‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกปุปฺผิโย เถโร อิมา คาถาโย อภาสิตฺถาติฯ
เอกปุปฺผิยตฺเถรสฺสาปทานํ จตุตฺถํฯ
5. มฆวปุปฺผิยตฺเถรอปทานํ
[20]
‘‘นมฺมทานทิยา ตีเร, สยมฺภู อปราชิโต;
สมาธิํ โส สมาปนฺโน, วิปฺปสนฺโน อนาวิโลฯ
[21]
‘‘ทิสฺวา ปสนฺนสุมโน, สมฺพุทฺธํ อปราชิตํ;
ตาหํ มฆวปุปฺเผน, สยมฺภุํ ปูชยิํ ตทาฯ
[22]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มฆวปุปฺผิโย เถโร อิมา คาถาโย อภาสิตฺถาติฯ
มฆวปุปฺผิยตฺเถรสฺสาปทานํ ปญฺจมํฯ
6. อุปฏฺฐากทายกตฺเถรอปทานํ
[24]
‘‘รถิยํ ปฏิปชฺชนฺตํ, อาหุตีนํ ปฏิคฺคหํ;
ทฺวิปทินฺทํ มหานาคํ, โลกเชฏฺฐํ นราสภํฯ
[25]
‘‘ปกฺโกสาปิย ตสฺสาหํ, สพฺพโลกหิเตสิโน;
อุปฏฺฐาโก มยา ทินฺโน, สิทฺธตฺถสฺส มเหสิโนฯ
[26]
‘‘ปฏิคฺคเหตฺวา [ปฏิคฺคเหสิ (ก.)] สมฺพุทฺโธ, นิยฺยาเทสิ มหามุนิ [มหาอิสิ (ก.)];
อุฏฺฐาย อาสนา ตมฺหา, ปกฺกามิ ปาจินามุโขฯ
[27]
‘‘จตุนฺนวุติโต กปฺเป, อุปฏฺฐากมทํ ตทา;
ทุคฺคติํ นาภิชานามิ, อุปฏฺฐานสฺสิทํ ผลํฯ
[28]
‘‘สตฺตปญฺญาสิโต กปฺเป, พลเสนสนามโก;
สตฺตรตนสมฺปนฺโน, จกฺกวตฺตี มหพฺพโลฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุปฏฺฐากทายโก เถโร อิมา คาถาโย อภาสิตฺถาติฯ
อุปฏฺฐากทายกตฺเถรสฺสาปทานํ ฉฏฺฐํฯ
7. อปทานิยตฺเถรอปทานํ
[30]
‘‘อปทานํ สุคตานํ, กิตฺตยิํหํ มเหสินํ;
ปาเท จ สิรสา วนฺทิํ, ปสนฺโน เสหิ ปาณิภิฯ
[31]
‘‘ทฺเวนวุเต อิโต กปฺเป, อปทานํ ปกิตฺตยิํ;
ทุคฺคติํ นาภิชานามิ, กิตฺตนาย อิทํ ผลํฯ
[32]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อปทานิโย เถโร อิมา คาถาโย อภาสิตฺถาติฯ
อปทานิยตฺเถรสฺสาปทานํ สตฺตมํฯ
8. สตฺตาหปพฺพชิตตฺเถรอปทานํ
[33]
‘‘วิปสฺสิสฺส ภควโต, สงฺโฆ สกฺกตมานิโต;
พฺยสนํ เม อนุปฺปตฺตํ, ญาติเภโท ปุเร อหุฯ
[34]
‘‘ปพฺพชฺชํ อุปคนฺตฺวาน, พฺยสนุปสมายหํ;
สตฺตาหาภิรโต ตตฺถ, สตฺถุสาสนกมฺยตาฯ
[35]
‘‘เอกนวุติโต กปฺเป, ยมหํ ปพฺพชิํ ตทา;
ทุคฺคติํ นาภิชานามิ, ปพฺพชฺชาย อิทํ ผลํฯ
[36]