เมนู

3. จงฺโกฏกิยตฺเถรอปทานํ

[10]

‘‘มหาสมุทฺทํ นิสฺสาย, วสตี ปพฺพตนฺตเร;

ปจฺจุคฺคนฺตฺวาน กตฺวาน [ปจฺจุคฺคนฺตฺวาน’กาสหํ (อฏฺฐ.), ปจฺจุคฺคมนํ กตฺวาน (?)], จงฺโกฏก [จงฺโคฏก (สี.)] มทาสหํฯ

[11]

‘‘สิทฺธตฺถสฺส มเหสิโน, สพฺพสตฺตานุกมฺปิโน [สยมฺภุสฺสานุกมฺปิโน (สฺยา.)];

ปุปฺผจงฺโกฏกํ ทตฺวา, กปฺปํ สคฺคมฺหิ โมทหํฯ

[12]

‘‘จตุนฺนวุติโต กปฺเป, จงฺโกฏกมทํ ตทา;

ทุคฺคติํ นาภิชานามิ, จงฺโกฏกสฺสิทํ ผลํฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา จงฺโกฏกิโย เถโร อิมา คาถาโย อภาสิตฺถาติฯ

จงฺโกฏกิยตฺเถรสฺสาปทานํ ตติยํฯ

4. อพฺภญฺชนทายกตฺเถรอปทานํ

[14]

‘‘โกณฺฑญฺญสฺส ภควโต, วีตราคสฺส ตาทิโน;

อากาสสมจิตฺตสฺส [อกกฺกสจิตฺตสฺสาถ (อฏฺฐ.)], นิปฺปปญฺจสฺส ฌายิโนฯ

[15]

‘‘สพฺพโมหาติวตฺตสฺส, สพฺพโลกหิเตสิโน;

อพฺภญฺชนํ มยา ทินฺนํ, ทฺวิปทินฺทสฺส ตาทิโนฯ

[16]

‘‘อปริเมยฺเย อิโต กปฺเป, อพฺภญฺชนมทํ ตทา [อมฺภญฺชนมทาสหํ (สฺยา.)];

ทุคฺคติํ นาภิชานามิ, อพฺภญฺชนสฺสิทํ ผลํฯ

[17]

‘‘อิโต ปนฺนรเส กปฺเป, จิรปฺโป นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[18]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อพฺภญฺชนทายโก เถโร อิมา คาถาโย อภาสิตฺถาติฯ

อพฺภญฺชนทายกตฺเถรสฺสาปทานํ จตุตฺถํฯ

5. เอกญฺชลิกตฺเถรอปทานํ

[19]

‘‘อุทุมฺพเร วสนฺตสฺส, นิยเต ปณฺณสนฺถเร;

วุตฺโถกาโส มยา ทินฺโน, สมณสฺส มเหสิโนฯ

[20]

‘‘ติสฺสสฺส ทฺวิปทินฺทสฺส, โลกนาถสฺส ตาทิโน;

อญฺชลิํ ปคฺคเหตฺวาน, สนฺถริํ ปุปฺผสนฺถรํฯ

[21]

‘‘ทฺเวนวุเต อิโต กปฺเป, ยํ กริํ ปุปฺผสนฺถรํ;

ทุคฺคติํ นาภิชานามิ, สนฺถรสฺส อิทํ ผลํฯ

[22]

‘‘อิโต จุทฺทสกปฺปมฺหิ, อโหสิํ มนุชาธิโป;

เอกอญฺชลิโก นาม, จกฺกวตฺตี มหพฺพโลฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกญฺชลิโก เถโร อิมา คาถาโย อภาสิตฺถาติฯ

เอกญฺชลิกตฺเถรสฺสาปทานํ ปญฺจมํฯ

6. โปตฺถกทายกตฺเถรอปทานํ

[24]

‘‘สตฺถารํ ธมฺมมารพฺภ, สงฺฆญฺจาปิ มเหสินํ;

โปตฺถทานํ มยา ทินฺนํ, ทกฺขิเณยฺเย อนุตฺตเรฯ

[25]

‘‘เอกนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, โปตฺถทานสฺสิทํ ผลํฯ

[26]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โปตฺถกทายโก เถโร อิมา คาถาโย อภาสิตฺถาติฯ

โปตฺถกทายกตฺเถรสฺสาปทานํ ฉฏฺฐํฯ

7. จิตกปูชกตฺเถรอปทานํ

[27]

‘‘จนฺทภาคานทีตีเร, อนุโสตํ วชามหํ;

สตฺต มาลุวปุปฺผานิ, จิตมาโรปยิํ อหํฯ

[28]