เมนู

1. โพธิวนฺทกตฺเถรอปทานํ

[1]

‘‘ปาฏลิํ หริตํ ทิสฺวา, ปาทปํ ธรณีรุหํ;

เอกํสํ อญฺชลิํ กตฺวา, อวนฺทิํ ปาฏลิํ อหํฯ

[2]

‘‘อญฺชลิํ ปคฺคเหตฺวาน, ครุํ กตฺวาน มานสํ;

อนฺโตสุทฺธํ พหิสุทฺธํ, สุวิมุตฺตมนาสวํฯ

[3]

‘‘วิปสฺสิํ โลกมหิตํ, กรุณาญาณสาครํ;

สมฺมุขา วิย สมฺพุทฺธํ, อวนฺทิํ ปาฏลิํ อหํฯ

[4]

‘‘เอกนวุติโต กปฺเป, ยํ โพธิมภิวนฺทหํ;

ทุคฺคติํ นาภิชานามิ, วนฺทนาย อิทํ ผลํฯ

[5]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา โพธิวนฺทโก เถโร อิมา คาถาโย อภาสิตฺถาติฯ

โพธิวนฺทกตฺเถรสฺสาปทานํ ปฐมํฯ

2. ปาฏลิปุปฺผิยตฺเถรอปทานํ

[6]

‘‘วิปสฺสี นาม ภควา, สยมฺภู อคฺคปุคฺคโล;

ปุรกฺขโต สสิสฺเสหิ, ปาวิสิ พนฺธุมํ ชิโนฯ

[7]

‘‘ตีณิ ปาฏลิปุปฺผานิ, อุจฺฉงฺเค ฐปิตานิ เม;

สีสํ นฺหายิตุกาโมว, นทีติตฺถํ อคจฺฉหํฯ

[8]

‘‘นิกฺขมฺม พนฺธุมติยา, อทฺทสํ โลกนายกํ;

อินฺทีวรํว ชลิตํ, อาทิตฺตํว หุตาสนํฯ

[9]

‘‘พฺยคฺฆูสภํว ปวรํ, อภิชาตํว เกสริํ;

คจฺฉนฺตํ สมณานคฺคํ, ภิกฺขุสงฺฆปุรกฺขตํฯ

[10]

‘‘ตสฺมิํ ปสนฺโน [สมเณ (ก.)] สุคเต, กิเลสมลโธวเน;

คเหตฺวา ตีณิ ปุปฺผานิ, พุทฺธเสฏฺฐํ อปูชยิํฯ

[11]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[12]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปาฏลิปุปฺผิโย เถโร อิมา คาถาโย อภาสิตฺถาติฯ

ปาฏลิปุปฺผิยตฺเถรสฺสาปทานํ ทุติยํฯ

3. ตีณุปฺปลมาลิยตฺเถรอปทานํ

[13]

‘‘จนฺทภาคานทีตีเร , อโหสิํ วานโร ตทา;

อทฺทสํ วิรชํ พุทฺธํ, นิสินฺนํ ปพฺพตนฺตเรฯ

[14]

‘‘โอภาเสนฺตํ ทิสา สพฺพา, สาลราชํว ผุลฺลิตํ;

ลกฺขณพฺยญฺชนูเปตํ, ทิสฺวานตฺตมโน อหํฯ

[15]

‘‘อุทคฺคจิตฺโต สุมโน, ปีติยา หฏฺฐมานโส;

ตีณิ อุปฺปลปุปฺผานิ, มตฺถเก อภิโรปยิํฯ

[16]

‘‘ปูชยิตฺวาน ปุปฺผานิ, ผุสฺสสฺสาหํ มเหสิโน;

สคารโว ภวิตฺวาน, ปกฺกามิํ อุตฺตรามุโขฯ

[17]

‘‘คจฺฉนฺโต ปฏิกุฏิโก, วิปฺปสนฺเนน เจตสา;

เสลนฺตเร ปติตฺวาน, ปาปุณิํ ชีวิตกฺขยํฯ

[18]

‘‘เตน กมฺเมน สุกเตน, เจตนาปณิธีหิ จ;

ชหิตฺวา ปุริมํ ชาติํ, ตาวติํสมคจฺฉหํฯ

[19]

‘‘สตานํ ตีณิกฺขตฺตุญฺจ, เทวรชฺชมการยิํ;

สตานํ ปญฺจกฺขตฺตุญฺจ, จกฺกวตฺตี อโหสหํฯ

[20]

‘‘ทฺเวนวุเต อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[21]