3. จิตกปูชกตฺเถรอปทานํ
[9]
‘‘อานนฺโท นาม สมฺพุทฺโธ, สยมฺภู อปราชิโต;
อรญฺเญ ปรินิพฺพายิ, อมนุสฺสมฺหิ กานเนฯ
[10]
‘‘เทวโลกา อิธาคนฺตฺวา, จิตํ กตฺวานหํ ตทา;
สรีรํ ตตฺถ ฌาเปสิํ, สกฺการญฺจ อกาสหํฯ
[11]
‘‘เอกนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ
จิตกปูชกตฺเถรสฺสาปทานํ ตติยํฯ
4. ติจมฺปกปุปฺผิยตฺเถรอปทานํ
[13]
‘‘หิมวนฺตสฺสาวิทูเร , วิกโต [วิกโน (สี. สฺยา.)] นาม ปพฺพโต;
ตสฺส เวมชฺเฌ วสติ, สมโณ ภาวิตินฺทฺริโยฯ
[14]
‘‘ทิสฺวาน ตสฺโสปสมํ, วิปฺปสนฺเนน เจตสา;
ตีณิ จมฺปกปุปฺผานิ, คเหตฺวาน สโมกิริํฯ
[15]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติจมฺปกปุปฺผิโย เถโร อิมา คาถาโย อภาสิตฺถาติฯ
ติจมฺปกปุปฺผิยตฺเถรสฺสาปทานํ จตุตฺถํฯ
5. สตฺตปาฏลิยตฺเถรอปทานํ
[17]
‘‘กณิการํว โชตนฺตํ, นิสินฺนํ ปพฺพตนฺตเร;
สตฺต ปาฏลิปุปฺผานิ, พุทฺธสฺส อภิโรปยิํฯ
[18]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สตฺตปาฏลิโย เถโร อิมา คาถาโย อภาสิตฺถาติฯ
สตฺตปาฏลิยตฺเถรสฺสาปทานํ ปญฺจมํฯ
6. อุปาหนทายกตฺเถรอปทานํ
[20]
‘‘อโหสิํ จนฺทโน นาม, สมฺพุทฺธสฺสตฺรโช ตทา;
เอโกปาหโน มยา ทินฺโน, โพธิํ สมฺปชฺช เม ตุวํฯ
[21]
‘‘เอกนวุติโต กปฺเป, ยํ ปานธิํ [ยมุปาหนํ (สี.), ยํ ปาทุํ (สฺยา.)] ททิํ ตทา;
ทุคฺคติํ นาภิชานามิ, อุปาหนสฺสิทํ ผลํฯ
[22]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุปาหนทายโก เถโร อิมา คาถาโย อภาสิตฺถาติฯ
อุปาหนทายกตฺเถรสฺสาปทานํ ฉฏฺฐํฯ
7. มญฺชริปูชกตฺเถรอปทานํ
[23]
‘‘มญฺชริกํ กริตฺวาน, รถิยํ ปฏิปชฺชหํ;
อทฺทสํ สมณานคฺคํ, ภิกฺขุสงฺฆปุรกฺขตํฯ
[24]
‘‘ปสนฺนจิตฺโต สุมโน, ปรมาย จ ปีติยา;
อุโภ หตฺเถหิ ปคฺคยฺห, พุทฺธสฺส อภิโรปยิํฯ
[25]
‘‘ทฺเวนวุเต อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, ปุปฺผปูชายิทํ ผลํฯ
[26]