1. มนฺทารวปุปฺผิยตฺเถรอปทานํ

[1]

‘‘ตาวติํสา อิธาคนฺตฺวา, มงฺคโล นาม มาณโว;

มนฺทารวํ คเหตฺวาน, วิปสฺสิสฺส มเหสิโนฯ

[2]

‘‘สมาธินา นิสินฺนสฺส, มตฺถเก ธารยิํ อหํ;

สตฺตาหํ ธารยิตฺวาน, เทวโลกํ ปุนาคมิํฯ

[3]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[4]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา มนฺทารวปุปฺผิโย เถโร อิมา คาถาโย อภาสิตฺถาติฯ

มนฺทารวปุปฺผิยตฺเถรสฺสาปทานํ ปฐมํฯ

2. กกฺการุปุปฺผิยตฺเถรอปทานํ

[5]

‘‘ยามา เทวา อิธาคนฺตฺวา, โคตมํ สิริวจฺฉสํ;

กกฺการุมาลํ [โคกฺขนุมาลํ (สี.)] ปคฺคยฺห, พุทฺธสฺส อภิโรปยิํฯ

[6]

‘‘ทฺเวนวุเต อิโต กปฺเป, ยํ พุทฺธมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[7]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา กกฺการุปุปฺผิโย [โคกฺขนุปุปฺผิโย (ก.)] เถโร อิมา คาถาโย อภาสิตฺถาติฯ

กกฺการุปุปฺผิยตฺเถรสฺสาปทานํ ทุติยํฯ

3. ภิสมุฬาลทายกตฺเถรอปทานํ

[8]

‘‘ผุสฺโส นามาสิ สมฺพุทฺโธ, สพฺพธมฺมาน ปารคู;

วิเวกกาโม สพฺพญฺญู [สปฺปญฺโญ (สี. สฺยา.)], อาคญฺฉิ มม สนฺติเกฯ

[9]

‘‘ตสฺมิํ จิตฺตํ ปสาเทตฺวา, มหาการุณิเก ชิเน;

ภิสมุฬาลํ ปคฺคยฺห, พุทฺธเสฏฺฐสฺสทาสหํฯ

[10]

‘‘ทฺเวนวุเต อิโต กปฺเป, ยํ ภิสมททิํ ตทา;

ทุคฺคติํ นาภิชานามิ, ภิสทานสฺสิทํ ผลํฯ

[11]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภิสมุฬาลทายโก เถโร อิมา คาถาโย อภาสิตฺถาติฯ

ภิสมุฬาลทายกตฺเถรสฺสาปทานํ ตติยํฯ

4. เกสรปุปฺผิยตฺเถรอปทานํ

[12]

‘‘วิชฺชาธโร ตทา อาสิํ, หิมวนฺตมฺหิ ปพฺพเต;

อทฺทสํ วิรชํ พุทฺธํ, จงฺกมนฺตํ มหายสํฯ

[13]

‘‘ตีณิ เกสรปุปฺผานิ [เกสริปุปฺผานิ (สี.)], สีเส กตฺวานหํ ตทา;

อุปสงฺกมฺม สมฺพุทฺธํ, เวสฺสภุํ อภิปูชยิํฯ

[14]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[15]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เกสรปุปฺผิโย เถโร อิมา คาถาโย อภาสิตฺถาติฯ

เกสรปุปฺผิยตฺเถรสฺสาปทานํ จตุตฺถํฯ

5. องฺโกลปุปฺผิยตฺเถรอปทานํ

[16]

‘‘ปทุโม นาม สมฺพุทฺโธ, จิตฺตกูเฏ วสี ตทา;

ทิสฺวาน ตํ อหํ พุทฺธํ, สยมฺภุํ อปราชิตํ [อุปคจฺฉิหํ (สี. สฺยา.)]ฯ

[17]