‘‘อฏฺฐวีเส [อฏฺฐติํเส (สฺยา.)] อิโต กปฺเป, โสฬสาสิํสุ ราชาโน;
สพฺพตฺถ อภิวสฺสีติ, วุจฺจเร จกฺกวตฺติโนฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุฏิทายโก เถโร อิมา คาถาโย อภาสิตฺถาติฯ
กุฏิทายกตฺเถรสฺสาปทานํ นวมํฯ
10. อคฺคปุปฺผิยตฺเถรอปทานํ
[37]
‘‘สุวณฺณวณฺณํ สมฺพุทฺธํ, นิสินฺนํ ปพฺพตนฺตเร;
โอภาสยนฺตํ รํเสน [รํสิยา (สฺยา.)], สิขินํ สิขินํ ยถาฯ
[38]
‘‘อคฺคชํ ปุปฺผมาทาย, อุปาคจฺฉิํ นรุตฺตมํ;
ปสนฺนจิตฺโต สุมโน, พุทฺธสฺส อภิโรปยิํฯ
[39]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[40]
‘‘ปญฺจวีสติกปฺปมฺหิ, อโหสิ อมิโตคโต [อมิตวฺหโย (สี.)];
สตฺตรตนสมฺปนฺโน, จกฺกวตฺตี มหพฺพโลฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อคฺคปุปฺผิโย เถโร อิมา คาถาโย อภาสิตฺถาติฯ
อคฺคปุปฺผิยตฺเถรสฺสาปทานํ ทสมํฯ
โถมกวคฺโค ฉพฺพีสติโมฯ
ตสฺสุทฺทานํ –
โถมเกกาสนจิตกํ, จมฺปโก สตฺตปาฏลิ;
ปานธิ [ปาหโน (สี.), ปาทุ (สฺยา.)] มญฺชรี ปณฺณํ, กุฏิโท อคฺคปุปฺผิโย;
คาถาโย คณิตา เจตฺถ, เอกตาลีสเมว จาติฯ
27. ปทุมุกฺขิปวคฺโค
1. อากาสุกฺขิปิยตฺเถรอปทานํ
[1]
‘‘สุวณฺณวณฺณํ สิทฺธตฺถํ, คจฺฉนฺตํ อนฺตราปเณ;
ชลชคฺเค ทุเว คยฺห, อุปาคจฺฉิํ นราสภํฯ
[2]
‘‘เอกญฺจ ปุปฺผํ ปาเทสุ, พุทฺธเสฏฺฐสฺส นิกฺขิปิํ;
เอกญฺจ ปุปฺผํ ปคฺคยฺห, อากาเส อุกฺขิปิํ อหํฯ
[3]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผทานสฺสิทํ ผลํฯ
[4]
‘‘อิโต ฉตฺติํสกปฺปมฺหิ, เอโก อาสิํ มหีปติ;
อนฺตลิกฺขกโร นาม, จกฺกวตฺตี มหพฺพโลฯ
[5]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อากาสุกฺขิปิโย เถโร อิมา คาถาโย อภาสิตฺถาติฯ
อากาสุกฺขิปิยตฺเถรสฺสาปทานํ ปฐมํฯ
2. เตลมกฺขิยตฺเถรอปทานํ
[6]
‘‘สิทฺธตฺถมฺหิ ภควติ, นิพฺพุตมฺหิ นราสเภ;
โพธิยา เวทิกายาหํ, เตลํ มกฺเขสิ ตาวเทฯ
[7]
‘‘จตุนฺนวุติโต กปฺเป, ยํ เตลํ มกฺขยิํ ตทา;
ทุคฺคติํ นาภิชานามิ, มกฺขนาย อิทํ ผลํฯ
[8]
‘‘จตุวีเส อิโต กปฺเป, สุจฺฉวิ นาม ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[9]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เตลมกฺขิโย เถโร อิมา คาถาโย อภาสิตฺถาติฯ
เตลมกฺขิยตฺเถรสฺสาปทานํ ทุติยํฯ