‘‘จตุนฺนวุติโต กปฺเป, ยมวนฺทิํ นราสภํ;
ทุคฺคติํ นาภิชานามิ, วนฺทนาย อิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ชวหํสโก เถโร อิมา คาถาโย อภาสิตฺถาติฯ
ชวหํสกตฺเถรสฺสาปทานํ สตฺตมํฯ
8. สฬลปุปฺผิยตฺเถรอปทานํ
[30]
‘‘จนฺทภาคานทีตีเร , อโหสิํ กินฺนโร ตทา;
วิปสฺสิํ อทฺทสํ พุทฺธํ, รํสิชาลสมากุลํฯ
[31]
‘‘ปสนฺนจิตฺโต สุมโน, ปรมาย จ ปีติยา;
ปคฺคยฺห สฬลํ ปุปฺผํ, วิปสฺสิํ โอกิริํ อหํฯ
[32]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[33]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สฬลปุปฺผิโย เถโร อิมา คาถาโย อภาสิตฺถาติฯ
สฬลปุปฺผิยตฺเถรสฺสาปทานํ อฏฺฐมํฯ
9. อุปาคตาสยตฺเถรอปทานํ
[34]
‘‘หิมวนฺตสฺส เวมชฺเฌ, สโร อาสิ สุนิมฺมิโต;
ตตฺถาหํ รกฺขโส อาสิํ, เหฐสีโล ภยานโกฯ
[35]
‘‘อนุกมฺปโก การุณิโก, วิปสฺสี โลกนายโก;
มมุทฺธริตุกาโม โส, อาคจฺฉิ มม สนฺติกํฯ
[36]
‘‘อุปาคตํ มหาวีรํ, เทวเทวํ นราสภํ;
อาสยา อภินิกฺขมฺม, อวนฺทิํ สตฺถุโน อหํฯ
[37]
‘‘เอกนวุติโต กปฺเป, ยํ วนฺทิํ ปุริสุตฺตมํ;
ทุคฺคติํ นาภิชานามิ, วนฺทนาย อิทํ ผลํฯ
[38]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุปาคตาสโย [อุปาคตหาสนิโย (สฺยา.), อุปาคตาหาสนิโย (ก.)] เถโร อิมา คาถาโย อภาสิตฺถาติฯ
อุปาคตาสยตฺเถรสฺสาปทานํ นวมํฯ
10. ตรณิยตฺเถรอปทานํ
[39]
‘‘สุวณฺณวณฺโณ สมฺพุทฺโธ, วิปสฺสี ทกฺขิณารโห;
นทีตีเร ฐิโต สตฺถา, ภิกฺขุสงฺฆปุรกฺขโตฯ
[40]
‘‘นาวา น วิชฺชเต ตตฺถ, สนฺตารณี มหณฺณเว;
นทิยา อภินิกฺขมฺม, ตาเรสิํ โลกนายกํฯ
[41]
‘‘เอกนวุติโต กปฺเป, ยํ ตาเรสิํ นรุตฺตมํ;
ทุคฺคติํ นาภิชานามิ, ตรณาย อิทํ ผลํฯ
[42]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตรณิโย เถโร อิมา คาถาโย อภาสิตฺถาติฯ
ตรณิยตฺเถรสฺสาปทานํ ทสมํฯ
ปทุมุกฺขิปวคฺโค สตฺตวีสติโมฯ
ตสฺสุทฺทานํ –
อุกฺขิปี เตลจนฺที จ, ทีปโท จ พิฬาลิโท;
มจฺโฉ ชโว สฬลโท, รกฺขโส ตรโณ ทส;
คาถาโย เจตฺถ สงฺขาตา, ตาลีสํ เจกเมว จาติฯ
28. สุวณฺณพิพฺโพหนวคฺโค