‘‘ตโต อุปฑฺฒปุลินํ, วิปฺปสนฺเนน เจตสา;
ทิวาวิหาเร โอสิญฺจิํ, ทฺวิปทินฺทสฺส ตาทิโนฯ
[11]
‘‘เอกนวุติโต กปฺเป, ปุลินํ ยมสิญฺจหํ;
ทุคฺคติํ นาภิชานามิ, ปุลินสฺส อิทํ ผลํฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุลินปูชโก เถโร อิมา คาถาโย อภาสิตฺถาติฯ
ปุลินปูชกตฺเถรสฺสาปทานํ ทุติยํฯ
3. หาสชนกตฺเถรอปทานํ
[13]
‘‘ทุมคฺเค ปํสุกูลกํ [ปํสุกูลิกํ (สฺยา. ก.)], ลคฺคํ ทิสฺวาน สตฺถุโน;
อญฺชลิํ ปคฺคเหตฺวาน, ภิยฺโย อุจฺจาริตํ มยาฯ
[14]
‘‘ทูรโต ปน ทิสฺวาน [ปติทิสฺวาน (สี. สฺยา.)], หาโส เม อุทปชฺชถ;
อญฺชลิํ ปคฺคเหตฺวาน, ภิยฺโย จิตฺตํ ปสาทยิํฯ
[15]
‘‘เอกนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธสญฺญายิทํ ผลํฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา หาสชนโก เถโร อิมา คาถาโย อภาสิตฺถาติฯ
หาสชนกตฺเถรสฺสาปทานํ ตติยํฯ
4. ยญฺญสามิกตฺเถรอปทานํ
[17]
‘‘ชาติยา สตฺตวสฺโสหํ, อโหสิํ มนฺตปารคู;
กุลวตฺตํ [กุลวํสํ (สี. สฺยา.)] อธาเรสิํ, ยญฺโญ อุสฺสาหิโต มยาฯ
[18]
‘‘จุลฺลาสีติสหสฺสานิ , ปสู หญฺญนฺติ เม ตทา;
สารถมฺภุปนีตานิ [ตารสฺมีหิ อุปนีตานิ (ก.), สารสฺมิํหิ อุปนีตานิ (สฺยา.)], ยญฺญตฺถาย อุปฏฺฐิตาฯ
[19]
‘‘อุกฺกามุขปหฏฺโฐว , ขทิรงฺคารสนฺนิโภ;
อุทยนฺโตว สูริโย, ปุณฺณมาเยว [ปุณฺณมาเสว (สี.)] จนฺทิมาฯ
[20]
‘‘สิทฺธตฺโถ สพฺพสิทฺธตฺโถ, ติโลกมหิโต หิโต;
อุปคนฺตฺวาน สมฺพุทฺโธ, อิทํ วจนมพฺรวิฯ
[21]
‘‘‘อหิํสา สพฺพปาณีนํ, กุมาร มม รุจฺจติ;
เถยฺยา จ อติจารา จ, มชฺชปานา จ อารติฯ
[22]
‘‘‘รติ จ สมจริยาย, พาหุสจฺจํ กตญฺญุตา;
ทิฏฺเฐ ธมฺเม ปรตฺถ จ, ธมฺมา เอเต ปสํสิยาฯ
[23]
‘‘‘เอเต ธมฺเม ภาวยิตฺวา, สพฺพสตฺตหิเต รโต [หิเตสิโต (ก.)];
พุทฺเธ จิตฺตํ ปสาเทตฺวา, ภาเวหิ มคฺคมุตฺตมํ’ฯ
[24]
‘‘อิทํ วตฺวาน สพฺพญฺญู, โลกเชฏฺโฐ นราสโภ;
มเมวํ อนุสาสิตฺวา, เวหาสํ อุคฺคโต คโตฯ
[25]
‘‘ปุพฺเพ จิตฺตํ วิโสเธตฺวา, ปจฺฉา จิตฺตํ ปสาทยิํ;
เตน จิตฺตปฺปสาเทน, ตุสิตํ อุปปชฺชหํฯ
[26]
‘‘จตุนฺนวุติโต กปฺเป, ยทา จิตฺตํ ปสาทยิํ;
ทุคฺคติํ นาภิชานามิ, พุทฺธสญฺญายิทํ ผลํฯ
[27]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ยญฺญสามิโก เถโร อิมา คาถาโย อภาสิตฺถาติฯ
ยญฺญสามิกตฺเถรสฺสาปทานํ จตุตฺถํฯ
5. นิมิตฺตสญฺญกตฺเถรอปทานํ
[28]
‘‘จนฺทภาคานทีตีเร , วสามิ อสฺสเม อหํ;
สุวณฺณมิคมทฺทกฺขิํ, จรนฺตํ วิปิเน อหํฯ
[29]