‘‘ปาโมชฺชํ ชนยิตฺวาน, ผลหตฺโถ อุปาคมิํ;
ปฏิคฺคเหสิ ภควา, สพฺพญฺญู วทตํ วโรฯ
[39]
‘‘จตุนฺนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[40]
‘‘สตฺตปญฺญาสกปฺปมฺหิ, อุปนนฺทสนามโก;
สตฺตรตนสมฺปนฺโน, จกฺกวตฺตี มหพฺพโลฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตินฺทุกทายโก เถโร อิมา คาถาโย อภาสิตฺถาติฯ
ตินฺทุกทายกตฺเถรสฺสาปทานํ สตฺตมํฯ
8. มุฏฺฐิปูชกตฺเถรอปทานํ
[42]
‘‘สุเมโธ นาม ภควา, โลกเชฏฺโฐ นราสโภ;
ปจฺฉิเม อนุกมฺปาย, ปธานํ ปทหี ชิโนฯ
[43]
‘‘ตสฺส จงฺกมมานสฺส, ทฺวิปทินฺทสฺส ตาทิโน;
คิริเนลสฺส ปุปฺผานํ, มุฏฺฐิํ พุทฺธสฺส โรปยิํฯ
[44]
‘‘เตน จิตฺตปฺปสาเทน, สุกฺกมูเลน โจทิโต;
ติํสกปฺปสหสฺสานิ, ทุคฺคติํ นุปปชฺชหํฯ
[45]
‘‘เตวีสติกปฺปสเต, สุเนโล นาม ขตฺติโย;
สตฺตรตนสมฺปนฺโน, เอโก อาสิํ มหพฺพโลฯ
[46]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มุฏฺฐิปูชโก เถโร อิมา คาถาโย อภาสิตฺถาติฯ
มุฏฺฐิปูชกตฺเถรสฺสาปทานํ อฏฺฐมํฯ
9. กิํกณิกปุปฺผิยตฺเถรอปทานํ
[47]
‘‘สุมงฺคโลติ นาเมน, สยมฺภู อปราชิโต;
ปวนา นิกฺขมิตฺวาน, นครํ ปาวิสี ชิโนฯ
[48]
‘‘ปิณฺฑจารํ จริตฺวาน, นิกฺขมฺม นครา มุนิ;
กตกิจฺโจว สมฺพุทฺโธ, โส วสี วนมนฺตเรฯ
[49]
‘‘กิํกณิปุปฺผํ ปคฺคยฺห, พุทฺธสฺส อภิโรปยิํ;
ปสนฺนจิตฺโต สุมโน, สยมฺภุสฺส มเหสิโนฯ
[50]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[51]
‘‘ฉฬาสีติมฺหิโต กปฺเป, อปิลาสิสนามโก;
สตฺตรตนสมฺปนฺโน, จกฺกวตฺตี มหพฺพโลฯ
[52]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กิํกณิกปุปฺผิโย เถโร อิมา คาถาโย อภาสิตฺถาติฯ
กิํกณิกปุปฺผิยตฺเถรสฺสาปทานํ นวมํฯ
10. ยูถิกปุปฺผิยตฺเถรอปทานํ
[53]
‘‘ปทุมุตฺตโร นาม ชิโน, อาหุตีนํ ปฏิคฺคโห;
ปวนา นิกฺขมิตฺวาน, วิหารํ ยาติ จกฺขุมาฯ
[54]
‘‘อุโภ หตฺเถหิ ปคฺคยฺห, ยูถิกํ ปุปฺผมุตฺตมํ;
พุทฺธสฺส อภิโรปยิํ, เมตฺตจิตฺตสฺส ตาทิโนฯ
[55]
‘‘เตน จิตฺตปฺปสาเทน, อนุโภตฺวาน สมฺปทา;
กปฺปานํ สตสหสฺสํ, ทุคฺคติํ นุปปชฺชหํฯ
[56]
‘‘อิโต ปญฺญาสกปฺเปสุ, เอโก อาสิํ ชนาธิโป;
สมิตฺตนนฺทโน นาม, จกฺกวตฺตี มหพฺพโลฯ
[57]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ยูถิกปุปฺผิโย เถโร อิมา คาถาโย อภาสิตฺถาติ;
ยูถิกปุปฺผิยตฺเถรสฺสาปทานํ ทสมํฯ
ตมาลปุปฺผิยวคฺโค วีสติโมฯ