‘‘เตตฺติํสมฺหิ อิโต กปฺเป, เอโก อาสิํ มหีปติ;
สุตวา นาม นาเมน, จกฺกวตฺตี มหพฺพโลฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธมฺมสญฺญโก เถโร อิมา คาถาโย อภาสิตฺถาติฯ
ธมฺมสญฺญกตฺเถรสฺสาปทานํ จตุตฺถํฯ
5. ผลทายกตฺเถรอปทานํ
[20]
‘‘ภาคีรถีนทีตีเร , อโหสิ อสฺสโม ตทา;
ตมหํ อสฺสมํ คจฺฉิํ, ผลหตฺโถ อเปกฺขวาฯ
[21]
‘‘วิปสฺสิํ ตตฺถ อทฺทกฺขิํ, ปีตรํสิํว ภาณุมํ;
ยํ เม อตฺถิ ผลํ สพฺพํ, อทาสิํ สตฺถุโน อหํฯ
[22]
‘‘เอกนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[23]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ
ผลทายกตฺเถรสฺสาปทานํ ปญฺจมํฯ
6. สมฺปสาทกตฺเถรอปทานํ
[24]
‘‘‘นโม เต พุทฺธ วีรตฺถุ, วิปฺปมุตฺโตสิ สพฺพธิ;
พฺยสนมฺหิ [พฺยสนํ หิ (สี.)] อนุปฺปตฺโต, ตสฺส เม สรณํ ภว’ฯ
[25]
‘‘สิทฺธตฺโถ ตสฺส พฺยากาสิ, โลเก อปฺปฏิปุคฺคโล;
‘มโหทธิสโม สงฺโฆ, อปฺปเมยฺโย อนุตฺตโรฯ
[26]
‘‘‘ตตฺถ ตฺวํ วิรเช เขตฺเต, อนนฺตผลทายเก;
สงฺเฆ จิตฺตํ ปสาเทตฺวา, สุพีชํ วาป [จาปิ (สี.), วาปิ (สฺยา.)] โรปยฯ
[27]
‘‘อิทํ วตฺวาน สพฺพญฺญู, โลกเชฏฺโฐ นราสโภ;
มเมว อนุสาสิตฺวา, เวหาสํ นภมุคฺคมิฯ
[28]
‘‘อจิรํ คตมตฺตมฺหิ, สพฺพญฺญุมฺหิ นราสเภ;
มรณํ สมนุปฺปตฺโต, ตุสิตํ อุปปชฺชหํฯ
[29]
‘‘ตทาหํ วิรเช เขตฺเต, อนนฺตผลทายเก;
สงฺเฆ จิตฺตํ ปสาเทตฺวา, กปฺปํ สคฺคมฺหิ โมทหํฯ
[30]
‘‘จตุนฺนวุติโต กปฺเป, ปสาทมลภิํ ตทา;
ทุคฺคติํ นาภิชานามิ, ปสาทสฺส อิทํ ผลํฯ
[31]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สมฺปสาทโก เถโร อิมา คาถาโย อภาสิตฺถาติฯ
สมฺปสาทกตฺเถรสฺสาปทานํ ฉฏฺฐํฯ
7. อารามทายกตฺเถรอปทานํ
[32]
‘‘สิทฺธตฺถสฺส ภควโต, อาราโม โรปิโต มยา;
สนฺทจฺฉาเยสุ [สีตฉาเยสุ (สฺยา.), สนฺตจฺฉาเยสุ (ก.)] รุกฺเขสุ, อุปาสนฺเตสุ ปกฺขิสุฯ
[33]
‘‘อทฺทสํ วิรชํ พุทฺธํ, อาหุตีนํ ปฏิคฺคหํ;
อารามํ อภินาเมสิํ, โลกเชฏฺฐํ นราสภํฯ
[34]
‘‘หฏฺโฐ หฏฺเฐน จิตฺเตน, ผลํ ปุปฺผมทาสหํ;
ตโต ชาตปฺปสาโทว, ตํ วนํ ปริณามยิํฯ
[35]
‘‘พุทฺธสฺส ยมิทํ ทาสิํ, วิปฺปสนฺเนน เจตสา;
ภเว นิพฺพตฺตมานมฺหิ, นิพฺพตฺตติ ผลํ มมฯ
[36]
‘‘จตุนฺนวุติโต กปฺเป, ยํ อารามมทํ ตทา;
ทุคฺคติํ นาภิชานามิ, อารามสฺส อิทํ ผลํฯ
[37]
‘‘สตฺตติํเส อิโต กปฺเป, สตฺตาสุํ มุทุสีตลา;
สตฺตรตนสมฺปนฺนา, จกฺกวตฺตี มหพฺพลาฯ
[38]
