‘‘ชลชํ อาหริตฺวาน, สตปตฺตํ มโนรมํ;
ปุปฺผสฺส ฉตฺตํ กตฺวาน, พุทฺธสฺส อภิโรปยิํฯ
[75]
‘‘สิทฺธตฺโถ จ โลกวิทู, อาหุตีนํ ปฏิคฺคโห;
ภิกฺขุสงฺเฆ ฐิโต สตฺถา, อิมํ คาถํ อภาสถฯ
[76]
‘‘‘โย เม จิตฺตํ ปสาเทตฺวา, ปุปฺผจฺฉตฺตํ อธารยิํ;
เตน จิตฺตปฺปสาเทน, ทุคฺคติํ โส น คจฺฉติ’ฯ
[77]
‘‘อิทํ วตฺวาน สมฺพุทฺโธ, สิทฺธตฺโถ โลกนายโก;
อุยฺโยเชตฺวาน ปริสํ, เวหาสํ นภมุคฺคมิฯ
[78]
‘‘วุฏฺฐิเต นรเทวมฺหิ, เสตจฺฉตฺตมฺปิ วุฏฺฐหิ;
ปุรโต พุทฺธเสฏฺฐสฺส, คจฺฉติ ฉตฺตมุตฺตมํฯ
[79]
‘‘จตุนฺนวุติโต กปฺเป, ยํ ฉตฺตํ อภิโรปยิํ;
ทุคฺคติํ นาภิชานามิ, ปุปฺผจฺฉตฺตสฺสิทํ ผลํฯ
[80]
‘‘จตุสตฺตติกปฺปมฺหิ, อฏฺฐ ชลสิขา อหู;
สตฺตรตนสมฺปนฺนา, จกฺกวตฺตี มหพฺพลาฯ
[81]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุปฺผจฺฉตฺติโย เถโร อิมา คาถาโย อภาสิตฺถาติฯ
ปุปฺผจฺฉตฺติยตฺเถรสฺสาปทานํ นวมํฯ
10. สปริวารฉตฺตทายกตฺเถรอปทานํ
[82]
‘‘ปทุมุตฺตโร โลกวิทู, อาหุตีนํ ปฏิคฺคโห;
อากาเส ชลวุฏฺฐีว วสฺสเต [วสฺสติ (สี. สฺยา.), วสฺเสติ (?)] ธมฺมวุฏฺฐิยาฯ
[83]
‘‘ตมทฺทสาสิํ สมฺพุทฺธํ, เทเสนฺตํ อมตํ ปทํ;
สกํ จิตฺตํ ปสาเทตฺวา, อคมาสิํ สกํ ฆรํฯ
[84]
‘‘ฉตฺตํ อลงฺกตํ คยฺห, อุปคจฺฉิํ นรุตฺตมํ;
หฏฺโฐ หฏฺเฐน จิตฺเตน, อากาเส อุกฺขิปิํ อหํฯ
[85]
‘‘สุสงฺคหิตยานํว , ทนฺโตว สาวกุตฺตโม;
อุปคนฺตฺวาน สมฺพุทฺธํ, มตฺถเก สมฺปติฏฺฐหิฯ
[86]
‘‘อนุกมฺปโก การุณิโก, พุทฺโธ โลกคฺคนายโก;
ภิกฺขุสงฺเฆ นิสีทิตฺวา, อิมา คาถา อภาสถฯ
[87]
‘‘‘เยน ฉตฺตมิทํ ทินฺนํ, อลงฺกตํ มโนรมํ;
เตน จิตฺตปฺปสาเทน, ทุคฺคติํ โส น คจฺฉติฯ
[88]
‘‘‘สตฺตกฺขตฺตุญฺจ เทเวสุ, เทวรชฺชํ กริสฺสติ;
พาตฺติํสกฺขตฺตุญฺจ ราชา, จกฺกวตฺตี ภวิสฺสติฯ
[89]
‘‘‘กปฺปสตสหสฺสมฺหิ, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[90]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, นิพฺพายิสฺสตินาสโว’ฯ
[91]
‘‘พุทฺธสฺส คิรมญฺญาย, วาจาสภิมุทีริตํ;
ปสนฺนจิตฺโต สุมโน, ภิยฺโย หาสํ ชเนสหํฯ
[92]
‘‘ชหิตฺวา มานุสํ โยนิํ, ทิพฺพํ โยนิํ [เทวโยนิํ (สี.), ทิพฺพโยนิํ (สฺยา.)] มชฺฌคํ;
วิมานมุตฺตมํ มยฺหํ, อพฺภุคฺคตํ มโนรมํฯ
[93]
‘‘วิมานา นิกฺขมนฺตสฺส, เสตจฺฉตฺตํ ธรียติ;
ตทา สญฺญํ ปฏิลภิํ, ปุพฺพกมฺมสฺสิทํ ผลํฯ
[94]
‘‘เทวโลกา จวิตฺวาน, มนุสฺสตฺตญฺจ อาคมิํ;
ฉตฺติํสกฺขตฺตุํ จกฺกวตฺตี, สตฺตกปฺปสตมฺหิโตฯ
[95]
‘‘ตมฺหา กายา จวิตฺวาน, อาคจฺฉิํ [อคญฺฉิํ (?)] ติทสํ ปุรํ;
สํสริตฺวานุปุพฺเพน, มานุสํ ปุนราคมิํฯ
[96]
‘‘โอกฺกนฺตํ มาตุกุจฺฉิํ มํ, เสตฺตจฺฉตฺตํ อธารยุํ;
ชาติยา สตฺตวสฺโสหํ, ปพฺพชิํ อนคาริยํฯ
[97]
‘‘สุนนฺโท นาม นาเมน, พฺราหฺมโณ มนฺตปารคู;
ผลิกํ ฉตฺตมาทาย, สาวกคฺคสฺส โส ตทาฯ
[98]
‘‘อนุโมทิ มหาวีโร, สาริปุตฺโต มหากถี;
สุตฺวานุโมทนํ ตสฺส, ปุพฺพกมฺมมนุสฺสริํฯ
[99]
‘‘อญฺชลิํ ปคฺคเหตฺวาน, สกํ จิตฺตํ ปสาทยิํ;
สริตฺวา ปุริมํ กมฺมํ, อรหตฺตมปาปุณิํฯ
[100]
‘‘อุฏฺฐาย อาสนา ตมฺหา, สิเร กตฺวาน อญฺชลิํ;
สมฺพุทฺธํ อภิวาเทตฺวา, อิมํ วาจํ อุทีริยิํฯ
[101]
‘‘สตสหสฺสิโต กปฺเป, พุทฺโธ โลเก อนุตฺตโร;
ปทุมุตฺตโร โลกวิทู, อาหุตีนํ ปฏิคฺคโหฯ
[102]
‘‘ตสฺส ฉตฺตํ มยา ทินฺนํ, วิจิตฺตํ สมลงฺกตํ;
อุโภ หตฺเถหิ ปคฺคณฺหิ, สยมฺภู อคฺคปุคฺคโลฯ
[103]
‘‘อโห พุทฺโธ อโห ธมฺโม, อโห โน สตฺถุสมฺปทา;
เอกจฺฉตฺตสฺส ทาเนน, ทุคฺคติํ นุปปชฺชหํฯ
[104]
‘‘กิเลสา ฌาปิตา มยฺหํ, ภวา สพฺเพ สมูหตา;
สพฺพาสเว ปริญฺญาย, วิหรามิ อนาสโวฯ
[105]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สปริวารฉตฺตทายโก เถโร อิมา คาถาโย อภาสิตฺถาติฯ
สปริวารฉตฺตทายกตฺเถรสฺสาปทานํ ทสมํฯ
อุมาปุปฺผิยวคฺโค เตตฺติํสติโมฯ
ตสฺสุทฺทานํ –
อุมาปุปฺผญฺจ ปุลินํ, หาโส ยญฺโญ นิมิตฺตโก;
สํสาวโก นิคฺคุณฺฑี จ, สุมนํ ปุปฺผฉตฺตโก;
สปริวารฉตฺโต จ, คาถา สตฺตสตุตฺตราติฯ
34. คนฺโธทกวคฺโค