‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[22]
‘‘สตานํ ตีณิกฺขตฺตุญฺจ, เทวรชฺชํ อการยิํ;
สตานํ ปญฺจกฺขตฺตุญฺจ, จกฺกวตฺตี อโหสหํฯ
[23]
‘‘ปเทสรชฺชํ วิปุลํ, คณนาโต อสงฺขิยํ;
อนุโภมิ สกํ กมฺมํ, ปุพฺเพ สุกตมตฺตโนฯ
[24]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ธชทานสฺสิทํ ผลํฯ
[25]
‘‘อิจฺฉมาโน จหํ อชฺช, สกานนํ สปพฺพตํ;
โขมทุสฺเสน ฉาเทยฺยํ, ตทา มยฺหํ กเต ผลํฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธชทายโก เถโร อิมา คาถาโย อภาสิตฺถาติฯ
ธชทายกตฺเถรสฺสาปทานํ ตติยํฯ
4. ติกิงฺกณิปูชกตฺเถรอปทานํ
[27]
‘‘หิมวนฺตสฺสาวิทูเร, ภูตคโณ นาม ปพฺพโต;
ตตฺถทฺทสํ ปํสุกูลํ, ทุมคฺคมฺหิ วิลคฺคิตํฯ
[28]
‘‘ตีณิ กิงฺกณิปุปฺผานิ, โอจินิตฺวานหํ ตทา;
หฏฺโฐ หฏฺเฐน จิตฺเตน, ปํสุกูลํ อปูชยิํฯ
[29]
‘‘เอกตฺติํเส อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ติณฺณํ ปุปฺผานิทํ ผลํฯ
[30]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติกิงฺกณิปูชโก เถโร อิมา คาถาโย อภาสิตฺถาติฯ
ติกิงฺกณิปูชกตฺเถรสฺสาปทานํ จตุตฺถํฯ
5. นฬาคาริกตฺเถรอปทานํ
[31]
‘‘หิมวนฺตสฺสาวิทูเร , หาริโต นาม ปพฺพโต;
สยมฺภู นารโท นาม, รุกฺขมูเล วสี ตทาฯ
[32]
‘‘นฬาคารํ กริตฺวาน, ติเณน ฉาทยิํ อหํ;
จงฺกมํ โสธยิตฺวาน, สยมฺภุสฺส อทาสหํฯ
[33]
‘‘จตุทฺทสสุ กปฺเปสุ, เทวโลเก รมิํ อหํ;
จตุสตฺตติกฺขตฺตุญฺจ, เทวรชฺชํ อการยิํฯ
[34]
‘‘จตุสตฺตติ [สตฺตสตฺตติ (สี.)] กฺขตฺตุญฺจ , จกฺกวตฺตี อโหสหํ;
ปเทสรชฺชํ วิปุลํ, คณนาโต อสงฺขิยํฯ
[35]
‘‘อุพฺพิทฺธํ ภวนํ มยฺหํ, อินฺทลฏฺฐีว อุคฺคตํ;
สหสฺสถมฺภํ อตุลํ, วิมานํ สปภสฺสรํฯ
[36]
‘‘ทฺเว สมฺปตฺตี อนุโภตฺวา, สุกฺกมูเลน โจทิโต;
โคตมสฺส ภควโต, สาสเน ปพฺพชิํ อหํฯ
[37]
‘‘ปธานปหิตตฺโตมฺหิ , อุปสนฺโต นิรูปธิ;
นาโคว พนฺธนํ เฉตฺวา, วิหรามิ อนาสโวฯ
[38]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นฬาคาริโก เถโร อิมา คาถาโย อภาสิตฺถาติฯ
นฬาคาริกตฺเถรสฺสาปทานํ ปญฺจมํฯ
6. จมฺปกปุปฺผิยตฺเถรอปทานํ
[39]
‘‘หิมวนฺตสฺสาวิทูเร, ชาปโล [จาปโล (สี.), ฉาปโล (สฺยา.)] นาม ปพฺพโต;
พุทฺโธ สุทสฺสโน นาม, วิหาสิ ปพฺพตนฺตเรฯ
[40]
‘‘ปุปฺผํ เหมวนฺตํ [เหมวตํ (สี.), เหมวณฺณํ (สฺยา.)] คยฺห, คจฺฉํ เวหายเสนหํ;
อทฺทสํ วิรชํ พุทฺธํ, โอฆติณฺณมนาสวํฯ
[41]