‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[49]

‘‘เตสตฺตติมฺหิโต กปฺเป, จตุราสุํ รมุตฺตมา;

สตฺตรตนสมฺปนฺนา, จกฺกวตฺตี มหพฺพลาฯ

[50]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติกณฺณิปุปฺผิโย [กิํกณิกปุปฺผิโย (ก.)] เถโร อิมา คาถาโย อภาสิตฺถาติฯ

ติกณฺณิปุปฺผิยตฺเถรสฺสาปทานํ อฏฺฐมํฯ

9. เอกจาริยตฺเถรอปทานํ

[51]

‘‘ตาวติํเสสุ เทเวสุ, มหาโฆโส ตทา อหุ;

พุทฺโธ จ โลเก นิพฺพาติ, มยญฺจมฺห สราคิโนฯ

[52]

‘‘เตสํ สํเวคชาตานํ, โสกสลฺลสมงฺคินํ;

สพเลน อุปตฺถทฺโธ, อคมํ พุทฺธสนฺติกํฯ

[53]

‘‘มนฺทารวํ คเหตฺวาน, สงฺคีติ [สณฺหิตํ (สี.), สงฺคิตํ (สฺยา.)] อภินิมฺมิตํ;

ปรินิพฺพุตกาลมฺหิ, พุทฺธสฺส อภิโรปยิํฯ

[54]

‘‘สพฺเพ เทวานุโมทิํสุ, อจฺฉราโย จ เม ตทา;

กปฺปานํ สตสหสฺสํ, ทุคฺคติํ นุปปชฺชหํฯ

[55]

‘‘สฏฺฐิกปฺปสหสฺสมฺหิ, อิโต โสฬส เต ชนา;

มหามลฺลชนา นาม, จกฺกวตฺตี มหพฺพลาฯ

[56]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกจาริโย เถโร อิมา คาถาโย อภาสิตฺถาติฯ

เอกจาริยตฺเถรสฺสาปทานํ นวมํฯ

10. ติวณฺฏิปุปฺผิยตฺเถรอปทานํ

[57]

‘‘อภิภูตํ ปนิชฺฌนฺติ [อภิภูโตปนิชฺฌนฺติ (สี.)], สพฺเพ สงฺคมฺม เต มมํ [อภิภุํ เถรํ ปนิชฺฌาม, สพฺเพ สงฺคมฺม เต มยํ (สฺยา.)];

เตสํ นิชฺฌายมานานํ, ปริฬาโห อชายถฯ

[58]

‘‘สุนนฺโท นาม นาเมน, พุทฺธสฺส สาวโก ตทา;

ธมฺมทสฺสิสฺส มุนิโน, อาคจฺฉิ มม สนฺติกํฯ

[59]

‘‘เย เม พทฺธจรา อาสุํ, เต เม ปุปฺผํ อทุํ ตทา;

ตาหํ ปุปฺผํ คเหตฺวาน, สาวเก อภิโรปยิํฯ

[60]

‘‘โสหํ กาลํกโต ตตฺถ, ปุนาปิ อุปปชฺชหํ;

อฏฺฐารเส กปฺปสเต, วินิปาตํ น คจฺฉหํฯ

[61]

‘‘เตรเสโต กปฺปสเต, อฏฺฐาสุํ ธูมเกตุโน;

สตฺตรตนสมฺปนฺนา, จกฺกวตฺตี มหพฺพลาฯ

[62]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติวณฺฏิปุปฺผิโย เถโร อิมา คาถาโย อภาสิตฺถาติ;

ติวณฺฏิปุปฺผิยตฺเถรสฺสาปทานํ ทสมํฯ

กุฏชปุปฺผิยวคฺโค เอกูนวีสติโมฯ

ตสฺสุทฺทานํ –

กุฏโช พนฺธุชีวี จ, โกฏุมฺพริกหตฺถิโย;

อิสิมุคฺโค จ โพธิ จ, เอกจินฺตี ติกณฺณิโก;

เอกจารี ติวณฺฏิ จ, คาถา ทฺวาสฏฺฐิ กิตฺติตาติฯ

20. ตมาลปุปฺผิยวคฺโค