‘‘ปญฺจสฏฺฐิมฺหิโต กปฺเป, จตฺตาโรสุํ มหทฺธนา;
สตฺตรตนสมฺปนฺนา, จกฺกวตฺตี มหพฺพลาฯ
[11]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติณสนฺถารโก เถโร อิมา คาถาโย อภาสิตฺถาติฯ
ติณสนฺถารกตฺเถรสฺสาปทานํ ทุติยํฯ
3. ขณฺฑปุลฺลิยตฺเถรอปทานํ
[12]
‘‘ผุสฺสสฺส โข ภควโต, ถูโป อาสิ มหาวเน;
กุญฺชเรหิ ตทา ภินฺโน, ปรูฬฺโห ปาทโป [ปรูฬฺหปาทโป (สี.), สํรูฬฺโห ปาทโป (สฺยา.)] ตหิํฯ
[13]
‘‘วิสมญฺจ สมํ กตฺวา, สุธาปิณฺฑํ อทาสหํ;
ติโลกครุโน ตสฺส, คุเณหิ ปริโตสิโต [ปริโต สุโต (ก.)]ฯ
[14]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, สุธาปิณฺฑสฺสิทํ ผลํฯ
[15]
‘‘สตฺตสตฺตติกปฺปมฺหิ, ชิตเสนาสุํ โสฬส;
สตฺตรตนสมฺปนฺนา, จกฺกวตฺตี มหพฺพลาฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ขณฺฑผุลฺลิโย เถโร อิมา คาถาโย อภาสิตฺถาติฯ
ขณฺฑปุลฺลิยตฺเถรสฺสาปทานํ ตติยํฯ
4. อโสกปูชกตฺเถรอปทานํ
[17]
‘‘ติวรายํ [ติปุรายํ (สฺยา.)] ปุเร รมฺเม, ราชุยฺยานํ อหุ ตทา;
อุยฺยานปาโล ตตฺถาสิํ, รญฺโญ พทฺธจโร อหํฯ
[18]
‘‘ปทุโม นาม นาเมน, สยมฺภู สปฺปโภ อหุ;
นิสินฺนํ [นิสินฺโน (ก.)] ปุณฺฑรีกมฺหิ, ฉายา น ชหิ ตํ มุนิํฯ
[19]
‘‘อโสกํ ปุปฺผิตํ ทิสฺวา, ปิณฺฑิภารํ สุทสฺสนํ;
พุทฺธสฺส อภิโรเปสิํ, ชลชุตฺตมนามิโนฯ
[20]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[21]
‘‘สตฺตติํสมฺหิโต กปฺเป, โสฬส อรณญฺชหา [อรุณญฺชหา (สี.)];
สตฺตรตนสมฺปนฺนา, จกฺกวตฺตี มหพฺพลาฯ
[22]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อโสกปูชโก เถโร อิมา คาถาโย อภาสิตฺถาติฯ
อโสกปูชกตฺเถรสฺสาปทานํ จตุตฺถํฯ
5. องฺโกลกตฺเถรอปทานํ
[23]
‘‘องฺโกลํ ปุปฺผิตํ ทิสฺวา, มาลาวรํ สโกสกํ [สโมคธํ (สฺยา.)];
โอจินิตฺวาน ตํ ปุปฺผํ, อคมํ พุทฺธสนฺติกํฯ
[24]
‘‘สิทฺธตฺโถ ตมฺหิ สมเย, ปติลีโน มหามุนิ;
มุหุตฺตํ ปฏิมาเนตฺวา, คุหายํ ปุปฺผโมกิริํฯ
[25]
‘‘จตุนฺนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, ปุปฺผทานสฺสิทํ [พุทฺธปูชายิทํ (สี. สฺยา.)] ผลํฯ
[26]
‘‘ฉตฺติํสมฺหิ อิโต กปฺเป, อาเสโก เทวคชฺชิโต;
สตฺตรตนสมฺปนฺโน, จกฺกวตฺตี มหพฺพโลฯ
[27]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา องฺโกลโก เถโร อิมา คาถาโย อภาสิตฺถาติฯ
องฺโกลกตฺเถรสฺสาปทานํ ปญฺจมํฯ
