‘‘ตสฺมิํ ปสนฺโน [สมเณ (ก.)] สุคเต, กิเลสมลโธวเน;
คเหตฺวา ตีณิ ปุปฺผานิ, พุทฺธเสฏฺฐํ อปูชยิํฯ
[11]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปาฏลิปุปฺผิโย เถโร อิมา คาถาโย อภาสิตฺถาติฯ
ปาฏลิปุปฺผิยตฺเถรสฺสาปทานํ ทุติยํฯ
3. ตีณุปฺปลมาลิยตฺเถรอปทานํ
[13]
‘‘จนฺทภาคานทีตีเร , อโหสิํ วานโร ตทา;
อทฺทสํ วิรชํ พุทฺธํ, นิสินฺนํ ปพฺพตนฺตเรฯ
[14]
‘‘โอภาเสนฺตํ ทิสา สพฺพา, สาลราชํว ผุลฺลิตํ;
ลกฺขณพฺยญฺชนูเปตํ, ทิสฺวานตฺตมโน อหํฯ
[15]
‘‘อุทคฺคจิตฺโต สุมโน, ปีติยา หฏฺฐมานโส;
ตีณิ อุปฺปลปุปฺผานิ, มตฺถเก อภิโรปยิํฯ
[16]
‘‘ปูชยิตฺวาน ปุปฺผานิ, ผุสฺสสฺสาหํ มเหสิโน;
สคารโว ภวิตฺวาน, ปกฺกามิํ อุตฺตรามุโขฯ
[17]
‘‘คจฺฉนฺโต ปฏิกุฏิโก, วิปฺปสนฺเนน เจตสา;
เสลนฺตเร ปติตฺวาน, ปาปุณิํ ชีวิตกฺขยํฯ
[18]
‘‘เตน กมฺเมน สุกเตน, เจตนาปณิธีหิ จ;
ชหิตฺวา ปุริมํ ชาติํ, ตาวติํสมคจฺฉหํฯ
[19]
‘‘สตานํ ตีณิกฺขตฺตุญฺจ, เทวรชฺชมการยิํ;
สตานํ ปญฺจกฺขตฺตุญฺจ, จกฺกวตฺตี อโหสหํฯ
[20]
‘‘ทฺเวนวุเต อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[21]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตีณุปฺปลมาลิโย เถโร อิมา คาถาโย อภาสิตฺถาติฯ
ตีณุปฺปลมาลิยตฺเถรสฺสาปทานํ ตติยํฯ
4. ปฏฺฏิปุปฺผิยตฺเถรอปทานํ
[22]
‘‘ยทา นิพฺพายิ สมฺพุทฺโธ, มเหสี ปทุมุตฺตโร;
สมาคมฺม ชนา สพฺเพ, สรีรํ นีหรนฺติ เตฯ
[23]
‘‘นีหรนฺเต สรีรมฺหิ, วชฺชมานาสุ เภริสุ;
ปสนฺนจิตฺโต สุมโน, ปฏฺฏิปุปฺผํ อปูชยิํฯ
[24]
‘‘สตสหสฺสิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, สรีรปูชิเต ผลํฯ
[25]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[26]
‘‘สฺวาคตํ วต เม อาสิ, มม พุทฺธสฺส [พุทฺธเสฏฺฐสฺส (สี.)] สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[27]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปฏฺฏิปุปฺผิโย เถโร อิมา คาถาโย อภาสิตฺถาติฯ
ปฏฺฏิปุปฺผิยตฺเถรสฺสาปทานํ จตุตฺถํฯ
5. สตฺตปณฺณิยตฺเถรอปทานํ
[28]
‘‘สุมโน นาม สมฺพุทฺโธ, อุปฺปชฺชิ โลกนายโก;
ปสนฺนจิตฺโต สุมโน, สตฺตปณฺณิมปูชยิํฯ
[29]
‘‘สตสหสฺสิโต กปฺเป, สตฺตปณฺณิมปูชยิํ;
ทุคฺคติํ นาภิชานามิ, สตฺตปณฺณิปูชายิทํ [สตฺตปณฺณิสฺสิทํ (สี.)] ผลํฯ
[30]