‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สตฺตปทุมิโย เถโร อิมา คาถาโย อภาสิตฺถาติฯ
สตฺตปทุมิยตฺเถรสฺสาปทานํ จตุตฺถํฯ
5. ปุปฺผาสนทายกตฺเถรอปทานํ
[20]
‘‘สุวณฺณวณฺณํ สมฺพุทฺธํ, ปีตรํสิํว [สตรํสิํว (สี. สฺยา.)] ภาณุมํ;
อวิทูเรน คจฺฉนฺตํ, สิทฺธตฺถํ อปราชิตํฯ
[21]
‘‘ตสฺส ปจฺจุคฺคมิตฺวาน, ปเวเสตฺวาน อสฺสมํ;
ปุปฺผาสนํ มยา ทินฺนํ, วิปฺปสนฺเนน เจตสาฯ
[22]
‘‘อญฺชลิํ ปคฺคเหตฺวาน, เวทชาโต ตทา อหํ;
พุทฺเธ จิตฺตํ ปสาเทตฺวา, ตํ กมฺมํ ปริณามยิํฯ
[23]
‘‘ยํ เม อตฺถิ กตํ ปุญฺญํ, สยมฺภุมฺหปราชิเต;
สพฺเพน เตน กุสเลน, วิมโล โหมิ สาสเนฯ
[24]
‘‘จตุนฺนวุติโต กปฺเป, ปุปฺผาสนมทํ ตทา;
ทุคฺคติํ นาภิชานามิ, ปุปฺผาสนสฺสิทํ ผลํฯ
[25]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุปฺผาสนทายโก เถโร อิมา คาถาโย อภาสิตฺถาติฯ
ปุปฺผาสนทายกตฺเถรสฺสาปทานํ ปญฺจมํฯ
6. อาสนสนฺถวิกตฺเถรอปทานํ
[26]
‘‘เจติยํ อุตฺตมํ นาม, สิขิโน โลกพนฺธุโน;
อรญฺเญ อิรีเณ วเน, อนฺธาหิณฺฑามหํ ตทาฯ
[27]
‘‘ปวนา นิกฺขมนฺเตน, ทิฏฺฐํ สีหาสนํ มยา;
เอกํสํ อญฺชลิํ กตฺวา, สนฺถวิํ [ถวิสฺสํ (สี.)] โลกนายกํฯ
[28]
‘‘ทิวสภาคํ ถวิตฺวาน, พุทฺธํ โลกคฺคนายกํ;
หฏฺโฐ หฏฺเฐน จิตฺเตน, อิมํ วาจํ อุทีรยิํฯ
[29]
‘‘‘นโม เต ปุริสาชญฺญ, นโม เต ปุริสุตฺตม;
สพฺพญฺญูสิ มหาวีร, โลกเชฏฺฐ นราสภ’ฯ
[30]
‘‘อภิตฺถวิตฺวา สิขินํ, นิมิตฺตกรเณนหํ;
อาสนํ อภิวาเทตฺวา, ปกฺกามิํ อุตฺตรามุโขฯ
[31]
‘‘เอกตฺติํเส อิโต กปฺเป, ยํ ถวิํ วทตํ วรํ;
ทุคฺคติํ นาภิชานามิ, โถมนาย อิทํ ผลํฯ
[32]
‘‘สตฺตวีเส อิโต กปฺเป, อตุลา สตฺต อาสุ เต;
สตฺตรตนสมฺปนฺนา, จกฺกวตฺตี มหพฺพลาฯ
[33]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อาสนสนฺถวิโก [อาสนสนฺถวโก (?), อาสนถวิโก (ก.), อาสนตฺถวิโก (สี. สฺยา.)] เถโร อิมา คาถาโย อภาสิตฺถาติฯ
อาสนสนฺถวิกตฺเถรสฺสาปทานํ ฉฏฺฐํฯ
7. สทฺทสญฺญกตฺเถรอปทานํ
[34]
‘‘สุทสฺสโน มหาวีโร, เทเสติ อมตํ ปทํ;
ปริวุโต สาวเกหิ, วสติ ฆรมุตฺตเมฯ
[35]
‘‘ตาย วาจาย มธุราย, สงฺคณฺหาติ [สงฺคณฺหนฺเต (สี.)] มหาชนํ;
โฆโส จ วิปุโล อาสิ, อาสีโส [อาสํโส (สี.)] เทวมานุเสฯ
[36]
‘‘นิคฺโฆสสทฺทํ สุตฺวาน, สิทฺธตฺถสฺส มเหสิโน;
สทฺเท จิตฺตํ ปสาเทตฺวา, อวนฺทิํ โลกนายกํฯ
[37]
‘‘จตุนฺนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธสญฺญายิทํ ผลํฯ
[38]