5. เวทิการกตฺเถรอปทานํ
[19]
‘‘วิปสฺสิโน ภควโต, โพธิยา ปาทปุตฺตเม;
ปสนฺนจิตฺโต สุมโน, กาเรสิํ เวทิกํ อหํฯ
[20]
‘‘เอกนวุติโต กปฺเป, กาเรสิํ เวทิกํ อหํ;
ทุคฺคติํ นาภิชานามิ, เวทิกาย อิทํ ผลํฯ
[21]
‘‘อิโต เอกาทเส กปฺเป, อโหสิํ สูริยสฺสโม;
สตฺตรตฺตนสมฺปนฺโน, จกฺกวตฺตี มหพฺพโลฯ
[22]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เวทิการโก เถโร อิมา คาถาโย อภาสิตฺถาติฯ
เวทิการกตฺเถรสฺสาปทานํ ปญฺจมํฯ
6. วณฺณการตฺเถรอปทานํ
[23]
‘‘นคเร อรุณวติยา, วณฺณกาโร อหํ ตทา;
เจติเย ทุสฺสภณฺฑานิ, นานาวณฺณํ รเชสหํ [รชิํ อหํ (ก.), รเชมหํ (สฺยา.)]ฯ
[24]
‘‘เอกตฺติํเส อิโต กปฺเป, ยํ วณฺณํ รชยิํ ตทา;
ทุคฺคติํ นาภิชานามิ, วณฺณทานสฺสิทํ ผลํฯ
[25]
‘‘อิโต เตวีสติกปฺเป, วณฺณสม [จนฺทุปม (สี.), จนฺทสม (สฺยา.)] สนามโก;
สตฺตรตนสมฺปนฺโน, จกฺกวตฺตี มหพฺพโลฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วณฺณกาโร เถโร อิมา คาถาโย อภาสิตฺถาติฯ
วณฺณการตฺเถรสฺสาปทานํ ฉฏฺฐํฯ
7. ปิยาลปุปฺผิยตฺเถรอปทานํ
[27]
‘‘มิคลุทฺโท ปุเร อาสิํ, อรญฺเญ กานเน อหํ;
ปิยาลํ ปุปฺผิตํ ทิสฺวา, คตมคฺเค ขิปิํ อหํฯ
[28]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปิยาลปุปฺผิโย เถโร อิมา คาถาโย อภาสิตฺถาติฯ
ปิยาลปุปฺผิยตฺเถรสฺสาปทานํ สตฺตมํฯ
8. อมฺพยาคทายกตฺเถรอปทานํ
[30]
‘‘สเก สิปฺเป อปตฺถทฺโธ, อคมํ กานนํ อหํ;
สมฺพุทฺธํ ยนฺตํ ทิสฺวาน, อมฺพยาคํ อทาสหํฯ
[31]
‘‘เอกนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, อมฺพยาคสฺสิทํ ผลํฯ
[32]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อมฺพยาคทายโก เถโร อิมา คาถาโย อภาสิตฺถาติฯ
อมฺพยาคทายกตฺเถรสฺสาปทานํ อฏฺฐมํฯ
9. ชคติการกตฺเถรอปทานํ
[33]
‘‘นิพฺพุเต โลกนาถมฺหิ, อตฺถทสฺสิ นรุตฺตเม;
ชคตี การิตา มยฺหํ, พุทฺธสฺส ถูปมุตฺตเมฯ
[34]
‘‘อฏฺฐารเส กปฺปสเต, ยํ กมฺมมกริํ ตทา;
ทุคฺคติํ นาภิชานามิ, ชคติยา อิทํ ผลํฯ
[35]