‘‘โฆส [สทฺท (สี. สฺยา.)] มสฺโสสหํ ตตฺถ, น จ ปสฺสามิ ตํ ชินํ;

มรณญฺจ อนุปฺปตฺโต, พุทฺธสญฺญมนุสฺสริํฯ

[19]

‘‘จตุนฺนวุติโต กปฺเป, ยํ สญฺญมลภิํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[20]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติฯ

สทฺทสญฺญกตฺเถรสฺสาปทานํ จตุตฺถํฯ

5. โคสีสนิกฺเขปกตฺเถรอปทานํ

[21]

‘‘อารามทฺวารา นิกฺขมฺม, โคสีสํ สนฺถตํ มยา;

อนุโภมิ สกํ กมฺมํ, ปุพฺพกมฺมสฺสิทํ ผลํฯ

[22]

‘‘อาชานิยา วาตชวา, สินฺธวา สีฆวาหนา;

อนุโภมิ สพฺพเมตํ, โคสีสสฺส อิทํ ผลํฯ

[23]

‘‘อโห การํ ปรมการํ, สุขตฺเต สุกตํ มยา;

สงฺเฆ กตสฺส การสฺส, น อญฺญํ กลมคฺฆติฯ

[24]

‘‘จตุนฺนวุติโต กปฺเป, ยํ สีสํ สนฺถริํ อหํ;

ทุคฺคติํ นาภิชานามิ, สนฺถรสฺส อิทํ ผลํฯ

[25]

‘‘ปญฺจสตฺตติกปฺปมฺหิ, สุปฺปติฏฺฐิตนามโก;

เอโก อาสิํ มหาเตโช, จกฺกวตฺตี มหพฺพโลฯ

[26]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โคสีสนิกฺเขปโก เถโร อิมา คาถาโย อภาสิตฺถาติฯ

โคสีสนิกฺเขปกตฺเถรสฺสาปทานํ ปญฺจมํฯ

6. ปาทปูชกตฺเถรอปทานํ

[27]

‘‘ปพฺพเต หิมวนฺตมฺหิ, อโหสิํ กินฺนโร ตทา;

อทฺทสํ วิรชํ พุทฺธํ, ปีตรํสิํว ภาณุมํฯ

[28]

‘‘อุเปตํ ตมหํ [อุเปโตปิ ตทา (สฺยา.), อุเปสิํ ตมหํ (?)] พุทฺธํ, วิปสฺสิํ โลกนายกํ;

จนฺทนํ ตครญฺจาปิ, ปาเท โอสิญฺจหํ ตทาฯ

[29]

‘‘เอกนวุติโต กปฺเป, ยํ ปาทํ อภิปูชยิํ;

ทุคฺคติํ นาภิชานามิ, ปาทปูชายิทํ ผลํฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปาทปูชโก เถโร อิมา คาถาโย อภาสิตฺถาติฯ

ปาทปูชกตฺเถรสฺสาปทานํ ฉฏฺฐํฯ

7. เทสกิตฺตกตฺเถรอปทานํ

[31]

‘‘อุปสาลกนาโมหํ , อโหสิํ พฺราหฺมโณ ตทา;

กานนํ วนโมคาฬฺหํ, โลกเชฏฺฐํ นราสภํฯ

[32]

‘‘ทิสฺวาน วนฺทิํ ปาเทสุ, โลกาหุติปฏิคฺคหํ;

ปสนฺนจิตฺตํ มํ ญตฺวา, พุทฺโธ อนฺตรธายถฯ

[33]

‘‘กานนา อภินิกฺขมฺม, พุทฺธเสฏฺฐมนุสฺสริํ;

ตํ เทสํ กิตฺตยิตฺวาน, กปฺปํ สคฺคมฺหิ โมทหํฯ

[34]

‘‘ทฺเวนวุเต อิโต กปฺเป, ยํ เทสมภิกิตฺตยิํ;

ทุคฺคติํ นาภิชานามิ, กิตฺตนาย อิทํ ผลํฯ

[35]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เทสกิตฺตโก เถโร อิมา คาถาโย อภาสิตฺถาติฯ

เทสกิตฺตกตฺเถรสฺสาปทานํ สตฺตมํฯ