3. คตสญฺญกตฺเถรอปทานํ
[10]
‘‘อากาเสว ปทํ นตฺถิ, อมฺพเร อนิลญฺชเส;
สิทฺธตฺถํ ชินมทฺทกฺขิํ, คจฺฉนฺตํ ติทิวงฺคเณ [ติทิวงฺคณํ (สฺยา. ก.)]ฯ
[11]
‘‘อนิเลเนริตํ ทิสฺวา, สมฺมาสมฺพุทฺธจีวรํ;
วิตฺติ มมาหุ ตาวเท [วิตฺติ เม ปาหุณา ตาว (สฺยา.), วิตฺติ เม ตาวเท ชาตา (สี.)], ทิสฺวาน คมนํ มุนิํ [มุเน (สี.)]ฯ
[12]
‘‘จตุนฺนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธสญฺญายิทํ ผลํฯ
[13]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา คตสญฺญโก เถโร อิมา คาถาโย อภาสิตฺถาติฯ
คตสญฺญกตฺเถรสฺสาปทานํ ตติยํฯ
4. สตฺตปทุมิยตฺเถรอปทานํ
[14]
‘‘นทีกูเล วสามหํ, เนสาโท นาม พฺราหฺมโณ;
สตปตฺเตหิ ปุปฺเผหิ, สมฺมชฺชิตฺวาน อสฺสมํฯ
[15]
‘‘สุวณฺณวณฺณํ สมฺพุทฺธํ, สิทฺธตฺถํ โลกนายกํ;
ทิสฺวา นเภน [วเนน (สฺยา. ก.)] คจฺฉนฺตํ, หาโส เม อุทปชฺชถฯ
[16]
‘‘ปจฺจุคฺคนฺตฺวาน สมฺพุทฺธํ, โลกเชฏฺฐํ นราสภํ;
อสฺสมํ อตินาเมตฺวา, ชลชคฺเคหิ โอกิริํฯ
[17]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[18]
‘‘อิโต เต สตฺตเม กปฺเป, จตุโร ปาทปาวรา;
สตฺตรตนสมฺปนฺนา, จกฺกวตฺตี มหพฺพลาฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สตฺตปทุมิโย เถโร อิมา คาถาโย อภาสิตฺถาติฯ
สตฺตปทุมิยตฺเถรสฺสาปทานํ จตุตฺถํฯ
5. ปุปฺผาสนทายกตฺเถรอปทานํ
[20]
‘‘สุวณฺณวณฺณํ สมฺพุทฺธํ, ปีตรํสิํว [สตรํสิํว (สี. สฺยา.)] ภาณุมํ;
อวิทูเรน คจฺฉนฺตํ, สิทฺธตฺถํ อปราชิตํฯ
[21]
‘‘ตสฺส ปจฺจุคฺคมิตฺวาน, ปเวเสตฺวาน อสฺสมํ;
ปุปฺผาสนํ มยา ทินฺนํ, วิปฺปสนฺเนน เจตสาฯ
[22]
‘‘อญฺชลิํ ปคฺคเหตฺวาน, เวทชาโต ตทา อหํ;
พุทฺเธ จิตฺตํ ปสาเทตฺวา, ตํ กมฺมํ ปริณามยิํฯ
[23]
‘‘ยํ เม อตฺถิ กตํ ปุญฺญํ, สยมฺภุมฺหปราชิเต;
สพฺเพน เตน กุสเลน, วิมโล โหมิ สาสเนฯ
[24]
‘‘จตุนฺนวุติโต กปฺเป, ปุปฺผาสนมทํ ตทา;
ทุคฺคติํ นาภิชานามิ, ปุปฺผาสนสฺสิทํ ผลํฯ
[25]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุปฺผาสนทายโก เถโร อิมา คาถาโย อภาสิตฺถาติฯ
ปุปฺผาสนทายกตฺเถรสฺสาปทานํ ปญฺจมํฯ
6. อาสนสนฺถวิกตฺเถรอปทานํ
[26]
‘‘เจติยํ อุตฺตมํ นาม, สิขิโน โลกพนฺธุโน;
อรญฺเญ อิรีเณ วเน, อนฺธาหิณฺฑามหํ ตทาฯ
[27]
‘‘ปวนา นิกฺขมนฺเตน, ทิฏฺฐํ สีหาสนํ มยา;
เอกํสํ อญฺชลิํ กตฺวา, สนฺถวิํ [ถวิสฺสํ (สี.)] โลกนายกํฯ
[28]