1. ตุวรทายกตฺเถรอปทานํ
[1]
‘‘มิคลุทฺโท ปุเร อาสิํ, อรญฺเญ กานเน อหํ;
ภริตฺวา ตุวรมาทาย [ภริตฺวา ตุรวมาทาย (ก.), ภชฺชิตํ ตุวรมาทาย (?) เอตฺถ ตุวรนฺติ มุคฺคกลายสทิสํ ตุวรฏฺฐินฺติ ตทฏฺฐกถา; ตุวโร ธญฺญเภเทติ สกฺกตาภิธาเน], สงฺฆสฺส อททิํ อหํฯ
[2]
‘‘เอกนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, ตุวรสฺส อิทํ ผลํฯ
[3]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ตุวรทายโก เถโร อิมา คาถาโย อภาสิตฺถาติฯ
ตุวรทายกตฺเถรสฺสาปทานํ ปฐมํฯ
2. นาคเกสริยตฺเถรอปทานํ
[4]
‘‘ธนุํ อทฺเวชฺฌํ กตฺวาน, วนมชฺโฌคหิํ อหํ;
เกสรํ โอคตํ [โอสรํ (สฺยา.), โอสฏํ (สี.)] ทิสฺวา, ปตปตฺตํ สมุฏฺฐิตํฯ
[5]
‘‘อุโภ หตฺเถหิ ปคฺคยฺห, สิเร กตฺวาน อญฺชลิํ;
พุทฺธสฺส อภิโรเปสิํ, ติสฺสสฺส โลกพนฺธุโนฯ
[6]
‘‘ทฺเวนวุเต อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[7]
‘‘เตสตฺตติมฺหิ กปฺปมฺหิ [สตฺตสตฺตติเม กปฺเป (สฺยา.)], สตฺต เกสรนามกา;
สตฺตรตนสมฺปนฺนา, จกฺกวตฺตี มหพฺพลาฯ
[8]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นาคเกสริโย เถโร อิมา คาถาโย อภาสิตฺถาติฯ
นาคเกสริยตฺเถรสฺสาปทานํ ทุติยํฯ