3. ภิสมุฬาลทายกตฺเถรอปทานํ
[8]
‘‘ผุสฺโส นามาสิ สมฺพุทฺโธ, สพฺพธมฺมาน ปารคู;
วิเวกกาโม สพฺพญฺญู [สปฺปญฺโญ (สี. สฺยา.)], อาคญฺฉิ มม สนฺติเกฯ
[9]
‘‘ตสฺมิํ จิตฺตํ ปสาเทตฺวา, มหาการุณิเก ชิเน;
ภิสมุฬาลํ ปคฺคยฺห, พุทฺธเสฏฺฐสฺสทาสหํฯ
[10]
‘‘ทฺเวนวุเต อิโต กปฺเป, ยํ ภิสมททิํ ตทา;
ทุคฺคติํ นาภิชานามิ, ภิสทานสฺสิทํ ผลํฯ
[11]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ภิสมุฬาลทายโก เถโร อิมา คาถาโย อภาสิตฺถาติฯ
ภิสมุฬาลทายกตฺเถรสฺสาปทานํ ตติยํฯ
4. เกสรปุปฺผิยตฺเถรอปทานํ
[12]
‘‘วิชฺชาธโร ตทา อาสิํ, หิมวนฺตมฺหิ ปพฺพเต;
อทฺทสํ วิรชํ พุทฺธํ, จงฺกมนฺตํ มหายสํฯ
[13]
‘‘ตีณิ เกสรปุปฺผานิ [เกสริปุปฺผานิ (สี.)], สีเส กตฺวานหํ ตทา;
อุปสงฺกมฺม สมฺพุทฺธํ, เวสฺสภุํ อภิปูชยิํฯ
[14]
‘‘เอกตฺติํเส อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[15]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เกสรปุปฺผิโย เถโร อิมา คาถาโย อภาสิตฺถาติฯ
เกสรปุปฺผิยตฺเถรสฺสาปทานํ จตุตฺถํฯ
5. องฺโกลปุปฺผิยตฺเถรอปทานํ
[16]
‘‘ปทุโม นาม สมฺพุทฺโธ, จิตฺตกูเฏ วสี ตทา;
ทิสฺวาน ตํ อหํ พุทฺธํ, สยมฺภุํ อปราชิตํ [อุปคจฺฉิหํ (สี. สฺยา.)]ฯ
[17]
‘‘องฺโกลํ ปุปฺผิตํ ทิสฺวา, โอจินิตฺวานหํ ตทา;
อุปคนฺตฺวาน สมฺพุทฺธํ, ปูชยิํ ปทุมํ ชินํฯ
[18]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา องฺโกลปุปฺผิโย เถโร อิมา คาถาโย อภาสิตฺถาติฯ
องฺโกลปุปฺผิยตฺเถรสฺสาปทานํ ปญฺจมํฯ
6. กทมฺพปุปฺผิยตฺเถรอปทานํ
[20]
‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;
กญฺจนคฺฆิยสงฺกาสํ, พาตฺติํสวรลกฺขณํฯ
[21]
‘‘นิสชฺช ปาสาทวเร, อทฺทสํ โลกนายกํ;
กทมฺพปุปฺผํ ปคฺคยฺห, วิปสฺสิํ อภิปูชยิํฯ
[22]
‘‘เอกนวุติโต กปฺเป, ยํ พุทฺธมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กทมฺพปุปฺผิโย เถโร อิมา คาถาโย อภาสิตฺถาติฯ
กทมฺพปุปฺผิยตฺเถรสฺสาปทานํ ฉฏฺฐํฯ
7. อุทฺทาลกปุปฺผิยตฺเถรอปทานํ
[24]
‘‘อโนโม [สุชาโต (สฺยา.), อนุโม (ก.)] นาม สมฺพุทฺโธ, คงฺคากูเล วสี ตทา;
อุทฺทาลกํ คเหตฺวาน, ปูชยิํ อปราชิตํฯ
[25]