1. อากาสุกฺขิปิยตฺเถรอปทานํ
[1]
‘‘สุวณฺณวณฺณํ สิทฺธตฺถํ, คจฺฉนฺตํ อนฺตราปเณ;
ชลชคฺเค ทุเว คยฺห, อุปาคจฺฉิํ นราสภํฯ
[2]
‘‘เอกญฺจ ปุปฺผํ ปาเทสุ, พุทฺธเสฏฺฐสฺส นิกฺขิปิํ;
เอกญฺจ ปุปฺผํ ปคฺคยฺห, อากาเส อุกฺขิปิํ อหํฯ
[3]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผทานสฺสิทํ ผลํฯ
[4]
‘‘อิโต ฉตฺติํสกปฺปมฺหิ, เอโก อาสิํ มหีปติ;
อนฺตลิกฺขกโร นาม, จกฺกวตฺตี มหพฺพโลฯ
[5]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อากาสุกฺขิปิโย เถโร อิมา คาถาโย อภาสิตฺถาติฯ
อากาสุกฺขิปิยตฺเถรสฺสาปทานํ ปฐมํฯ
2. เตลมกฺขิยตฺเถรอปทานํ
[6]
‘‘สิทฺธตฺถมฺหิ ภควติ, นิพฺพุตมฺหิ นราสเภ;
โพธิยา เวทิกายาหํ, เตลํ มกฺเขสิ ตาวเทฯ
[7]
‘‘จตุนฺนวุติโต กปฺเป, ยํ เตลํ มกฺขยิํ ตทา;
ทุคฺคติํ นาภิชานามิ, มกฺขนาย อิทํ ผลํฯ
[8]
‘‘จตุวีเส อิโต กปฺเป, สุจฺฉวิ นาม ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[9]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เตลมกฺขิโย เถโร อิมา คาถาโย อภาสิตฺถาติฯ
เตลมกฺขิยตฺเถรสฺสาปทานํ ทุติยํฯ
3. อฑฺฒจนฺทิยตฺเถรอปทานํ
[10]
‘‘ติสฺสสฺส โข ภควโต, โพธิยา ปาทปุตฺตเม;
อฑฺฒจนฺทํ มยา ทินฺนํ, ธรณีรุหปาทเปฯ
[11]
‘‘ทฺเวนวุเต อิโต กปฺเป, ยํ จนฺท [ยํ ปุปฺผ (ก.)] มภิโรปยิํ;
ทุคฺคติํ นาภิชานามิ, โพธิปูชายิทํ ผลํฯ
[12]
‘‘ปญฺจวีเส อิโต กปฺเป, เทวโล นาม ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[13]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อฑฺฒจนฺทิโย เถโร อิมา คาถาโย อภาสิตฺถาติฯ
อฑฺฒจนฺทิยตฺเถรสฺสาปทานํ ตติยํฯ
4. ปทีปทายกตฺเถรอปทานํ
[14]
‘‘เทวภูโต อหํ สนฺโต, โอรุยฺห ปถวิํ ตทา;
ปทีเป ปญฺจ ปาทาสิํ, ปสนฺโน เสหิ ปาณิภิฯ
[15]
‘‘จตุนฺนวุติโต กปฺเป, ยํ ปทีปมทํ ตทา;
ทุคฺคติํ นาภิชานามิ, ทีปทานสฺสิทํ ผลํฯ
[16]
‘‘ปญฺจปญฺญาสเก กปฺเป, เอโก อาสิํ มหีปติ;
สมนฺตจกฺขุนาเมน, จกฺกวตฺตี มหพฺพโลฯ
[17]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปทีปทายโก [อปณฺณทีปิโย (สี. ก.)] เถโร อิมา คาถาโย อภาสิตฺถาติฯ
ปทีปทายกตฺเถรสฺสาปทานํ จตุตฺถํฯ
5. พิฬาลิทายกตฺเถรอปทานํ
[18]
‘‘หิมวนฺตสฺสาวิทูเร , โรมโส นาม ปพฺพโต;
ตมฺหิ ปพฺพตปาทมฺหิ, สมโณ ภาวิตินฺทฺริโยฯ
[19]
