7. นิคฺคุณฺฑิปุปฺผิยตฺเถรอปทานํ
[39]
‘‘ยทา เทโว เทวกายา, จวเต อายุสงฺขยา;
ตโย สทฺทา นิจฺฉรนฺติ, เทวานํ อนุโมทตํฯ
[40]
‘‘‘อิโต โภ สุคติํ คจฺฉ, มนุสฺสานํ สหพฺยตํ;
มนุสฺสภูโต สทฺธมฺเม, ลภ สทฺธํ อนุตฺตรํฯ
[41]
‘‘‘สา เต สทฺธา นิวิฏฺฐาสฺส, มูลชาตา ปติฏฺฐิตา;
ยาวชีวํ อสํหีรา, สทฺธมฺเม สุปฺปเวทิเตฯ
[42]
‘‘‘กาเยน กุสลํ กตฺวา, วาจาย กุสลํ พหุํ;
มนสา กุสลํ กตฺวา, อพฺยาปชฺชํ นิรูปธิํฯ
[43]
‘‘‘ตโต โอปธิกํ ปุญฺญํ, กตฺวา ทาเนน ตํ พหุํ;
อญฺเญปิ มจฺเจ สทฺธมฺเม, พฺรหฺมจริเย นิเวสย’ฯ
[44]
‘‘อิมาย อนุกมฺปาย, เทวาเทวํ ยทา วิทู;
จวนฺตํ อนุโมทนฺติ, เอหิ เทว ปุนปฺปุนํ [เทวปุรํ ปุน (สี.)]ฯ
[45]
‘‘สํเวโค เม [สํวิคฺโคหํ (สฺยา.)] ตทา อาสิ, เทวสงฺเฆ สมาคเต;
กํสุ นาม อหํ โยนิํ, คมิสฺสามิ อิโต จุโตฯ
[46]
‘‘มม สํเวคมญฺญาย, สมโณ ภาวิตินฺทฺริโย;
มมุทฺธริตุกาโม โส, อาคจฺฉิ มม สนฺติกํฯ
[47]
‘‘สุมโน นาม นาเมน, ปทุมุตฺตรสาวโก;
อตฺถธมฺมานุสาสิตฺวา, สํเวเชสิ มมํ ตทาฯ
ทฺวาทสมํ ภาณวารํฯ
[48]
‘‘ตสฺสาหํ วจนํ สุตฺวา, พุทฺเธ จิตฺตํ ปสาทยิํ;
ตํ ธีรํ อภิวาเทตฺวา, ตตฺถ กาลํกโต อหํฯ
[49]
‘‘อุปปชฺชิํ ส [อุปปชฺชิสฺสํ (สี.)] ตตฺเถว, สุกฺกมูเลน โจทิโต;
วสนฺโต มาตุกุจฺฉิมฺหิ, ปุน ธาเรติ มาตุยาฯ
[50]
‘‘ตมฺหา กายา จวิตฺวาน, ติทเส อุปปชฺชหํ;
เอตฺถนฺตเร น ปสฺสามิ, โทมนสฺสมหํ ตทาฯ
[51]
‘‘ตาวติํสา จวิตฺวาน, มาตุกุจฺฉิํ สโมกฺกมิํ;
นิกฺขมิตฺวาน กุจฺฉิมฺหา, กณฺหสุกฺกํ อชานหํฯ
[52]
‘‘ชาติยา สตฺตวสฺโสว [ชาติยา สตฺตวสฺเสน (สฺยา.)], อารามํ ปาวิสิํ อหํ;
โคตมสฺส ภควโต, สกฺยปุตฺตสฺส ตาทิโนฯ
[53]
‘‘วิตฺถาริเก [วิตฺถาริเต (สี. ก.)] ปาวจเน, พาหุชญฺญมฺหิ สาสเน;
อทฺทสํ สาสนกเร, ภิกฺขโว ตตฺถ สตฺถุโนฯ
[54]
‘‘สาวตฺถิ นาม นครํ, ราชา ตตฺถาสิ โกสโล;
รเถน นาคยุตฺเตน, อุเปสิ โพธิมุตฺตมํฯ
[55]
‘‘ตสฺสาหํ นาคํ ทิสฺวาน, ปุพฺพกมฺมํ อนุสฺสริํ;
อญฺชลิํ ปคฺคเหตฺวาน, สมยํ อคมาสหํฯ
[56]
‘‘ชาติยา สตฺตวสฺโสว, ปพฺพชิํ อนคาริยํ;
โย โส พุทฺธํ อุปฏฺฐาสิ, อานนฺโท นาม สาวโกฯ
[57]
‘‘คติมา ธิติมา เจว, สติมา จ พหุสฺสุโต;
รญฺโญ จิตฺตํ ปสาเทนฺโต, นิยฺยาเทสิ มหาชุติฯ
[58]
‘‘ตสฺสาหํ ธมฺมํ สุตฺวาน, ปุพฺพกมฺมํ อนุสฺสริํ;
ตตฺเถว ฐิตโก สนฺโต, อรหตฺตมปาปุณิํฯ
[59]
‘‘เอกํสํ จีวรํ กตฺวา, สิเร กตฺวาน อญฺชลิํ;
สมฺพุทฺธํ อภิวาเทตฺวา, อิมํ วาจํ อุทีรยิํฯ
[60]
‘‘‘ปทุมุตฺตรพุทฺธสฺส, ทฺวิปทินฺทสฺส สตฺถุโน;
นิคฺคุณฺฑิปุปฺผํ ปคฺคยฺห, สีหาสเน ฐเปสหํฯ
[61]
‘‘‘เตน กมฺเมน ทฺวิปทินฺท, โลกเชฏฺฐ นราสภ;
ปตฺโตมฺหิ อจลํ ฐานํ, หิตฺวา ชยปราชยํ’ฯ
[62]
‘‘ปญฺจวีสสหสฺสมฺหิ , กปฺปานํ มนุชาธิปา;
อพฺพุทนิรพฺพุทานิ, อฏฺฐฏฺฐาสิํสุ ขตฺติยาฯ
[63]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นิคฺคุณฺฑิปุปฺผิโย เถโร อิมา คาถาโย อภาสิตฺถาติฯ
นิคฺคุณฺฑิปุปฺผิยตฺเถรสฺสาปทานํ สตฺตมํฯ
8. สุมนาเวฬิยตฺเถรอปทานํ
[64]
‘‘เวสฺสภุสฺส ภควโต, โลกเชฏฺฐสฺส ตาทิโน;
สพฺเพ ชนา สมาคมฺม, มหาปูชํ กโรนฺติ เตฯ
[65]
‘‘สุธาย ปิณฺฑํ กตฺวาน, อาเวฬํ สุมนายหํ;
สีหาสนสฺส ปุรโต, อภิโรเปสหํ ตทาฯ
[66]
‘‘สพฺเพ ชนา สมาคมฺม, เปกฺขนฺติ ปุปฺผมุตฺตมํ;
เกนิทํ ปูชิตํ ปุปฺผํ, พุทฺธเสฏฺฐสฺส ตาทิโนฯ
[67]
‘‘เตน จิตฺตปฺปสาเทน, นิมฺมานํ อุปปชฺชหํ;
อนุโภมิ [อนุโภสิํ (สี.)] สกํ กมฺมํ, ปุพฺเพ สุกตมตฺตโนฯ
[68]
‘‘ยํ ยํ โยนุปปชฺชามิ, เทวตฺตํ อถ มานุสํ;
สพฺเพสานํ ปิโย โหมิ, ปุปฺผปูชายิทํ ผลํฯ
[69]
‘‘นาภิชานามิ กาเยน, วาจาย อุท เจตสา;
สํยตานํ ตปสฺสีนํ, กตํ อกฺโกสิตํ มยาฯ
[70]
‘‘เตน สุจริเตนาหํ, จิตฺตสฺส ปณิธีหิ จ;
สพฺเพสํ ปูชิโต โหมิ, อนกฺโกสสฺสิทํ ผลํฯ
[71]
‘‘อิโต เอกาทเส กปฺเป, สหสฺสาโรสิ ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[72]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุมนาเวฬิโย เถโร อิมา คาถาโย อภาสิตฺถาติฯ
สุมนาเวฬิยตฺเถรสฺสาปทานํ อฏฺฐมํฯ
9. ปุปฺผจฺฉตฺติยตฺเถรอปทานํ
[73]
‘‘สิทฺธตฺถสฺส ภควโต, โลกเชฏฺฐสฺส ตาทิโน;
สจฺจํ ปกาสยนฺตสฺส, นิพฺพาเปนฺตสฺส ปาณิโนฯ
[74]