5. ทณฺฑทายกตฺเถรอปทานํ
[18]
‘‘กานนํ วนโมคยฺห, เวฬุํ เฉตฺวานหํ ตทา;
อาลมฺพนํ กริตฺวาน, สงฺฆสฺส อททํ อหํฯ
[19]
‘‘เตน จิตฺตปฺปสาเทน, สุพฺพเต อภิวาทิย;
อาลมฺพนมฺปิ ทตฺวาน, ปกฺกามิํ อุตฺตรามุโขฯ
[20]
‘‘จตุนฺนวุติโต กปฺเป, ยํ ทณฺฑมททิํ ตทา;
ทุคฺคติํ นาภิชานามิ, ทณฺฑทานสฺสิทํ ผลํฯ
[21]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ทณฺฑทายโก เถโร อิมา คาถาโย อภาสิตฺถาติฯ
ทณฺฑทายกตฺเถรสฺสาปทานํ ปญฺจมํฯ
6. อมฺพยาคุทายกตฺเถรอปทานํ
[22]
‘‘สตรํสี นาม สมฺพุทฺโธ, สยมฺภู อปราชิโต;
วุฏฺฐหิตฺวา สมาธิมฺหา, ภิกฺขาย มมุปาคมิฯ
[23]
‘‘ปจฺเจกพุทฺธํ ทิสฺวาน, อมฺพยาคุํ อทาสหํ;
วิปฺปสนฺนมนํ ตสฺส, วิปฺปสนฺเนน เจตสาฯ
[24]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, อมฺพยาคุยิทํ ผลํฯ
[25]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อมฺพยาคุทายโก เถโร อิมา คาถาโย อภาสิตฺถาติฯ
อมฺพยาคุทายกตฺเถรสฺสาปทานํ ฉฏฺฐํฯ
7. สุปุฏกปูชกตฺเถรอปทานํ
[26]
‘‘ทิวาวิหารา นิกฺขนฺโต, วิปสฺสี โลกนายโก;
ภิกฺขาย วิจรนฺโต โส, มม สนฺติกุปาคมิฯ
[27]
‘‘ตโต ปตีโต สุมโน, พุทฺธเสฏฺฐสฺส ตาทิโน;
โลณสุปุฏกํ ทตฺวา, กปฺปํ สคฺคมฺหิ โมทหํฯ
[28]
‘‘เอกนวุติโต กปฺเป, ยํ ปุฏกมทาสหํ;
ทุคฺคติํ นาภิชานามิ, ปุฏกสฺส อิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุปุฏกปูชโก เถโร อิมา คาถาโย อภาสิตฺถาติฯ
สุปุฏกปูชกตฺเถรสฺสาปทานํ สตฺตมํฯ
8. มญฺจทายกตฺเถรอปทานํ
[30]
‘‘วิปสฺสิโน ภควโต, โลกเชฏฺฐสฺส ตาทิโน;
เอกํ มญฺจํ มยา ทินฺนํ, ปสนฺเนน สปาณินาฯ
[31]
‘‘หตฺถิยานํ อสฺสยานํ, ทิพฺพยานํ สมชฺฌคํ;
เตน มญฺจกทาเนน, ปตฺโตมฺหิ อาสวกฺขยํฯ
[32]
‘‘เอกนวุติโต กปฺเป, ยํ มญฺจมททิํ ตทา;
ทุคฺคติํ นาภิชานามิ, มญฺจทานสฺสิทํ ผลํฯ
[33]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มญฺจทายโก เถโร อิมา คาถาโย อภาสิตฺถาติฯ
มญฺจทายกตฺเถรสฺสาปทานํ อฏฺฐมํฯ
9. สรณคมนิยตฺเถรอปทานํ
[34]
‘‘อารุหิมฺห ตทา นาวํ, ภิกฺขุ จาชีวโก จหํ;
นาวาย ภิชฺชมานาย, ภิกฺขุ เม สรณํ อทาฯ
[35]
‘‘เอกตฺติํเส อิโต กปฺเป, ยญฺจ เม สรณํ อทา;
ทุคฺคติํ นาภิชานามิ, สรณาคมเน ผลํฯ
[36]