‘‘เอกนวุติโต กปฺเป, ยํ วนฺทิํ ปุริสุตฺตมํ;

ทุคฺคติํ นาภิชานามิ, วนฺทนาย อิทํ ผลํฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุปาคตาสโย [อุปาคตหาสนิโย (สฺยา.), อุปาคตาหาสนิโย (ก.)] เถโร อิมา คาถาโย อภาสิตฺถาติฯ

อุปาคตาสยตฺเถรสฺสาปทานํ นวมํฯ

10. ตรณิยตฺเถรอปทานํ

[39]

‘‘สุวณฺณวณฺโณ สมฺพุทฺโธ, วิปสฺสี ทกฺขิณารโห;

นทีตีเร ฐิโต สตฺถา, ภิกฺขุสงฺฆปุรกฺขโตฯ

[40]

‘‘นาวา น วิชฺชเต ตตฺถ, สนฺตารณี มหณฺณเว;

นทิยา อภินิกฺขมฺม, ตาเรสิํ โลกนายกํฯ

[41]

‘‘เอกนวุติโต กปฺเป, ยํ ตาเรสิํ นรุตฺตมํ;

ทุคฺคติํ นาภิชานามิ, ตรณาย อิทํ ผลํฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ตรณิโย เถโร อิมา คาถาโย อภาสิตฺถาติฯ

ตรณิยตฺเถรสฺสาปทานํ ทสมํฯ

ปทุมุกฺขิปวคฺโค สตฺตวีสติโมฯ

ตสฺสุทฺทานํ –

อุกฺขิปี เตลจนฺที จ, ทีปโท จ พิฬาลิโท;

มจฺโฉ ชโว สฬลโท, รกฺขโส ตรโณ ทส;

คาถาโย เจตฺถ สงฺขาตา, ตาลีสํ เจกเมว จาติฯ

28. สุวณฺณพิพฺโพหนวคฺโค

1. สุวณฺณพิพฺโพหนิยตฺเถรอปทานํ

[1]

‘‘เอกาสนํ อหมทํ, ปสนฺโน เสหิ ปาณิภิ;

พิพฺโพหนญฺจ [พิมฺโพหนญฺจ (สี. ปี.)] ปาทาสิํ, อุตฺตมตฺถสฺส ปตฺติยาฯ

[2]

‘‘เอกนวุติโต กปฺเป, พิพฺโพหนมทาสหํ;

ทุคฺคติํ นาภิชานามิ, พิพฺโพหนสฺสิทํ ผลํฯ

[3]

‘‘อิโต เตสฏฺฐิเม กปฺเป, อสโม นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[4]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา สุวณฺณพิพฺโพหนิโย เถโร อิมา คาถาโย อภาสิตฺถาติฯ

สุวณฺณพิพฺโพหนิยตฺเถรสฺสาปทานํ ปฐมํฯ

2. ติลมุฏฺฐิทายกตฺเถรอปทานํ

[5]

‘‘มม สงฺกปฺปมญฺญาย, สตฺถา โลกคฺคนายโก;

มโนมเยน กาเยน, อิทฺธิยา อุปสงฺกมิฯ

[6]

‘‘สตฺถารํ อุปสงฺกนฺตํ, วนฺทิตฺวา ปุริสุตฺตมํ;

ปสนฺนจิตฺโต สุมโน, ติลมุฏฺฐิมทาสหํฯ

[7]

‘‘เอกนวุติโต กปฺเป, ยํ ทานมททิํ ตทา;

ทุคฺคติํ นาภิชานามิ, ติลมุฏฺฐิยิทํ ผลํฯ

[8]

‘‘อิโต โสฬสกปฺปมฺหิ, ตนฺติโส [ขนฺติโย (สฺยา.)] นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[9]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติลมุฏฺฐิทายโก เถโร อิมา คาถาโย อภาสิตฺถาติฯ

ติลมุฏฺฐิทายกตฺเถรสฺสาปทานํ ทุติยํฯ