‘‘‘โกเสยฺยกมฺพลิยานิ [โกเสยฺยกมฺพลียานิ (สี.)], โขมกปฺปาสิกานิ จ;
มหคฺฆานิ จ ทุสฺสานิ, ปฏิลจฺฉติยํ นโรฯ
[104]
‘‘‘มนสา ปตฺถิตํ สพฺพํ, ปฏิลจฺฉติยํ นโร;
เอกทุสฺสสฺส วิปากํ, อนุโภสฺสติ สพฺพทาฯ
[105]
‘‘‘โส ปจฺฉา ปพฺพชิตฺวาน, สุกฺกมูเลน โจทิโต;
โคตมสฺส ภควโต, ธมฺมํ สจฺฉิกริสฺสติ’ฯ
[106]
‘‘อโห เม สุกตํ กมฺมํ, สพฺพญฺญุสฺส มเหสิโน;
เอกาหํ สาฏกํ ทตฺวา, ปตฺโตมฺหิ อมตํ ปทํฯ
[107]
‘‘มณฺฑเป รุกฺขมูเล วา, วสโต สุญฺญเก ฆเร;
ธาเรติ ทุสฺสฉทนํ, สมนฺตา พฺยามโต มมฯ
[108]
‘‘อวิญฺญตฺตํ นิวาเสมิ [อวิญฺญตฺตานิ เสวามิ (?)], จีวรํ ปจฺจยญฺจหํ;
ลาภี [ลาภิมฺหิ (สฺยา.)] อนฺนสฺส ปานสฺส, อุตฺตเรยฺยสฺสิทํ ผลํฯ
[109]
‘‘สตสหสฺสิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, วตฺถทานสฺสิทํ ผลํฯ
[110]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุตฺตเรยฺยทายโก เถโร อิมา คาถาโย อภาสิตฺถาติฯ
อุตฺตเรยฺยทายกตฺเถรสฺสาปทานํ อฏฺฐมํฯ
9. ธมฺมสวนิยตฺเถรอปทานํ
[111]
‘‘ปทุมุตฺตโร นาม ชิโน, สพฺพธมฺมาน ปารคู;
จตุสจฺจํ ปกาเสนฺโต, สนฺตาเรสิ พหุํ ชนํฯ
[112]
‘‘อหํ เตน สมเยน, ชฏิโล อุคฺคตาปโน;
ธุนนฺโต วากจีรานิ, คจฺฉามิ อมฺพเร ตทาฯ
[113]
‘‘พุทฺธเสฏฺฐสฺส อุปริ, คนฺตุํ น วิสหามหํ;
ปกฺขีว เสลมาสชฺช [เสลมาปชฺช (สฺยา.)], คมนํ น ลภามหํฯ
[114]
‘‘น เม อิทํ ภูตปุพฺพํ, อิริยสฺส วิโกปนํ;
ทเก ยถา อุมฺมุชฺชิตฺวา, เอวํ คจฺฉามิ อมฺพเรฯ
[115]
‘‘อุฬารภูโต มนุโช, เหฏฺฐาสีโน [เหฏฺฐาปิ โน (ก.)] ภวิสฺสติ;
หนฺท เมนํ คเวสิสฺสํ, อปิ อตฺถํ ลเภยฺยหํฯ
[116]
‘‘โอโรหนฺโต อนฺตลิกฺขา, สทฺทมสฺโสสิ สตฺถุโน;
อนิจฺจตํ กเถนฺตสฺส, ตมหํ อุคฺคหิํ ตทาฯ
[117]
‘‘อนิจฺจสญฺญมุคฺคยฺห, อคมาสิํ มมสฺสมํ;
ยาวตายุํ วสิตฺวาน, ตตฺถ กาลงฺกโต อหํฯ
[118]
‘‘จริเม วตฺตมานมฺหิ, ตํ ธมฺมสวนํ [ธมฺมสวณํ (สี.)] สริํ;
เตน กมฺเมน สุกเตน, ตาวติํสมคจฺฉหํฯ
[119]
‘‘ติํสกปฺปสหสฺสานิ, เทวโลเก รมิํ อหํ;
เอกปญฺญาสกฺขตฺตุญฺจ, เทวรชฺชมการยิํฯ
[120]
‘‘เอกสตฺตติกฺขตฺตุญฺจ, จกฺกวตฺตี อโหสหํ;
ปเทสรชฺชํ วิปุลํ, คณนาโต อสงฺขิยํฯ
[121]
‘‘ปิตุเคเห นิสีทิตฺวา, สมโณ ภาวิตินฺทฺริโย;
คาถาย ปริทีเปนฺโต, อนิจฺจตมุทาหริ [อนิจฺจวตฺถุทาหริ (สฺยา. ก.)]ฯ
[122]
‘‘อนุสฺสรามิ ตํ สญฺญํ, สํสรนฺโต ภวาภเว;
น โกฏิํ ปฏิวิชฺฌามิ [น โกจิ ปฏิวชฺชามิ (ก.)], นิพฺพานํ อจฺจุตํ ปทํ [อยํ คาถา อุปริ 43 วคฺเค สตฺตมาปทาเน ปุริมคาถาย ปุเรตรํ ทิสฺสติ]ฯ
[123]
‘‘อนิจฺจา วต สงฺขารา, อุปฺปาทวยธมฺมิโน;
อุปฺปชฺชิตฺวา นิรุชฺฌนฺติ, เตสํ วูปสโม สุโขฯ
[124]
‘‘สห คาถํ สุณิตฺวาน, ปุพฺพกมฺมํ อนุสฺสริํ;
เอกาสเน นิสีทิตฺวา, อรหตฺตมปาปุณิํฯ
[125]
‘‘ชาติยา สตฺตวสฺโสหํ, อรหตฺตมปาปุณิํ;
อุปสมฺปาทยิ พุทฺโธ, คุณมญฺญาย จกฺขุมาฯ
[126]
‘‘ทารโกว อหํ สนฺโต, กรณียํ สมาปยิํ;
กิํ เม กรณียํ อชฺช, สกฺยปุตฺตสฺส สาสเนฯ
[127]
‘‘สตสหสฺสิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, สทฺธมฺมสวเน ผลํฯ
[128]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธมฺมสวนิโย เถโร อิมา คาถาโย อภาสิตฺถาติฯ
ธมฺมสวนิยตฺเถรสฺสาปทานํ นวมํฯ
10. อุกฺขิตฺตปทุมิยตฺเถรอปทานํ
[129]
‘‘นคเร หํสวติยา, อโหสิํ มาลิโก ตทา;
โอคาเหตฺวา ปทุมสรํ, สตปตฺตํ โอจินามหํฯ
[130]
‘‘ปทุมุตฺตโร นาม ชิโน, สพฺพธมฺมาน ปารคู;
สห สตสหสฺเสหิ [สตสหสฺสสิสฺเสหิ (ก.)], สนฺตจิตฺเตหิ ตาทิภิฯ
[131]
‘‘ขีณาสเวหิ สุทฺเธหิ, ฉฬภิญฺเญหิ ฌายิภิ [โส ตทา (สี.), โส สห (ก.)];
มม วุทฺธิํ สมนฺเวสํ, อาคจฺฉิ มม สนฺติกํ [มม สนฺติเก (สี.), ปุริสุตฺตโม (สฺยา. ก.)]ฯ
[132]
‘‘ทิสฺวานหํ เทวเทวํ, สยมฺภุํ โลกนายกํ;
วณฺเฏ เฉตฺวา สตปตฺตํ, อุกฺขิปิมมฺพเร ตทาฯ
[133]
‘‘ยทิ พุทฺโธ ตุวํ วีร, โลกเชฏฺโฐ นราสโภ;
สยํ คนฺตฺวา สตปตฺตา, มตฺถเก ธารยนฺตุ เตฯ
[134]
‘‘อธิฏฺฐหิ มหาวีโร, โลกเชฏฺโฐ นราสโภ;
พุทฺธสฺส อานุภาเวน, มตฺถเก ธารยิํสุ เตฯ
[135]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[136]