‘‘เตน กมฺเมน ทฺวิปทินฺท, โลกเชฏฺฐ นราสภ;
ปตฺโตมฺหิ อจลํ ฐานํ, หิตฺวา ชยปราชยํฯ
[12]
‘‘สหสฺสราชนาเมน, ตโย จ จกฺกวตฺติโน;
ปญฺจสฏฺฐิกปฺปสเต, จาตุรนฺตา ชนาธิปาฯ
[13]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุทกปูชโก เถโร อิมา คาถาโย อภาสิตฺถาติฯ
อุทกปูชกตฺเถรสฺสาปทานํ ทุติยํฯ
3. ปุนฺนาคปุปฺผิยตฺเถรอปทานํ
[14]
‘‘กานนํ วนโมคยฺห, วสามิ ลุทฺทโก อหํ;
ปุนฺนาคํ ปุปฺผิตํ ทิสฺวา, พุทฺธเสฏฺฐํ อนุสฺสริํฯ
[15]
‘‘ตํ ปุปฺผํ โอจินิตฺวาน, สุคนฺธํ คนฺธิตํ สุภํ;
ถูปํ กตฺวาน ปุลิเน, พุทฺธสฺส อภิโรปยิํฯ
[16]
‘‘ทฺเวนวุเต อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[17]
‘‘เอกมฺหิ นวุเต กปฺเป, เอโก อาสิํ ตโมนุโท;
สตฺตรตนสมฺปนฺโน, จกฺกวตฺตี มหพฺพโลฯ
[18]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุนฺนาคปุปฺผิโย เถโร อิมา คาถาโย อภาสิตฺถาติฯ
ปุนฺนาคปุปฺผิยตฺเถรสฺสาปทานํ ตติยํฯ
4. เอกทุสฺสทายกตฺเถรอปทานํ
[19]
‘‘นคเร หํสวติยา, อโหสิํ ติณหารโก;
ติณหาเรน ชีวามิ, เตน โปเสมิ ทารเกฯ
[20]
‘‘ปทุมุตฺตโร นาม ชิโน, สพฺพธมฺมาน ปารคู;
ตมนฺธการํ นาเสตฺวา, อุปฺปชฺชิ โลกนายโกฯ
[21]
‘‘สเก ฆเร นิสีทิตฺวา, เอวํ จินฺเตสหํ ตทา;
‘พุทฺโธ โลเก สมุปฺปนฺโน, เทยฺยธมฺโม จ นตฺถิ เมฯ
[22]
‘‘‘อิทํ เม สาฏกํ เอกํ, นตฺถิ เม โกจิ ทายโก;
ทุกฺโข นิรยสมฺผสฺโส, โรปยิสฺสามิ ทกฺขิณํ’ฯ
[23]
‘‘เอวาหํ จินฺตยิตฺวาน, สกํ จิตฺตํ ปสาทยิํ;
เอกํ ทุสฺสํ คเหตฺวาน, พุทฺธเสฏฺฐสฺสทาสหํฯ
[24]
‘‘เอกํ ทุสฺสํ ททิตฺวาน, อุกฺกุฏฺฐิํ สมฺปวตฺตยิํ;
ยทิ พุทฺโธ ตุวํ วีร, ตาเรหิ มํ มหามุนิฯ
[25]
‘‘ปทุมุตฺตโร โลกวิทู, อาหุตีนํ ปฏิคฺคโห;
มม ทานํ ปกิตฺเตนฺโต, อกา เม อนุโมทนํฯ
[26]
‘‘‘อิมินา เอกทุสฺเสน, เจตนาปณิธีหิ จ;
กปฺปสตสหสฺสานิ, วินิปาตํ น คจฺฉติฯ
[27]
‘‘‘ฉตฺติํสกฺขตฺตุํ เทวินฺโท, เทวรชฺชํ กริสฺสติ;
เตตฺติํสกฺขตฺตุํ ราชา จ, จกฺกวตฺตี ภวิสฺสติ;
ปเทสรชฺชํ วิปุลํ, คณนาโต อสงฺขิยํฯ
[28]
‘‘‘เทวโลเก มนุสฺเส วา, สํสรนฺโต ตุวํ ภเว;
รูปวา คุณสมฺปนฺโน, อนวกฺกนฺตเทหวา;
อกฺโขภํ อมิตํ ทุสฺสํ, ลภิสฺสสิ ยทิจฺฉกํ’ฯ
[29]
‘‘อิทํ วตฺวาน สมฺพุทฺโธ, ชลชุตฺตมนามโก;
นภํ อพฺภุคฺคมี ธีโร, หํสราชาว อมฺพเรฯ
[30]
‘‘ยํ ยํ โยนุปปชฺชามิ, เทวตฺตํ อถ มานุสํ;
โภเค เม อูนตา นตฺถิ, เอกทุสฺสสฺสิทํ ผลํฯ
[31]
‘‘ปทุทฺธาเร ปทุทฺธาเร, ทุสฺสํ นิพฺพตฺตเต มมํ;
เหฏฺฐา ทุสฺสมฺหิ ติฏฺฐามิ, อุปริ ฉทนํ มมฯ
[32]
‘‘จกฺกวาฬมุปาทาย, สกานนํ สปพฺพตํ;
อิจฺฉมาโน จหํ อชฺช, ทุสฺเสหิ ฉาทเยยฺยหํฯ
[33]
‘‘เตเนว เอกทุสฺเสน, สํสรนฺโต ภวาภเว;
สุวณฺณวณฺโณ หุตฺวาน, สํสรามิ ภวาภเวฯ
[34]
‘‘วิปากํ เอกทุสฺสสฺส, นชฺฌคํ กตฺถจิกฺขยํ;
อยํ เม อนฺติมา ชาติ, วิปจฺจติ อิธาปิ เมฯ
[35]
‘‘สตสหสฺสิโต กปฺเป, ยํ ทุสฺสมททิํ ตทา;
ทุคฺคติํ นาภิชานามิ, เอกทุสฺสสฺสิทํ ผลํฯ
[36]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[37]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกทุสฺสทายโก เถโร อิมา คาถาโย อภาสิตฺถาติฯ
เอกทุสฺสทายกตฺเถรสฺสาปทานํ จตุตฺถํฯ
5. ผุสิตกมฺปิยตฺเถรอปทานํ
[38]
‘‘วิปสฺสี นาม [สพฺพตฺถปิ เอวเมว ทิสฺสติ]
สมฺพุทฺโธ, โลกเชฏฺโฐ นราสโภฯ
ขีณาสเวหิ สหิโต, สงฺฆาราเม วสี ตทาฯ
[39]
‘‘อารามทฺวารา นิกฺขมฺม, วิปสฺสี [สพฺพตฺถปิ เอวเมว ทิสฺสติ] โลกนายโก;
สห สตสหสฺเสหิ, อฏฺฐ [สหสฺสสตสิสฺเสหิ, อฏฺฐ (ก.), อฏฺฐ สตสหสฺเสหิ, สห (?)] ขีณาสเวหิ โสฯ
[40]
‘‘อชิเนน นิวตฺโถหํ, วากจีรธโรปิ จ;
กุสุโมทกมาทาย [กุสุมฺโภทก… (สี. สฺยา.)], สมฺพุทฺธํ อุปสงฺกมิํฯ
[41]
‘‘สกํ จิตฺตํ ปสาเทตฺวา, เวทชาโต กตญฺชลี;
กุสุโมทกมาทาย, พุทฺธมพฺภุกฺกิริํ อหํฯ
[42]
‘‘เตน กมฺเมน สมฺพุทฺโธ, ชลชุตฺตมนามโก [สพฺพตฺถปิ เอวเมว ทิสฺสติ];
มม กมฺมํ ปกิตฺเตตฺวา, อคมา เยน ปตฺถิตํฯ
[43]