‘‘ปญฺจวีเส อิโต กปฺเป, ราชาโหสิํ มหพฺพโล;

เวภาโร นาม นาเมน, จกฺกวตฺตี มหพฺพโลฯ

[47]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุกตาเวฬิโย เถโร อิมา คาถาโย อภาสิตฺถาติฯ

สุกตาเวฬิยตฺเถรสฺสาปทานํ นวมํฯ

10. เอกวนฺทนิยตฺเถรอปทานํ

[48]

‘‘อุสภํ ปวรํ วีรํ, เวสฺสภุํ วิชิตาวินํ;

ปสนฺนจิตฺโต สุมโน, พุทฺธเสฏฺฐมวนฺทหํฯ

[49]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, วนฺทนาย อิทํ ผลํฯ

[50]

‘‘จตุวีสติกปฺปมฺหิ, วิกตานนฺทนามโก;

สตฺตรตนสมฺปนฺโน, จกฺกวตฺตี มหพฺพโลฯ

[51]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกวนฺทนิโย เถโร อิมา คาถาโย อภาสิตฺถาติฯ

เอกวนฺทนิยตฺเถรสฺสาปทานํ ทสมํฯ

อาลมฺพณทายกวคฺโค เตวีสติโมฯ

ตสฺสุทฺทานํ –

อาลมฺพณญฺจ อชินํ, มํสทารกฺขทายโก;

อพฺยาธิ องฺโกลํ [วกุลํ (สฺยา.), พกุฬํ (ก.)] โสณฺณํ, มิญฺชอาเวฬวนฺทนํ;

ปญฺจปญฺญาส คาถาโย, คณิตา อตฺถทสฺสิภิฯ

24. อุทกาสนวคฺโค