8. อุตฺตเรยฺยทายกตฺเถรอปทานํ

[90]

‘‘นคเร หํสวติยา, อโหสิํ พฺราหฺมโณ ตทา;

อชฺฌายโก มนฺตธโร, ติณฺณํ เวทาน ปารคูฯ

[91]

‘‘ปุรกฺขโต สสิสฺเสหิ, ชาติมา จ สุสิกฺขิโต;

โตยาภิเสจนตฺถาย, นครา นิกฺขมิํ ตทาฯ

[92]

‘‘ปทุมุตฺตโร นาม ชิโน, สพฺพธมฺมาน ปารคู;

ขีณาสวสหสฺเสหิ, ปาวิสี นครํ ชิโนฯ

[93]

‘‘สุจารุรูปํ ทิสฺวาน, อาเนญฺชการิตํ วิย;

ปริวุตํ อรหนฺเตหิ, ทิสฺวา จิตฺตํ ปสาทยิํฯ

[94]

‘‘สิรสฺมิํ อญฺชลิํ กตฺวา, นมสฺสิตฺวาน สุพฺพตํ;

ปสนฺนจิตฺโต สุมโน, อุตฺตรียมทาสหํฯ

[95]

‘‘อุโภ หตฺเถหิ ปคฺคยฺห, สาฏกํ อุกฺขิปิํ อหํ;

ยาวตา พุทฺธปริสา, ตาว ฉาเทสิ สาฏโกฯ

[96]

‘‘ปิณฺฑจารํ จรนฺตสฺส, มหาภิกฺขุคณาทิโน;

ฉทํ กโรนฺโต อฏฺฐาสิ, หาสยนฺโต มมํ ตทาฯ

[97]

‘‘ฆรโต นิกฺขมนฺตสฺส, สยมฺภู อคฺคปุคฺคโล;

วีถิยํว ฐิโต สตฺถา, อกา เม [อกาสิ (สฺยา.)] อนุโมทนํฯ

[98]

‘‘ปสนฺนจิตฺโต สุมโน, โย เม อทาสิ สาฏกํ;

ตมหํ กิตฺตยิสฺสามิ, สุโณถ มม ภาสโตฯ

[99]

‘‘‘ติํสกปฺปสหสฺสานิ, เทวโลเก รมิสฺสติ;

ปญฺญาสกฺขตฺตุํ เทวินฺโท, เทวรชฺชํ กริสฺสติฯ

[100]

‘‘‘เทวโลเก วสนฺตสฺส, ปุญฺญกมฺมสมงฺคิโน;

สมนฺตา โยชนสตํ, ทุสฺสจฺฉนฺนํ ภวิสฺสติฯ

[101]

‘‘‘ฉตฺติํสกฺขตฺตุํ ราชา จ, จกฺกวตฺตี ภวิสฺสติ;

ปเทสรชฺชํ วิปุลํ, คณนาโต อสงฺขิยํฯ

[102]

‘‘‘ภเว สํสรมานสฺส, ปุญฺญกมฺมสมงฺคิโน;

มนสา ปตฺถิตํ สพฺพํ, นิพฺพตฺติสฺสติ ตาวเทฯ

[103]

‘‘‘โกเสยฺยกมฺพลิยานิ [โกเสยฺยกมฺพลียานิ (สี.)], โขมกปฺปาสิกานิ จ;

มหคฺฆานิ จ ทุสฺสานิ, ปฏิลจฺฉติยํ นโรฯ

[104]

‘‘‘มนสา ปตฺถิตํ สพฺพํ, ปฏิลจฺฉติยํ นโร;

เอกทุสฺสสฺส วิปากํ, อนุโภสฺสติ สพฺพทาฯ

[105]

‘‘‘โส ปจฺฉา ปพฺพชิตฺวาน, สุกฺกมูเลน โจทิโต;

โคตมสฺส ภควโต, ธมฺมํ สจฺฉิกริสฺสติ’ฯ

[106]

‘‘อโห เม สุกตํ กมฺมํ, สพฺพญฺญุสฺส มเหสิโน;

เอกาหํ สาฏกํ ทตฺวา, ปตฺโตมฺหิ อมตํ ปทํฯ

[107]

‘‘มณฺฑเป รุกฺขมูเล วา, วสโต สุญฺญเก ฆเร;

ธาเรติ ทุสฺสฉทนํ, สมนฺตา พฺยามโต มมฯ

[108]

‘‘อวิญฺญตฺตํ นิวาเสมิ [อวิญฺญตฺตานิ เสวามิ (?)], จีวรํ ปจฺจยญฺจหํ;

ลาภี [ลาภิมฺหิ (สฺยา.)] อนฺนสฺส ปานสฺส, อุตฺตเรยฺยสฺสิทํ ผลํฯ

[109]

‘‘สตสหสฺสิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, วตฺถทานสฺสิทํ ผลํฯ

[110]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุตฺตเรยฺยทายโก เถโร อิมา คาถาโย อภาสิตฺถาติฯ

อุตฺตเรยฺยทายกตฺเถรสฺสาปทานํ อฏฺฐมํฯ

9. ธมฺมสวนิยตฺเถรอปทานํ

[111]

‘‘ปทุมุตฺตโร นาม ชิโน, สพฺพธมฺมาน ปารคู;

จตุสจฺจํ ปกาเสนฺโต, สนฺตาเรสิ พหุํ ชนํฯ

[112]

‘‘อหํ เตน สมเยน, ชฏิโล อุคฺคตาปโน;

ธุนนฺโต วากจีรานิ, คจฺฉามิ อมฺพเร ตทาฯ

[113]

‘‘พุทฺธเสฏฺฐสฺส อุปริ, คนฺตุํ น วิสหามหํ;

ปกฺขีว เสลมาสชฺช [เสลมาปชฺช (สฺยา.)], คมนํ น ลภามหํฯ

[114]