‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มิเนลปุปฺผิโย เถโร อิมา คาถาโย อภาสิตฺถาติฯ
มิเนลปุปฺผิยตฺเถรสฺสาปทานํ ทุติยํฯ
3. กิงฺกณิปุปฺผิยตฺเถรอปทานํ
[10]
‘‘กญฺจนคฺฆิยสงฺกาโส, สพฺพญฺญู โลกนายโก;
โอทกํ ทหโมคฺคยฺห, สินายิ โลกนายโกฯ
[11]
‘‘ปคฺคยฺห กิงฺกณิํ [กิงฺกิณิํ (สี.)] ปุปฺผํ, วิปสฺสิสฺสาภิโรปยิํ;
อุทคฺคจิตฺโต สุมโน, ทฺวิปทินฺทสฺส ตาทิโนฯ
[12]
‘‘เอกนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[13]
‘‘สตฺตวีสติกปฺปมฺหิ, ราชา ภีมรโถ อหุ;
สตฺตรตนสมฺปนฺโน, จกฺกวตฺตี มหพฺพโลฯ
[14]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กิงฺกณิปุปฺผิโย [กิงฺกิณิกปุปฺผิโย (สี.)] เถโร อิมา คาถาโย อภาสิตฺถาติฯ
กิงฺกณิปุปฺผิยตฺเถรสฺสาปทานํ ตติยํฯ
4. ตรณิยตฺเถรอปทานํ
[15]
‘‘อตฺถทสฺสี ตุ ภควา, ทฺวิปทินฺโท นราสโภ;
ปุรกฺขโต สาวเกหิ, คงฺคาตีรมุปาคมิฯ
[16]
‘‘สมติตฺติ กากเปยฺยา, คงฺคา อาสิ ทุรุตฺตรา;
อุตฺตารยิํ ภิกฺขุสงฺฆํ, พุทฺธญฺจ ทฺวิปทุตฺตมํฯ
[17]
‘‘อฏฺฐารเส กปฺปสเต, ยํ กมฺมมกริํ ตทา;
ทุคฺคติํ นาภิชานามิ, ตรณาย อิทํ ผลํฯ
[18]
‘‘เตรเสโต กปฺปสเต, ปญฺจ สพฺโพภวา [สพฺโภควา (สี.)] อหุํ;
สตฺตรตนสมฺปนฺนา, จกฺกวตฺตี มหพฺพลาฯ
[19]
‘‘ปจฺฉิเม จ ภเว อสฺมิํ, ชาโตหํ พฺราหฺมเณ กุเล;
สทฺธิํ ตีหิ สหาเยหิ, ปพฺพชิํ สตฺถุ สาสเนฯ
[20]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตรณิโย เถโร อิมา คาถาโย อภาสิตฺถาติ;
ตรณิยตฺเถรสฺสาปทานํ จตุตฺถํฯ
5. นิคฺคุณฺฑิปุปฺผิยตฺเถรอปทานํ
[21]
‘‘วิปสฺสิสฺส ภควโต, อาสิมารามิโก อหํ;
นิคฺคุณฺฑิปุปฺผํ ปคฺคยฺห, พุทฺธสฺส อภิโรปยิํฯ
[22]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘ปญฺจวีเส [ปญฺจติํเส (สี. สฺยา.)] อิโต กปฺเป, เอโก อาสิํ ชนาธิโป;
มหาปตาปนาเมน, จกฺกวตฺตี มหพฺพโลฯ
[24]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นิคฺคุณฺฑิปุปฺผิโย เถโร อิมา คาถาโย อภาสิตฺถาติฯ
นิคฺคุณฺฑิปุปฺผิยตฺเถรสฺสาปทานํ ปญฺจมํฯ
6. อุทกทายกตฺเถรอปทานํ
[25]
‘‘ภุญฺชนฺตํ สมณํ ทิสฺวา, วิปฺปสนฺนมนาวิลํ;
ฆเฏโนทกมาทาย, สิทฺธตฺถสฺส อทาสหํฯ
[26]