เมนู

‘‘จุลฺลาสีติสหสฺสานิ , ปสู หญฺญนฺติ เม ตทา;

สารถมฺภุปนีตานิ [ตารสฺมีหิ อุปนีตานิ (ก.), สารสฺมิํหิ อุปนีตานิ (สฺยา.)], ยญฺญตฺถาย อุปฏฺฐิตาฯ

[19]

‘‘อุกฺกามุขปหฏฺโฐว , ขทิรงฺคารสนฺนิโภ;

อุทยนฺโตว สูริโย, ปุณฺณมาเยว [ปุณฺณมาเสว (สี.)] จนฺทิมาฯ

[20]

‘‘สิทฺธตฺโถ สพฺพสิทฺธตฺโถ, ติโลกมหิโต หิโต;

อุปคนฺตฺวาน สมฺพุทฺโธ, อิทํ วจนมพฺรวิฯ

[21]

‘‘‘อหิํสา สพฺพปาณีนํ, กุมาร มม รุจฺจติ;

เถยฺยา จ อติจารา จ, มชฺชปานา จ อารติฯ

[22]

‘‘‘รติ จ สมจริยาย, พาหุสจฺจํ กตญฺญุตา;

ทิฏฺเฐ ธมฺเม ปรตฺถ จ, ธมฺมา เอเต ปสํสิยาฯ

[23]

‘‘‘เอเต ธมฺเม ภาวยิตฺวา, สพฺพสตฺตหิเต รโต [หิเตสิโต (ก.)];

พุทฺเธ จิตฺตํ ปสาเทตฺวา, ภาเวหิ มคฺคมุตฺตมํ’ฯ

[24]

‘‘อิทํ วตฺวาน สพฺพญฺญู, โลกเชฏฺโฐ นราสโภ;

มเมวํ อนุสาสิตฺวา, เวหาสํ อุคฺคโต คโตฯ

[25]

‘‘ปุพฺเพ จิตฺตํ วิโสเธตฺวา, ปจฺฉา จิตฺตํ ปสาทยิํ;

เตน จิตฺตปฺปสาเทน, ตุสิตํ อุปปชฺชหํฯ

[26]

‘‘จตุนฺนวุติโต กปฺเป, ยทา จิตฺตํ ปสาทยิํ;

ทุคฺคติํ นาภิชานามิ, พุทฺธสญฺญายิทํ ผลํฯ

[27]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ยญฺญสามิโก เถโร อิมา คาถาโย อภาสิตฺถาติฯ

ยญฺญสามิกตฺเถรสฺสาปทานํ จตุตฺถํฯ

5. นิมิตฺตสญฺญกตฺเถรอปทานํ

[28]

‘‘จนฺทภาคานทีตีเร , วสามิ อสฺสเม อหํ;

สุวณฺณมิคมทฺทกฺขิํ, จรนฺตํ วิปิเน อหํฯ

[29]

‘‘มิเค จิตฺตํ ปสาเทตฺวา, โลกเชฏฺฐํ อนุสฺสริํ;

เตน จิตฺตปฺปสาเทน, อญฺเญ พุทฺเธ อนุสฺสริํฯ

[30]

‘‘อพฺภตีตา จ เย พุทฺธา, วตฺตมานา อนาคตา;

เอวเมวํ วิโรจนฺติ, มิคราชาว เต ตโยฯ

[31]

‘‘จตุนฺนวุติโต กปฺเป, ยํ สญฺญมลภิํ ตทา;

ทุคฺคติํ นาภิชานามิ, พุทฺธสญฺญายิทํ ผลํฯ

[32]

‘‘สตฺตวีเส อิโต กปฺเป, เอโก อาสิํ มหีปติ;

อรญฺญสตฺโถ นาเมน, จกฺกวตฺตี มหพฺพโลฯ

[33]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นิมิตฺตสญฺญโก เถโร อิมา คาถาโย อภาสิตฺถาติฯ

นิมิตฺตสญฺญกตฺเถรสฺสาปทานํ ปญฺจมํฯ

6. อนฺนสํสาวกตฺเถรอปทานํ

[34]

‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;

กญฺจนคฺฆิยสงฺกาสํ, พาตฺติํสวรลกฺขณํฯ

[35]

‘‘สิทฺธตฺถํ สพฺพสิทฺธตฺถํ, อเนชํ อปราชิตํ;

สมฺพุทฺธํ อตินาเมตฺวา, โภชยิํ ตํ มหามุนิํฯ

[36]

‘‘มุนิ การุณิโก โลเก, โอภาสยิ มมํ ตทา;

พุทฺเธ จิตฺตํ ปสาเทตฺวา, กปฺปํ สคฺคมฺหิ โมทหํฯ

[37]

‘‘จตุนฺนวุติโต กปฺเป, ยํ ทานมททิํ ตทา;

ทุคฺคติํ นาภิชานามิ, ภิกฺขาทานสฺสิทํ ผลํฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อนฺนสํสาวโก เถโร อิมา คาถาโย อภาสิตฺถาติ;

อนฺนสํสาวกตฺเถรสฺสาปทานํ ฉฏฺฐํฯ