1. อารกฺขทายกตฺเถรอปทานํ

[1]

‘‘ธมฺมทสฺสิสฺส มุนิโน, วติ การาปิตา มยา;

อารกฺโข จ มยา ทินฺโน, ทฺวิปทินฺทสฺส ตาทิโนฯ

[2]

‘‘อฏฺฐารเส กปฺปสเต, ยํ กมฺมมกริํ ตทา;

เตน กมฺมวิเสเสน, ปตฺโต เม อาสวกฺขโยฯ

[3]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา อารกฺขทายโก เถโร อิมา คาถาโย อภาสิตฺถาติฯ

อารกฺขทายกตฺเถรสฺสาปทานํ ปฐมํฯ

2. โภชนทายกตฺเถรอปทานํ

[4]

‘‘สุชาโต สาลลฏฺฐีว, โสภญฺชนมิวุคฺคโต;

อินฺทลฏฺฐิริวากาเส, วิโรจติ สทา ชิโนฯ

[5]

‘‘ตสฺส เทวาติเทวสฺส, เวสฺสภุสฺส มเหสิโน;

อทาสิ โภชนมหํ, วิปฺปสนฺเนน เจตสาฯ

[6]

‘‘ตํ เม พุทฺโธ อนุโมทิ, สยมฺภู อปราชิโต;

ภเว นิพฺพตฺตมานมฺหิ, ผลํ นิพฺพตฺตตู ตวฯ

[7]

‘‘เอกตฺติํเส อิโต กปฺเป, ยํ ทานมททิํ ตทา;

ทุคฺคติํ นาภิชานามิ, โภชนสฺส อิทํ ผลํฯ

[8]

‘‘ปญฺจวีเส อิโต กปฺเป, เอโก อาสิํ อมิตฺตโก;

สตฺตรตนสมฺปนฺโน, จกฺกวตฺตี มหพฺพโลฯ

[9]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โภชนทายโก เถโร อิมา คาถาโย อภาสิตฺถาติฯ

โภชนทายกตฺเถรสฺสาปทานํ ทุติยํฯ