เมนู

8. อกฺกนฺตสญฺญกตฺเถรอปทานํ

[37]

‘‘กุสาฏกํ คเหตฺวาน, อุปชฺฌายสฺสหํ ปุเร;

มนฺตญฺจ อนุสิกฺขามิ, คนฺถาโทสสฺส [กณฺฑเภทสฺส (สี.), คณฺฑเภทสฺส (สฺยา.)] ปตฺติยาฯ

[38]

‘‘อทฺทสํ วิรชํ พุทฺธํ, อาหุตีนํ ปฏิคฺคหํ;

อุสภํ ปวรํ อคฺคํ, ติสฺสํ พุทฺธํ คณุตฺตมํ [คชุตฺตมํ (สฺยา.)]

[39]

‘‘กุสาฏกํ ปตฺถริตํ, อกฺกมนฺตํ นรุตฺตมํ;

สมุคฺคตํ มหาวีรํ, โลกเชฏฺฐํ นราสภํฯ

[40]

‘‘ทิสฺวา ตํ โลกปชฺโชตํ, วิมลํ จนฺทสนฺนิภํ;

อวนฺทิํ สตฺถุโน ปาเท, วิปฺปสนฺเนน เจตสาฯ

[41]

‘‘จตุนฺนวุติโต กปฺเป, ยํ อทาสิํ กุสาฏกํ;

ทุคฺคติํ นาภิชานามิ, กุสาฏกสฺสิทํ ผลํฯ

[42]

‘‘สตฺตติํเส อิโต กปฺเป, เอโก อาสิํ ชนาธิโป;

สุนนฺโท นาม นาเมน, จกฺกวตฺตี มหพฺพโลฯ

[43]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อกฺกนฺตสญฺญโก เถโร อิมา คาถาโย อภาสิตฺถาติ;

อกฺกนฺตสญฺญกตฺเถรสฺสาปทานํ อฏฺฐมํฯ

9. สปฺปิทายกตฺเถรอปทานํ

[44]

‘‘นิสินฺโน ปาสาทวเร, นารีคณปุรกฺขโต;

พฺยาธิตํ สมณํ ทิสฺวา, อภินาเมสหํ ฆรํฯ

[45]

‘‘อุปวิฏฺฐํ มหาวีรํ, เทวเทวํ นราสภํ;

สปฺปิเตลํ มยา ทินฺนํ, สิทฺธตฺถสฺส มเหสิโนฯ

[46]

‘‘ปสฺสทฺธทรถํ ทิสฺวา, วิปฺปสนฺนมุขินฺทฺริยํ;

วนฺทิตฺวา สตฺถุโน ปาเท, อนุสํสาวยิํ ปุเรฯ

[47]

‘‘ทิสฺวา มํ สุปฺปสนฺนตฺตํ [สุปฺปสนฺนนฺตํ (สฺยา. ก.) สุปฺปสนฺนจิตฺตนฺติ อตฺโถ], อิทฺธิยา ปารมิงฺคโต;

นภํ อพฺภุคฺคมี ธีโร, หํสราชาว อมฺพเรฯ

[48]

‘‘จตุนฺนวุติโต กปฺเป, ยํ ทานมททิํ ตทา;

ทุคฺคติํ นาภิชานามิ, สปฺปิเตลสฺสิทํ ผลํฯ

[49]

‘‘อิโต สตฺตรเส กปฺเป, ชุติเทว [ทุติเทว (สฺยา.), ตุติเทว (ก.)] สนามโก;

สตฺตรตนสมฺปนฺโน, จกฺกวตฺตี มหพฺพโลฯ

[50]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สปฺปิทายโก เถโร อิมา คาถาโย อภาสิตฺถาติฯ

สปฺปิทายกตฺเถรสฺสาปทานํ นวมํฯ

10. ปาปนิวาริยตฺเถรอปทานํ

[51]

‘‘ปิยทสฺสิสฺส ภควโต, จงฺกมํ โสธิตํ มยา;

นฬเกหิ ปฏิจฺฉนฺนํ, วาตาตปนิวารณํฯ

[52]

‘‘ปาปํ วิวชฺชนตฺถาย, กุสลสฺสุปสมฺปทา;

กิเลสานํ ปหานาย, ปทหิํ สตฺถุ สาสเนฯ

[53]

‘‘อิโต เอกาทเส กปฺเป, อคฺคิเทโวติ วิสฺสุโต;

สตฺตรตนสมฺปนฺโน, จกฺกวตฺตี มหพฺพโลฯ

[54]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปาปนิวาริโย [วาตาตปนิวาริโย (?)] เถโร อิมา คาถาโย อภาสิตฺถาติฯ

ปาปนิวาริยตฺเถรสฺสาปทานํ ทสมํฯ

หตฺถิวคฺโค พาวีสติโมฯ

ตสฺสุทฺทานํ –

หตฺถิ ปานธิ สจฺจญฺจ, เอกสญฺญิ จ รํสิโก;

สนฺธิโต ตาลวณฺฏญฺจ, ตถา อกฺกนฺตสญฺญโก;

สปฺปิ ปาปนิวารี จ, จตุปฺปญฺญาส คาถกาติฯ

23. อาลมฺพณทายกวคฺโค