‘‘อญฺญมฺปิ เม อจฺฉริยํ, พุทฺธถูปสฺส โสธเน [พุทฺธถูปมฺหิ โสธิเต (สฺยา.)];

นาภิชานามิ เม กาเย, ชาตํ ปิฬกพินฺทุกํฯ

[67]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต [สพฺพตฺถปิ เอวเมว ทิสฺสติ, ตถา อุปริปิ];

ทุเว ภเว สํสรามิ, เทวตฺเต อถ มานุเสฯ

[68]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

สุวณฺณวณฺโณ สพฺพตฺถ, สปฺปภาโส ภวามหํฯ

[69]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

อมนาปํ วิวชฺชติ, มนาปํ อุปติฏฺฐติฯ

[70]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

วิสุทฺธํ โหติ เม จิตฺตํ, เอกคฺคํ สุสมาหิตํฯ

[71]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

เอกาสเน นิสีทิตฺวา, อรหตฺตมปาปุณิํฯ

[72]

‘‘สตสหสฺสิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, โสธนาย อิทํ ผลํฯ

[73]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปภงฺกโร เถโร อิมา คาถาโย อภาสิตฺถาติฯ

ปภงฺกรตฺเถรสฺสาปทานํ ฉฏฺฐํฯ

7. ติณกุฏิทายกตฺเถรอปทานํ

[74]

‘‘นคเร พนฺธุมติยา, อโหสิํ ปรกมฺมิโก;

ปรกมฺมายเน ยุตฺโต, ปรภตฺตํ อปสฺสิโตฯ

[75]

‘‘รโหคโต นิสีทิตฺวา, เอวํ จินฺเตสหํ ตทา;

พุทฺโธ โลเก สมุปฺปนฺโน, อธิกาโร จ นตฺถิ เมฯ

[76]

‘‘กาโล เม คติํ [กาโล คติํ เม (สี. สฺยา.)] โสเธตุํ, ขโณ เม ปฏิปาทิโต;

ทุกฺโข นิรยสมฺผสฺโส, อปุญฺญานญฺหิ ปาณินํฯ

[77]

‘‘เอวาหํ จินฺตยิตฺวาน, กมฺมสามิํ อุปาคมิํ;

เอกาหํ กมฺมํ ยาจิตฺวา, วิปินํ ปาวิสิํ อหํฯ

[78]

‘‘ติณกฏฺฐญฺจ วลฺลิญฺจ, อาหริตฺวานหํ ตทา;

ติทณฺฑเก ฐเปตฺวาน, อกํ ติณกุฏิํ อหํฯ

[79]

‘‘สงฺฆสฺสตฺถาย กุฏิกํ, นิยฺยาเทตฺวาน [นิยฺยาเตตฺวาน (สี.)] ตํ อหํ;

ตทเหเยว อาคนฺตฺวา, กมฺมสามิํ อุปาคมิํฯ

[80]

‘‘เตน กมฺเมน สุกเตน, ตาวติํสมคจฺฉหํ;

ตตฺถ เม สุกตํ พฺยมฺหํ, กุฏิกาย สุนิมฺมิตํ [ติณกุฏิกาย นิมฺมิตํ (สี.)]ฯ

[81]

‘‘สหสฺสกณฺฑํ สตเภณฺฑุ, ธชาลุ หริตามยํ;

สตสหสฺสนิยฺยูหา, พฺยมฺเห ปาตุภวิํสุ เมฯ

[82]

‘‘ยํ ยํ โยนุปปชฺชามิ, เทวตฺตํ อถ มานุสํ;

มม สงฺกปฺปมญฺญาย, ปาสาโท อุปติฏฺฐติฯ

[83]

‘‘ภยํ วา ฉมฺภิตตฺตํ วา, โลมหํโส น วิชฺชติ;

ตาสํ มม น ชานามิ, ติณกุฏิกายิทํ [ติณกุฏิยิทํ (ก.)] ผลํฯ

[84]

‘‘สีหพฺยคฺฆา จ ทีปี จ, อจฺฉโกกตรจฺฉกา [ตรจฺฉโย (สฺยา. ก.)];

สพฺเพ มํ ปริวชฺเชนฺติ, ติณกุฏิกายิทํ ผลํฯ

[85]

‘‘สรีสปา [สิริํสปา (สี. สฺยา.), สริํสปา (ก.)] จ ภูตา จ, อหี กุมฺภณฺฑรกฺขสา;

เตปิ มํ ปริวชฺเชนฺติ, ติณกุฏิกายิทํ ผลํฯ

[86]

‘‘น ปาปสุปินสฺสาปิ, สรามิ ทสฺสนํ มม;

อุปฏฺฐิตา สติ มยฺหํ, ติณกุฏิกายิทํ ผลํฯ

[87]

‘‘ตาเยว ติณกุฏิกาย, อนุโภตฺวาน สมฺปทา;

โคตมสฺส ภควโต, ธมฺมํ สจฺฉิกริํ อหํฯ

[88]

‘‘เอกนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ติณกุฏิกายิทํ ผลํฯ

[89]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติณกุฏิทายโก เถโร อิมา คาถาโย อภาสิตฺถาติฯ

ติณกุฏิทายกตฺเถรสฺสาปทานํ สตฺตมํฯ

8. อุตฺตเรยฺยทายกตฺเถรอปทานํ

[90]

‘‘นคเร หํสวติยา, อโหสิํ พฺราหฺมโณ ตทา;

อชฺฌายโก มนฺตธโร, ติณฺณํ เวทาน ปารคูฯ

[91]

‘‘ปุรกฺขโต สสิสฺเสหิ, ชาติมา จ สุสิกฺขิโต;

โตยาภิเสจนตฺถาย, นครา นิกฺขมิํ ตทาฯ

[92]

‘‘ปทุมุตฺตโร นาม ชิโน, สพฺพธมฺมาน ปารคู;

ขีณาสวสหสฺเสหิ, ปาวิสี นครํ ชิโนฯ

[93]

‘‘สุจารุรูปํ ทิสฺวาน, อาเนญฺชการิตํ วิย;

ปริวุตํ อรหนฺเตหิ, ทิสฺวา จิตฺตํ ปสาทยิํฯ

[94]

‘‘สิรสฺมิํ อญฺชลิํ กตฺวา, นมสฺสิตฺวาน สุพฺพตํ;

ปสนฺนจิตฺโต สุมโน, อุตฺตรียมทาสหํฯ

[95]

‘‘อุโภ หตฺเถหิ ปคฺคยฺห, สาฏกํ อุกฺขิปิํ อหํ;

ยาวตา พุทฺธปริสา, ตาว ฉาเทสิ สาฏโกฯ

[96]

‘‘ปิณฺฑจารํ จรนฺตสฺส, มหาภิกฺขุคณาทิโน;

ฉทํ กโรนฺโต อฏฺฐาสิ, หาสยนฺโต มมํ ตทาฯ

[97]

‘‘ฆรโต นิกฺขมนฺตสฺส, สยมฺภู อคฺคปุคฺคโล;

วีถิยํว ฐิโต สตฺถา, อกา เม [อกาสิ (สฺยา.)] อนุโมทนํฯ

[98]

‘‘ปสนฺนจิตฺโต สุมโน, โย เม อทาสิ สาฏกํ;

ตมหํ กิตฺตยิสฺสามิ, สุโณถ มม ภาสโตฯ

[99]

‘‘‘ติํสกปฺปสหสฺสานิ, เทวโลเก รมิสฺสติ;

ปญฺญาสกฺขตฺตุํ เทวินฺโท, เทวรชฺชํ กริสฺสติฯ

[100]

‘‘‘เทวโลเก วสนฺตสฺส, ปุญฺญกมฺมสมงฺคิโน;

สมนฺตา โยชนสตํ, ทุสฺสจฺฉนฺนํ ภวิสฺสติฯ

[101]

‘‘‘ฉตฺติํสกฺขตฺตุํ ราชา จ, จกฺกวตฺตี ภวิสฺสติ;

ปเทสรชฺชํ วิปุลํ, คณนาโต อสงฺขิยํฯ

[102]

‘‘‘ภเว สํสรมานสฺส, ปุญฺญกมฺมสมงฺคิโน;

มนสา ปตฺถิตํ สพฺพํ, นิพฺพตฺติสฺสติ ตาวเทฯ

[103]