8. โกรณฺฑปุปฺผิยตฺเถรอปทานํ

[35]

‘‘อกฺกนฺตญฺจ ปทํ ทิสฺวา, จกฺกาลงฺการภูสิตํ;

ปเทนานุปทํ ยนฺโต, วิปสฺสิสฺส มเหสิโนฯ

[36]

‘‘โกรณฺฑํ ปุปฺผิตํ ทิสฺวา, สมูลํ ปูชิตํ มยา;

หฏฺโฐ หฏฺเฐน จิตฺเตน, อวนฺทิํ ปทมุตฺตมํฯ

[37]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[38]

‘‘สตฺตปญฺญาสกปฺปมฺหิ, เอโก วีตมโล อหุํ;

สตฺตรตนสมฺปนฺโน, จกฺกวตฺตี มหพฺพโลฯ

[39]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โกรณฺฑปุปฺผิโย เถโร อิมา คาถาโย อภาสิตฺถาติฯ

โกรณฺฑปุปฺผิยตฺเถรสฺสาปทานํ อฏฺฐมํฯ

9. อาธารทายกตฺเถรอปทานํ

[40]

‘‘อาธารกํ มยา ทินฺนํ, สิขิโน โลกพนฺธุโน;

ธาเรมิ ปถวิํ สพฺพํ, เกวลํ วสุธํ อิมํฯ

[41]

‘‘กิเลสา ฌาปิตา มยฺหํ, ภวา สพฺเพ สมูหตา;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[42]

‘‘สตฺตวีเส อิโต กปฺเป, อเหสุํ จตุโร ชนา;

สมนฺตวรณา นาม, จกฺกวตฺตี มหพฺพลาฯ

[43]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อาธารทายโก [ปริยาทานิโย (ก.)] เถโร อิมา คาถาโย อภาสิตฺถาติฯ

อาธารทายกตฺเถรสฺสาปทานํ นวมํฯ

10. ปาปนิวาริยตฺเถรอปทานํ

[44]

‘‘ติสฺสสฺส ตุ ภควโต, เทวเทวสฺส ตาทิโน;

เอกจฺฉตฺตํ มยา ทินฺนํ, วิปฺปสนฺเนน เจตสาฯ

[45]

‘‘นิวุตํ โหติ เม ปาปํ, กุสลสฺสุปสมฺปทา;

อากาเส ฉตฺตํ ธาเรนฺติ, ปุพฺพกมฺมสฺสิทํ ผลํฯ

[46]

‘‘จริมํ วตฺตเต มยฺหํ, ภวา สพฺเพ สมูหตา;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[47]

‘‘ทฺเวนวุเต อิโต กปฺเป, ยํ ฉตฺตมททิํ ตทา;

ทุคฺคติํ นาภิชานามิ, ฉตฺตทานสฺสิทํ ผลํฯ

[48]

‘‘ทฺเวสตฺตติมฺหิโต กปฺเป, อฏฺฐาสิํสุ ชนาธิปา;

มหานิทานนาเมน, ราชาโน จกฺกวตฺติโนฯ

[49]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปาปนิวาริโย [วาตาตปนิวาริโย (สี.)] เถโร อิมา คาถาโย อภาสิตฺถาติ;

ปาปนิวาริยตฺเถรสฺสาปทานํ ทสมํฯ

กณิการปุปฺผิยวคฺโค เอกวีสติโมฯ

ตสฺสุทฺทานํ –

กณิกาโร มิเนลญฺจ, กิงฺกณิ ตรเณน จ;

นิคฺคุณฺฑิปุปฺผี ทกโท, สลโล จ กุรณฺฑโก;

อาธารโก ปาปวารี, อฏฺฐตาลีส คาถกาติฯ

22. หตฺถิวคฺโค