3. นฬินเกสริยตฺเถรอปทานํ

[9]

‘‘ชาตสฺสรสฺส เวมชฺเฌ, วสามิ ชลกุกฺกุโฏ;

อทฺทสาหํ [อถทฺทสํ (สี. สฺยา.)] เทวเทวํ, คจฺฉนฺตํ อนิลญฺชเสฯ

[10]

‘‘ตุณฺเฑน เกสริํ [เกสรํ (สฺยา.)] คยฺห, วิปฺปสนฺเนน เจตสา;

พุทฺธสฺส อภิโรเปสิํ, ติสฺสสฺส โลกพนฺธุโนฯ

[11]

‘‘ทฺเวนวุเต อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[12]

‘‘เตสตฺตติมฺหิ กปฺปมฺหิ, สตฺต เกสรนามกา [สตปตฺตสนามโก (สี. สฺยา.)];

สตฺตรตนสมฺปนฺนา, จกฺกวตฺตี มหพฺพลาฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นฬินเกสริโย เถโร อิมา คาถาโย อภาสิตฺถาติฯ

นฬินเกสริยตฺเถรสฺสาปทานํ ตติยํฯ

4. วิรวปุปฺผิยตฺเถรอปทานํ

[14]

‘‘ขีณาสวสหสฺเสหิ, นิยฺยาติ โลกนายโก;

วิรวปุปฺผมาทาย [วิรวิปุปฺผํ ปคฺคยฺห (สี.)], พุทฺธสฺส อภิโรปยิํฯ

[15]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[16]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา วิรวปุปฺผิโย เถโร อิมา คาถาโย อภาสิตฺถาติฯ

วิรวปุปฺผิยตฺเถรสฺสาปทานํ จตุตฺถํฯ

5. กุฏิธูปกตฺเถรอปทานํ

[17]

‘‘สิทฺธตฺถสฺส ภควโต, อโหสิํ กุฏิโคปโก;

กาเลน กาลํ ธูเปสิํ, ปสนฺโน เสหิ ปาณิภิฯ

[18]

‘‘จตุนฺนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ธูปทานสฺสิทํ [พุทฺธปูชายิทํ (สี.)] ผลํฯ

[19]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา กุฏิธูปโก เถโร อิมา คาถาโย อภาสิตฺถาติฯ

กุฏิธูปกตฺเถรสฺสาปทานํ ปญฺจมํฯ

6. ปตฺตทายกตฺเถรอปทานํ

[20]

‘‘ปรเมน ทมเถน, สิทฺธตฺถสฺส มเหสิโน;

ปตฺตทานํ มยา ทินฺนํ, อุชุภูตสฺส ตาทิโนฯ

[21]

‘‘จตุนฺนวุติโต กปฺเป, ยํ ทานมททิํ ตทา;

ทุคฺคติํ นาภิชานามิ, ปตฺตทานสฺสิทํ ผลํฯ

[22]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปตฺตทายโก เถโร อิมา คาถาโย อภาสิตฺถาติฯ

ปตฺตทายกตฺเถรสฺสาปทานํ ฉฏฺฐํฯ

7. ธาตุปูชกตฺเถรอปทานํ

[23]

‘‘นิพฺพุเต โลกนาถมฺหิ, สิทฺธตฺถมฺหิ นรุตฺตเม;

เอกา ธาตุ มยา ลทฺธา, ทฺวิปทินฺทสฺส ตาทิโนฯ

[24]

‘‘ตาหํ ธาตุํ คเหตฺวาน, พุทฺธสฺสาทิจฺจพนฺธุโน;

ปญฺจวสฺเส ปริจริํ, ติฏฺฐนฺตํว นรุตฺตมํฯ

[25]