8. ปนสผลทายกตฺเถรอปทานํ
[43]
‘‘อชฺชุโน นาม สมฺพุทฺโธ, หิมวนฺเต วสี ตทา;
จรเณน จ สมฺปนฺโน, สมาธิกุสโล มุนิฯ
[44]
‘‘กุมฺภมตฺตํ คเหตฺวาน, ปนสํ ชีวชีวกํ [เทวคนฺธิกํ (41 วคฺเค, 5 อปทาเน)];
ฉตฺตปณฺเณ ฐเปตฺวาน, อทาสิํ สตฺถุโน อหํฯ
[45]
‘‘เอกตฺติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[46]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[47]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[48]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปนสผลทายโก เถโร อิมา คาถาโย อภาสิตฺถาติฯ
ปนสผลทายกตฺเถรสฺสาปทานํ อฏฺฐมํฯ
9. โสณโกฏิวีสตฺเถรอปทานํ
[49]
‘‘วิปสฺสิโน ปาวจเน, เอกํ เลณํ มยา กตํ;
จาตุทฺทิสสฺส สงฺฆสฺส, พนฺธุมาราชธานิยาฯ
[50]
‘‘ทุสฺเสหิ ภูมิํ เลณสฺส, สนฺถริตฺวา ปริจฺจชิํ;
อุทคฺคจิตฺโต สุมโน, อกาสิํ ปณิธิํ ตทาฯ
[51]
‘‘อาราธเยยฺยํ สมฺพุทฺธํ, ปพฺพชฺชญฺจ ลเภยฺยหํ;
อนุตฺตรญฺจ นิพฺพานํ, ผุเสยฺยํ สนฺติมุตฺตมํฯ
[52]
‘‘เตเนว สุกฺกมูเลน, กปฺเป [กปฺปํ (สี.), กปฺป (ก.)] นวุติ สํสริํ;
เทวภูโต มนุสฺโส จ, กตปุญฺโญ วิโรจหํฯ
[53]
‘‘ตโต กมฺมาวเสเสน, อิธ ปจฺฉิมเก ภเว;
จมฺปายํ อคฺคเสฏฺฐิสฺส, ชาโตมฺหิ เอกปุตฺตโกฯ
[54]
‘‘ชาตมตฺตสฺส เม สุตฺวา, ปิตุ ฉนฺโท อยํ อหุ;
ททามหํ กุมารสฺส, วีสโกฏี อนูนกาฯ
[55]
‘‘จตุรงฺคุลา จ เม โลมา, ชาตา ปาทตเล อุโภ;
สุขุมา มุทุสมฺผสฺสา, ตูลาปิจุสมา สุภาฯ
[56]
‘‘อตีตา นวุติ กปฺปา, อยํ เอโก จ อุตฺตริ;
นาภิชานามิ นิกฺขิตฺเต, ปาเท ภูมฺยา อสนฺถเตฯ
[57]
‘‘อาราธิโต เม สมฺพุทฺโธ, ปพฺพชิํ อนคาริยํ;
อรหตฺตญฺจ เม ปตฺตํ, สีติภูโตมฺหิ นิพฺพุโตฯ
[58]
‘‘อคฺโค อารทฺธวีริยานํ, นิทฺทิฏฺโฐ สพฺพทสฺสินา;
ขีณาสโวมฺหิ อรหา, ฉฬภิญฺโญ มหิทฺธิโกฯ
[59]
‘‘เอกนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, เลณทานสฺสิทํ ผลํฯ
[60]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[61]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[62]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
[63]
‘‘เถโร โกฏิวีโส [โกฏิวิโส (สฺยา. ก.), โกฬิวิโส (อญฺญฏฺฐาเนสุ)] โสโณ, ภิกฺขุสงฺฆสฺส อคฺคโต;
ปญฺหํ ปุฏฺโฐ วิยากาสิ, อโนตตฺเต มหาสเร’’ติฯ
อิตฺถํ สุทํ อายสฺมา โสโณ โกฏิวีโส เถโร อิมา คาถาโย อภาสิตฺถาติฯ
โสณโกฏิวีสตฺเถรสฺสาปทานํ นวมํฯ
10. ปุพฺพกมฺมปิโลติกพุทฺธอปทานํ
[64]
‘‘อโนตตฺตสราสนฺเน , รมณีเย สิลาตเล;
นานารตนปชฺโชเต, นานาคนฺธวนนฺตเรฯ
[65]
‘‘มหตา ภิกฺขุสงฺเฆน, ปเรโต [อุเปโต (อุทานฏฺฐกถายํ 4 วคฺเค, 8 สุตฺเต)] โลกนายโก;
อาสีโน พฺยากรี ตตฺถ, ปุพฺพกมฺมานิ อตฺตโนฯ
[66]