพโสณฺณมเย ปีเฐ, นิสีทิ ปุริสุตฺตโมฯ
[470]
‘‘อุปริจฺฉทนํ อาสิ, สพฺพโสณฺณมยํ ตทา;
พีชนิโย ปวายนฺติ, ภิกฺขุสงฺฆสฺส อนฺตเรฯ
[471]
‘‘ปหูเตนนฺนปาเนน , ภิกฺขุสงฺฆมตปฺปยิํ;
ปจฺเจกทุสฺสยุคเฬ, ภิกฺขุสงฺฆสฺสทาสหํฯ
[472]
‘‘ยํ วทนฺติ สุเมโธติ, โลกาหุติปฏิคฺคหํ;
ภิกฺขุสงฺเฆ นิสีทิตฺวา, อิมา คาถา อภาสถฯ
[473]
‘‘โย เม อนฺเนน ปาเนน, สพฺเพ อิเม จ ตปฺปยิํ;
ตมหํ กิตฺตยิสฺสามิ, สุณาถ มม ภาสโตฯ
[474]
‘‘อฏฺฐารเส กปฺปสเต, เทวโลเก รมิสฺสติ;
สหสฺสกฺขตฺตุํ ราชา จ, จกฺกวตฺตี ภวิสฺสติฯ
[475]
‘‘อุปฺปชฺชติ [อุปคจฺฉติ (สี.)] ยํ โยนิํ, เทวตฺตํ อถ มานุสํ;
สพฺพทา สพฺพโสวณฺณํ, ฉทนํ ธารยิสฺสติฯ
[476]
‘‘ติํสกปฺปสหสฺสมฺหิ, โอกฺกากกุสลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[477]
‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, นิพฺพายิสฺสตินาสโวฯ
[478]
‘‘‘ภิกฺขุสงฺเฆ นิสีทิตฺวา, สีหนาทํ นทิสฺสติ;
จิตเก ฉตฺตํ ธาเรนฺติ, เหฏฺฐา ฉตฺตมฺหิ ฑยฺหถ’ฯ
[479]
‘‘สามญฺญํ เม อนุปฺปตฺตํ, กิเลสา ฌาปิตา มยา;
มณฺฑเป รุกฺขมูเล วา, สนฺตาโป เม น วิชฺชติฯ
[480]
‘‘ติํสกปฺปสหสฺสมฺหิ , ยํ ทานมททิํ ตทา;
ทุคฺคติํ นาภิชานามิ, สพฺพทานสฺสิทํ ผลํฯ
[481]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[482]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[483]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สพฺพทายโก เถโร อิมา คาถาโย อภาสิตฺถาติฯ
สพฺพทายกตฺเถรสฺสาปทานํ นวมํฯ
10. อชิตตฺเถรอปทานํ
[484]
‘‘ปทุมุตฺตโร นาม ชิโน, สพฺพธมฺมาน ปารคู;
อชฺโฌคาเหตฺวา หิมวนฺตํ, นิสีทิ โลกนายโกฯ
[485]
‘‘นาหํ อทฺทกฺขิํ [ปสฺสามิ (?)] สมฺพุทฺธํ, นปิ สทฺทํ สุโณมหํ;
มม ภกฺขํ คเวสนฺโต, อาหิณฺฑามิ วเน อหํ [ตทา (สี.)]ฯ
[486]
‘‘ตตฺถทฺทสฺสาสิํ สมฺพุทฺธํ, ทฺวตฺติํสวรลกฺขณํ;
ทิสฺวาน วิตฺติมาปชฺชิํ [จิตฺตมาปชฺชิ (สี.), จิตฺตมาปชฺชิํ (สฺยา.)], สตฺโต โก นามยํ ภเวฯ
[487]
‘‘ลกฺขณานิ วิโลเกตฺวา, มม วิชฺชํ อนุสฺสริํ;
สุตญฺหิ เมตํ วุฑฺฒานํ, ปณฺฑิตานํ สุภาสิตํฯ
[488]
‘‘เตสํ ยถา ตํ วจนํ, อยํ พุทฺโธ ภวิสฺสติ;
ยํนูนาหํ สกฺกเรยฺยํ, คติํ เม โสธยิสฺสติฯ
[489]
‘‘ขิปฺปํ อสฺสมมาคนฺตฺวา, มธุเตลํ คหิํ อหํ;
โกลมฺพกํ คเหตฺวาน, อุปคจฺฉิํ วินายกํ [นราสภํ (สี.)]ฯ
[490]
‘‘ติทณฺฑเก คเหตฺวาน, อพฺโภกาเส ฐเปสหํ;
ปทีปํ ปชฺชลิตฺวาน, อฏฺฐกฺขตฺตุํ อวนฺทหํฯ
[491]
‘‘สตฺตรตฺตินฺทิวํ พุทฺโธ, นิสีทิ ปุริสุตฺตโม;
ตโต รตฺยา วิวสาเน, วุฏฺฐาสิ โลกนายโกฯ
[492]
‘‘ปสนฺนจิตฺโต สุมโน, สพฺพรตฺตินฺทิวํ อหํ;
ทีปํ พุทฺธสฺส ปาทาสิํ, ปสนฺโน เสหิ ปาณิภิฯ
[493]
‘‘สพฺเพ วนา คนฺธมยา, ปพฺพเต คนฺธมาทเน;
พุทฺธสฺส อานุภาเวน, อาคจฺฉุํ พุทฺธสนฺติกํ [อุปคจฺฉุํ ตทา ชินํ (สี.)]ฯ
[494]
‘‘เย เกจิ ปุปฺผคนฺธาเส, ปุปฺผิตา ธรณีรุหา;
พุทฺธสฺส อานุภาเวน, สพฺเพ สนฺนิปตุํ ตทาฯ
[495]
‘‘ยาวตา หิมวนฺตมฺหิ, นาคา จ ครุฬา อุโภ;
ธมฺมญฺจ โสตุกามา เต, อาคจฺฉุํ พุทฺธสนฺติกํฯ
[496]