‘‘มิคลุทฺโท ตทา อาสิํ, อรญฺเญ กานเน อหํ;
ทิสฺวาน ตํ เทวเทวํ, สยมฺภุํ อปราชิตํฯ
[50]
‘‘วิปฺปสนฺเนน จิตฺเตน, ตทา ตสฺส มเหสิโน;
นิสีทนตฺถํ พุทฺธสฺส, ติณมุฏฺฐิมทาสหํฯ
[51]
‘‘ทตฺวาน เทวเทวสฺส, ภิยฺโย จิตฺตํ ปสาทยิํ;
สมฺพุทฺธํ อภิวาเทตฺวา, ปกฺกามิํ อุตฺตรามุโขฯ
[52]
‘‘อจิรํ คตมตฺตํ มํ, มิคราชา อโปถยิ [อเหฐยิ (สี. สฺยา.)];
สีเหน โปถิโต [ปาติโต (สี. สฺยา.)] สนฺโต, ตตฺถ กาลงฺกโต อหํฯ
[53]
‘‘อาสนฺเน เม กตํ กมฺมํ, พุทฺธเสฏฺเฐ อนาสเว;
สุมุตฺโต สรเวโคว, เทวโลกํ อคญฺฉหํฯ
[54]
‘‘ยูโป ตตฺถ สุโภ อาสิ, ปุญฺญกมฺมาภินิมฺมิโต;
สหสฺสกณฺโฑ สตเภณฺฑุ, ธชาลุ หริตามโยฯ
[55]
‘‘ปภา นิทฺธาวเต ตสฺส, สตรํสีว อุคฺคโต;
อากิณฺโณ เทวกญฺญาหิ, อาโมทิํ กามกามหํฯ
[56]
‘‘เทวโลกา จวิตฺวาน, สุกฺกมูเลน โจทิโต;
อาคนฺตฺวาน มนุสฺสตฺตํ, ปตฺโตมฺหิ อาสวกฺขยํฯ
[57]
‘‘จตุนฺนวุติโต กปฺเป, นิสีทนมทาสหํ;
ทุคฺคติํ นาภิชานามิ, ติณมุฏฺฐิยิทํ ผลํฯ
[58]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติณมุฏฺฐิทายโก เถโร อิมา คาถาโย อภาสิตฺถาติฯ
ติณมุฏฺฐิทายกตฺเถรสฺสาปทานํ อฏฺฐมํฯ
9. ตินฺทุกผลทายกตฺเถรอปทานํ
[59]
‘‘กณิการํว โชตนฺตํ, นิสินฺนํ ปพฺพตนฺตเร;
อทฺทสํ วิรชํ พุทฺธํ, โอฆติณฺณมนาสวํฯ
[60]
‘‘ตินฺทุกํ สผลํ ทิสฺวา, ภินฺทิตฺวาน สโกสกํ [สโกฏกํ (สี.), สโกฏิกํ (สฺยา.)];
ปสนฺนจิตฺโต สุมโน, สยมฺภุสฺส มทาสหํ [เวสฺสภุสฺส อทาสหํ (สี.)]ฯ
[61]
‘‘เอกนวุติโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[62]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตินฺทุกผลทายโก เถโร อิมา คาถาโย อภาสิตฺถาติฯ
ตินฺทุกผลทายกตฺเถรสฺสาปทานํ นวมํฯ
10. เอกญฺชลิยตฺเถรอปทานํ
[63]
‘‘โรมโส [เรวโต (สี.)] นาม สมฺพุทฺโธ, นทีกูเล วสี ตทา;
อทฺทสํ วิรชํ พุทฺธํ, ปีตรํสิํว ภาณุมํฯ
[64]
‘‘อุกฺกามุขปหฏฺฐํว , ขทิรงฺคารสนฺนิภํ;
โอสธิํว วิโรจนฺตํ, เอกญฺชลิมกาสหํฯ
[65]
‘‘จตุนฺนวุติโต กปฺเป, ยํ อญฺชลิมกาสหํ;
ทุคฺคติํ นาภิชานามิ, อญฺชลิยา อิทํ ผลํฯ
[66]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกญฺชลิโย เถโร อิมา คาถาโย อภาสิตฺถาติฯ
เอกญฺชลิยตฺเถรสฺสาปทานํ ทสมํฯ
เอกปทุมิยวคฺโค ปญฺจติํสติโมฯ
ตสฺสุทฺทานํ –
ปทุมี อุปฺปลมาลี, ธโช กิงฺกณิกํ นฬํ [กิงฺกณิโก นโฬ (สี.)];
จมฺปโก ปทุโม มุฏฺฐิ, ตินฺทุเกกญฺชลี ตถา;
ฉ จ สฏฺฐิ จ คาถาโย, คณิตาโย วิภาวิภิฯ
36. สทฺทสญฺญกวคฺโค