เมนู

‘‘สตฺตสฏฺฐิมฺหิโต กปฺเป, สตฺต อาสุํ มหีปตี;

สุนิกฺขมาติ ญายนฺติ, จกฺกวตฺตี มหพฺพลาฯ

[37]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สตฺตาหปพฺพชิโต เถโร อิมา คาถาโย อภาสิตฺถาติฯ

สตฺตาหปพฺพชิตตฺเถรสฺสาปทานํ อฏฺฐมํฯ

9. พุทฺธุปฏฺฐายิกตฺเถรอปทานํ

[38]

‘‘เวฏมฺภินีติ [เวฏมฺพรีติ (สี.), เวธมฺภินีติ (สฺยา.)] เม นามํ, ปิตุสนฺตํ [ปิตา’สนฺตํ (?)] มมํ ตทา;

มม หตฺถํ คเหตฺวาน, อุปานยิ มหามุนิํฯ

[39]

‘‘อิเมมํ อุทฺทิสิสฺสนฺติ, พุทฺธา โลกคฺคนายกา;

เตหํ อุปฏฺฐิํ สกฺกจฺจํ, ปสนฺโน เสหิ ปาณิภิฯ

[40]

‘‘เอกตฺติํเส อิโต กปฺเป, พุทฺเธ อุปฏฺฐหิํ [ปริจริํ (สี. สฺยา.)] ตทา;

ทุคฺคติํ นาภิชานามิ, อุปฏฺฐานสฺสิทํ ผลํฯ

[41]

‘‘เตวีสมฺหิ อิโต กปฺเป, จตุโร อาสุ ขตฺติยา;

สมณุปฏฺฐากา นาม, จกฺกวตฺตี มหพฺพลาฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พุทฺธุปฏฺฐายิโก เถโร อิมา คาถาโย อภาสิตฺถาติฯ

พุทฺธุปฏฺฐายิกตฺเถรสฺสาปทานํ นวมํฯ

10. ปุพฺพงฺคมิยตฺเถรอปทานํ

[43]

‘‘จุลฺลาสีติสหสฺสานิ , ปพฺพชิมฺห อกิญฺจนา;

เตสํ ปุพฺพงฺคโม อาสิํ, อุตฺตมตฺถสฺส ปตฺติยาฯ

[44]

‘‘สราคา สภวา [สโมหา (สฺยา.)] เจเต, วิปฺปสนฺนมนาวิลา;

อุปฏฺฐหิํสุ สกฺกจฺจํ, ปสนฺนา เสหิ ปาณิภิฯ

[45]

‘‘ขีณาสวา วนฺตโทสา, กตกิจฺจา อนาสวา;

ผริํสุ เมตฺตจิตฺเตน, สยมฺภู อปราชิตาฯ

[46]

‘‘เตสํ อุปฏฺฐหิตฺวาน, สมฺพุทฺธานํ ปติสฺสโต;

มรณญฺจ อนุปฺปตฺโต, เทวตฺตญฺจ อคมฺหเสฯ

[47]

‘‘จตุนฺนวุติโต กปฺเป, ยํ สีลมนุปาลยิํ;

ทุคฺคติํ นาภิชานามิ, สญฺญมสฺส อิทํ ผลํฯ

[48]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปุพฺพงฺคมิโย เถโร อิมา คาถาโย อภาสิตฺถาติฯ

ปุพฺพงฺคมิยตฺเถรสฺสาปทานํ ทสมํฯ

ปณฺณทายกวคฺโค เอกูนติํสติโมฯ

ตสฺสุทฺทานํ –

ปณฺณํ ผลํ ปจฺจุคฺคมํ, เอกปุปฺผิ จ มฆวา;

อุปฏฺฐากาปทานญฺจ , ปพฺพชฺชา พุทฺธุปฏฺฐาโก;

ปุพฺพงฺคโม จ คาถาโย, อฏฺฐตาลีส กิตฺติตาฯ

30. จิตกปูชกวคฺโค