‘‘จตุนฺนวุติโต กปฺเป, ยํ ธาตุํ ปูชยิํ ตทา;
ทุคฺคติํ นาภิชานามิ, ธาตุปฏฺฐหเน ผลํฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธาตุปูชโก เถโร อิมา คาถาโย อภาสิตฺถาติฯ
ธาตุปูชกตฺเถรสฺสาปทานํ สตฺตมํฯ
8. สตฺตลิปุปฺผปูชกตฺเถรอปทานํ
[27]
‘‘สตฺต สตฺตลิปุปฺผานิ, สีเส กตฺวานหํ ตทา;
พุทฺธสฺส อภิโรเปสิํ, เวสฺสภุมฺหิ นรุตฺตเม [วิภตฺติวิปลฺลาโส จินฺเตตพฺโพ]ฯ
[28]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สตฺตลิปุปฺผปูชโก เถโร อิมา คาถาโย อภาสิตฺถาติฯ
สตฺตลิปุปฺผปูชกตฺเถรสฺสาปทานํ อฏฺฐมํฯ
9. พิมฺพิชาลิยตฺเถรอปทานํ
[30]
‘‘ปทุมุตฺตโร นาม ชิโน, สยมฺภู อคฺคปุคฺคโล;
จตุสจฺจํ ปกาเสติ, ทีเปติ อมตํ ปทํฯ
[31]
‘‘พิมฺพิชาลกปุปฺผานิ [พิมฺพชาลกปุปฺผานิ (ก.)], ปุถุ กตฺวานหํ ตทา;
พุทฺธสฺส อภิโรเปสิํ, ทฺวิปทินฺทสฺส ตาทิโนฯ
[32]
‘‘อฏฺฐสฏฺฐิมฺหิโต กปฺเป, จตุโร กิญฺชเกสรา;
สตฺตรตนสมฺปนฺนา, จกฺกวตฺตี มหพฺพลาฯ
[33]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา พิมฺพิชาลิโย เถโร อิมา คาถาโย อภาสิตฺถาติฯ
พิมฺพิชาลิยตฺเถรสฺสาปทานํ นวมํฯ
10. อุทฺทาลกทายกตฺเถรอปทานํ
[34]
‘‘กกุโธ นาม นาเมน, สยมฺภู อปราชิโต;
ปวนา นิกฺขมิตฺวาน, อนุปฺปตฺโต มหานทิํฯ
[35]
‘‘อุทฺทาลกํ คเหตฺวาน, สยมฺภุสฺส อทาสหํ;
สํยตสฺสุชุภูตสฺส, ปสนฺนมานโส อหํฯ
[36]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, ปุปฺผทานสฺสิทํ ผลํฯ
[37]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุทฺทาลกทายโก เถโร อิมา คาถาโย อภาสิตฺถาติฯ
อุทฺทาลกทายกตฺเถรสฺสาปทานํ ทสมํฯ
ตุวรทายกวคฺโค ปญฺจวีสติโมฯ
ตสฺสุทฺทานํ –
ตุวรนาคนฬินา, วิรวี กุฏิธูปโก;
ปตฺโต ธาตุสตฺตลิโย, พิมฺพิ อุทฺทาลเกน จ;
สตฺตติํสติ คาถาโย, คณิตาโย วิภาวิภิฯ
26. โถมกวคฺโค