‘‘สตฺตสตฺตติโต กปฺเป, อฏฺฐ อาสิํสุ ขตฺติยา;
สุยานา นาม นาเมน, จกฺกวตฺตี มหพฺพลาฯ
[10]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปานธิทายโก เถโร อิมา คาถาโย อภาสิตฺถาติฯ
ปานธิทายกตฺเถรสฺสาปทานํ ทุติยํฯ
3. สจฺจสญฺญกตฺเถรอปทานํ
[11]
‘‘เวสฺสภู ตมฺหิ สมเย, ภิกฺขุสงฺฆปุรกฺขโต;
เทเสติ อริยสจฺจานิ, นิพฺพาเปนฺโต มหาชนํฯ
[12]
‘‘ปรมการุญฺญปตฺโตมฺหิ, สมิติํ อคมาสหํ;
โสหํ นิสินฺนโก สนฺโต, ธมฺมมสฺโสสิ สตฺถุโนฯ
[13]
‘‘ตสฺสาหํ ธมฺมํ สุตฺวาน, เทวโลกํ อคจฺฉหํ;
ติํสกปฺปานิ เทเวสุ, อวสิํ ตตฺถหํ ปุเรฯ
[14]
‘‘เอกตฺติํเส อิโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, สจฺจสญฺญายิทํ ผลํฯ
[15]
‘‘ฉพฺพีสมฺหิ อิโต กปฺเป, เอโก อาสิํ ชนาธิโป;
เอกผุสิตนาเมน, จกฺกวตฺตี มหพฺพโลฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สจฺจสญฺญโก เถโร อิมา คาถาโย อภาสิตฺถาติฯ
สจฺจสญฺญกตฺเถรสฺสาปทานํ ตติยํฯ
4. เอกสญฺญกตฺเถรอปทานํ
[17]
‘‘ทุมคฺเค ปํสุกูลิกํ [ปํสุกูลกํ (?)], ลคฺคํ ทิสฺวาน สตฺถุโน;
อญฺชลิํ ปคฺคเหตฺวาน, ปํสุกูลํ อวนฺทหํฯ
[18]
‘‘เอกตฺติํเส อิโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[19]
‘‘ปญฺจวีเส อิโต กปฺเป, เอโก อาสิํ ชนาธิโป;
อมิตาโภติ นาเมน, จกฺกวตฺตี มหพฺพโลฯ
[20]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกสญฺญโก เถโร อิมา คาถาโย อภาสิตฺถาติฯ
เอกสญฺญกตฺเถรสฺสาปทานํ จตุตฺถํฯ
5. รํสิสญฺญกตฺเถรอปทานํ
[21]
‘‘อุเทนฺตํ สตรํสิํว, ปีตรํสิํว [สิตรํสิํ ว (สี. สฺยา.)] ภาณุมํ;
พฺยคฺฆูสภํว ปวรํ, สุชาตํ ปพฺพตนฺตเรฯ
[22]
‘‘พุทฺธสฺส อานุภาโว โส, ชลเต ปพฺพตนฺตเร;
รํเส [รํสฺยา (?)] จิตฺตํ ปสาเทตฺวา, กปฺปํ สคฺคมฺหิ โมทหํฯ
[23]
‘‘อวเสเสสุ กปฺเปสุ, กุสลํ จริตํ มยา;
เตน จิตฺตปฺปสาเทน, พุทฺธานุสฺสติยาปิ จฯ
[24]
‘‘ติํสกปฺปสหสฺเสโต, ยํ สญฺญมลภิํ ตทา;
ทุคฺคติํ นาภิชานามิ, พุทฺธสญฺญายิทํ ผลํฯ
[25]
‘‘สตฺตปญฺญาสกปฺปมฺหิ, เอโก อาสิํ ชนาธิโป;
สุชาโต นาม นาเมน, จกฺกวตฺตี มหพฺพโลฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติฯ
รํสิสญฺญกตฺเถรสฺสาปทานํ ปญฺจมํฯ
6. สนฺธิตตฺเถรอปทานํ
[27]
‘‘อสฺสตฺเถ หริโตภาเส, สํวิรูฬฺหมฺหิ ปาทเป;
เอกํ พุทฺธคตํ สญฺญํ, อลภิํหํ [อลภิสฺสํ (สี.)] ปติสฺสโตฯ
[28]