1. อาลมฺพณทายกตฺเถรอปทานํ
[1]
‘‘อตฺถทสฺสิสฺส ภควโต, โลกเชฏฺฐสฺส ตาทิโน;
อาลมฺพณํ มยา ทินฺนํ, ทฺวิปทินฺทสฺส ตาทิโนฯ
[2]
‘‘ธรณิํ ปฏิปชฺชามิ, วิปุลํ สาครปฺปรํ;
ปาเณสุ จ อิสฺสริยํ, วตฺเตมิ วสุธาย จฯ
[3]
‘‘กิเลสา ฌาปิตา มยฺหํ, ภวา สพฺเพ สมูหตา;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[4]
‘‘อิโต ทฺเวสฏฺฐิกปฺปมฺหิ, ตโย อาสิํสุ ขตฺติยา;
เอกาปสฺสิตนามา เต, จกฺกวตฺตี มหพฺพลาฯ
[5]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อาลมฺพณทายโก เถโร อิมา คาถาโย อภาสิตฺถาติฯ
อาลมฺพณทายกตฺเถรสฺสาปทานํ ปฐมํฯ
2. อชินทายกตฺเถรอปทานํ
[6]
‘‘เอกตฺติํเส อิโต กปฺเป, คณสตฺถารโก อหํ;
อทฺทสํ วิรชํ พุทฺธํ, อาหุตีนํ ปฏิคฺคหํฯ
[7]
‘‘จมฺมขณฺฑํ มยา ทินฺนํ, สิขิโน โลกพนฺธุโน;
เตน กมฺเมน ทฺวิปทินฺท, โลกเชฏฺฐ นราสภฯ
[8]
‘‘สมฺปตฺติํ อนุโภตฺวาน, กิเลเส ฌาปยิํ อหํ;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[9]
‘‘เอกตฺติํเส อิโต กปฺเป, อชินํ ยํ อทาสหํ;
ทุคฺคติํ นาภิชานามิ, อชินสฺส อิทํ ผลํฯ
[10]
‘‘อิโต ปญฺจมเก กปฺเป, ราชา อาสิํ สุทายโก;
สตฺตรตนสมฺปนฺโน, จกฺกวตฺตี มหพฺพโลฯ
[11]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อชินทายโก เถโร อิมา คาถาโย อภาสิตฺถาติฯ
อชินทายกตฺเถรสฺสาปทานํ ทุติยํฯ
3. ทฺเวรตนิยตฺเถรอปทานํ
[12]
‘‘มิคลุทฺโท ปุเร อาสิํ, อรญฺเญ กานเน อหํ;
อทฺทสํ วิรชํ พุทฺธํ, อาหุตีนํ ปฏิคฺคหํฯ
[13]
‘‘มํสเปสิ มยา ทินฺนา, วิปสฺสิสฺส มเหสิโน;
สเทวกสฺมิํ โลกสฺมิํ, อิสฺสรํ การยามหํฯ
[14]
‘‘อิมินา มํสทาเนน, รตนํ นิพฺพตฺตเต มม;
ทุเวเม รตนา โลเก, ทิฏฺฐธมฺมสฺส ปตฺติยาฯ
[15]
‘‘เตหํ สพฺเพ อนุโภมิ, มํสทานสฺส สตฺติยา;
คตฺตญฺจ มุทุกํ มยฺหํ, ปญฺญา นิปุณเวทนีฯ
[16]
‘‘เอกนวุติโต กปฺเป, ยํ มํสมททิํ ตทา;
ทุคฺคติํ นาภิชานามิ, มํสทานสฺสิทํ ผลํฯ
[17]
‘‘อิโต จตุตฺถเก กปฺเป, เอโก อาสิํ ชนาธิโป;
มหาโรหิตนาโม โส, จกฺกวตฺตี มหพฺพโลฯ
[18]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ทฺเวรตนิโย [ทฺวิรตนิโย (สี.)] เถโร อิมา คาถาโย อภาสิตฺถาติฯ
ทฺเวรตนิยตฺเถรสฺสาปทานํ ตติยํฯ
ทสมํ ภาณวารํฯ
4. อารกฺขทายกตฺเถรอปทานํ
[19]
‘‘สิทฺธตฺถสฺส ภควโต, เวทิ การาปิตา [เวทิกา การิตา (สฺยา.)] มยา;
อารกฺโข จ มยา ทินฺโน, สุคตสฺส มเหสิโนฯ
[20]