‘‘ตโต ปตีโต สุมโน, พุทฺธเสฏฺฐสฺส ตาทิโน;
โลณสุปุฏกํ ทตฺวา, กปฺปํ สคฺคมฺหิ โมทหํฯ
[28]
‘‘เอกนวุติโต กปฺเป, ยํ ปุฏกมทาสหํ;
ทุคฺคติํ นาภิชานามิ, ปุฏกสฺส อิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุปุฏกปูชโก เถโร อิมา คาถาโย อภาสิตฺถาติฯ
สุปุฏกปูชกตฺเถรสฺสาปทานํ สตฺตมํฯ
8. มญฺจทายกตฺเถรอปทานํ
[30]
‘‘วิปสฺสิโน ภควโต, โลกเชฏฺฐสฺส ตาทิโน;
เอกํ มญฺจํ มยา ทินฺนํ, ปสนฺเนน สปาณินาฯ
[31]
‘‘หตฺถิยานํ อสฺสยานํ, ทิพฺพยานํ สมชฺฌคํ;
เตน มญฺจกทาเนน, ปตฺโตมฺหิ อาสวกฺขยํฯ
[32]
‘‘เอกนวุติโต กปฺเป, ยํ มญฺจมททิํ ตทา;
ทุคฺคติํ นาภิชานามิ, มญฺจทานสฺสิทํ ผลํฯ
[33]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มญฺจทายโก เถโร อิมา คาถาโย อภาสิตฺถาติฯ
มญฺจทายกตฺเถรสฺสาปทานํ อฏฺฐมํฯ
9. สรณคมนิยตฺเถรอปทานํ
[34]
‘‘อารุหิมฺห ตทา นาวํ, ภิกฺขุ จาชีวโก จหํ;
นาวาย ภิชฺชมานาย, ภิกฺขุ เม สรณํ อทาฯ
[35]
‘‘เอกตฺติํเส อิโต กปฺเป, ยญฺจ เม สรณํ อทา;
ทุคฺคติํ นาภิชานามิ, สรณาคมเน ผลํฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สรณคมนิโย เถโร อิมา คาถาโย อภาสิตฺถาติฯ
สรณคมนิยตฺเถรสฺสาปทานํ นวมํฯ
10. ปิณฺฑปาติกตฺเถรอปทานํ
[37]
‘‘ติสฺโส นามาสิ สมฺพุทฺโธ, วิหาสิ วิปิเน ตทา;
ตุสิตา หิ อิธาคนฺตฺวา, ปิณฺฑปาตํ อทาสหํฯ
[38]
‘‘สมฺพุทฺธมภิวาเทตฺวา, ติสฺสํ นาม มหายสํ;
สกํ จิตฺตํ ปสาเทตฺวา, ตุสิตํ อคมาสหํฯ
[39]
‘‘ทฺเวนวุเต อิโต กปฺเป, ยํ ทานมททิํ ตทา;
ทุคฺคติํ นาภิชานามิ, ปิณฺฑปาตสฺสิทํ ผลํฯ
[40]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปิณฺฑปาติโก เถโร อิมา คาถาโย อภาสิตฺถาติฯ
ปิณฺฑปาติกตฺเถรสฺสาปทานํ ทสมํฯ
สทฺทสญฺญกวคฺโค ฉตฺติํสติโมฯ
ตสฺสุทฺทานํ –
สทฺทสญฺญี ยวสิโก, กิํสุโกรณฺฑปุปฺผิโย;
อาลมฺพโน อมฺพยาคุ, สุปุฏี มญฺจทายโก;
สรณํ ปิณฺฑปาโต จ, คาถา ตาลีสเมว จฯ
37. มนฺทารวปุปฺผิยวคฺโค