‘‘เอกตฺติํเส อิโต กปฺเป, ยํ สญฺญมลภิํ ตทา;

ตสฺสา สญฺญาย วาหสา, ปตฺโต เม อาสวกฺขโยฯ

[29]

‘‘อิโต เตรสกปฺปมฺหิ, ธนิฏฺโฐ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สนฺธิโต [สณฺฐิโต (สี.)] เถโร อิมา คาถาโย อภาสิตฺถาติฯ

สนฺธิตตฺเถรสฺสาปทานํ ฉฏฺฐํฯ

7. ตาลวณฺฏทายกตฺเถรอปทานํ

[31]

‘‘ตาลวณฺฏํ มยา ทินฺนํ, ติสฺสสฺสาทิจฺจพนฺธุโน;

คิมฺหนิพฺพาปนตฺถาย, ปริฬาโหปสนฺติยาฯ

[32]

‘‘สนฺนิพฺพาเปมิ ราคคฺคิํ, โทสคฺคิญฺจ ตทุตฺตริํ;

นิพฺพาเปมิ จ โมหคฺคิํ, ตาลวณฺฏสฺสิทํ ผลํฯ

[33]

‘‘กิเลสา ฌาปิตา มยฺหํ, ภวา สพฺเพ สมูหตา;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[34]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ตาลวณฺฏสฺสิทํ ผลํฯ

[35]

‘‘เตสฏฺฐิมฺหิ อิโต กปฺเป, มหานามสนามโก;

สตฺตรตนสมฺปนฺโน, จกฺกวตฺตี มหพฺพโลฯ

[36]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ตาลวณฺฏทายโก เถโร อิมา คาถาโย อภาสิตฺถาติฯ

ตาลวณฺฏทายกตฺเถรสฺสาปทานํ สตฺตมํฯ

8. อกฺกนฺตสญฺญกตฺเถรอปทานํ

[37]

‘‘กุสาฏกํ คเหตฺวาน, อุปชฺฌายสฺสหํ ปุเร;

มนฺตญฺจ อนุสิกฺขามิ, คนฺถาโทสสฺส [กณฺฑเภทสฺส (สี.), คณฺฑเภทสฺส (สฺยา.)] ปตฺติยาฯ

[38]

‘‘อทฺทสํ วิรชํ พุทฺธํ, อาหุตีนํ ปฏิคฺคหํ;

อุสภํ ปวรํ อคฺคํ, ติสฺสํ พุทฺธํ คณุตฺตมํ [คชุตฺตมํ (สฺยา.)]ฯ

[39]

‘‘กุสาฏกํ ปตฺถริตํ, อกฺกมนฺตํ นรุตฺตมํ;

สมุคฺคตํ มหาวีรํ, โลกเชฏฺฐํ นราสภํฯ

[40]

‘‘ทิสฺวา ตํ โลกปชฺโชตํ, วิมลํ จนฺทสนฺนิภํ;

อวนฺทิํ สตฺถุโน ปาเท, วิปฺปสนฺเนน เจตสาฯ

[41]

‘‘จตุนฺนวุติโต กปฺเป, ยํ อทาสิํ กุสาฏกํ;

ทุคฺคติํ นาภิชานามิ, กุสาฏกสฺสิทํ ผลํฯ

[42]

‘‘สตฺตติํเส อิโต กปฺเป, เอโก อาสิํ ชนาธิโป;

สุนนฺโท นาม นาเมน, จกฺกวตฺตี มหพฺพโลฯ

[43]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อกฺกนฺตสญฺญโก เถโร อิมา คาถาโย อภาสิตฺถาติ;

อกฺกนฺตสญฺญกตฺเถรสฺสาปทานํ อฏฺฐมํฯ

9. สปฺปิทายกตฺเถรอปทานํ

[44]

‘‘นิสินฺโน ปาสาทวเร, นารีคณปุรกฺขโต;

พฺยาธิตํ สมณํ ทิสฺวา, อภินาเมสหํ ฆรํฯ

[45]

‘‘อุปวิฏฺฐํ มหาวีรํ, เทวเทวํ นราสภํ;

สปฺปิเตลํ มยา ทินฺนํ, สิทฺธตฺถสฺส มเหสิโนฯ

[46]

‘‘ปสฺสทฺธทรถํ ทิสฺวา, วิปฺปสนฺนมุขินฺทฺริยํ;

วนฺทิตฺวา สตฺถุโน ปาเท, อนุสํสาวยิํ ปุเรฯ

[47]